ក្រុមតវ៉ាប្រឆាំងរដ្ឋាភិបាលអ៊ីស្រាអែលប្រមូលផ្តុំគ្នានៅជុំវិញភ្លើងទៀនបង្ហាញ១០០ ថ្ងៃនៅទីក្រុងតែល អាវីវ។ AFP
សង្គ្រាមរវាងអ៊ីស្រាអែល និងក្រុមហាម៉ាស់ បានឈានដល់រយៈពេល ១០០ ថ្ងៃហើយដែលក្នុងរយៈពេលនេះភាពខ្ទេចខ្ទាំជាច្រើនបានកើតមានឡើងដែលនាំឱ្យមានបញ្ហាចម្រូងចម្រាសយ៉ាងខ្លាំងក្លាជាសកល។
ខាងក្រោមនេះជាព្រឹត្តិការណ៍សំខាន់ៗដែលបានកើតឡើងក្នុងអំឡុងពេលសង្គ្រាម ១០០ ថ្ងៃដែលជាសោកនាដកម្មធ្ងន់ធ្ងរ។ នៅថ្ងៃទី ៧ ខែតុលា ឆ្នាំ ២០២៣ ខ្មាន់កាំភ្លើងក្រុមហាម៉ាស់បានវាយលុកចូលទឹកដីអ៊ីស្រាអែលភាគខាងត្បូងពីតំបន់ហ្គាហ្សានិងបានវាយលុកតាមសហគមន៍នានាដោយបានសម្លាប់មនុស្សចំនួន ១ ២០០ នាក់ និងចាប់ចំណាប់ខ្មាំងចំនួន ២៤០ នាក់ត្រឡប់ទៅតំបន់ហ្គាហ្សាវិញ។
ថ្ងៃទី ៨ ខែតុលា ក្រុមហេសបូឡាហ៍របស់ប្រទេសលីបង់រួមនឹងក្រុមហាម៉ាស់ដែលជាសម្ព័ន្ធមិត្តរបស់អ៊ីរ៉ង់ចាប់ផ្តើមការវាយប្រហារគ្រាប់ផ្លោងឆ្លងព្រំដែនប្រឆាំងនឹងអ៊ីស្រាអែល។ នៅថ្ងៃទី ១៣ ខែតុលា អ៊ីស្រាអែលប្រាប់ឱ្យប្រជាជនដែលកំពុងរស់នៅក្នុងតំបន់ហ្គាហ្សាប្រមាណ ១ លាននាក់ជម្លៀសខ្លួនចេញទៅភាគខាងត្បូងដោយហេតុថា អ៊ីស្រាអែលនឹងចាប់ផ្ដើមវាយប្រហារលើតំបន់ហ្គាហ្សាភាគខាងជើង។
ថ្ងៃទី ១៧ ខែតុលា ការបំផ្ទុះគ្រាប់បែកពីលើអាកាសចំមន្ទីរពេទ្យ al-Ahli al-Arabi Baptist ក្នុងទីក្រុងហ្គាហ្សាដែលបានបង្កឱ្យមានកំហឹងនៅក្នុងពិភពអារ៉ាប់។ ភាគីប៉ាឡេស្ទីននិយាយថា មនុស្សរាប់រយនាក់បានស្លាប់និងបន្ទោសអ៊ីស្រាអែលប៉ុន្តែអាមេរិកបែរជាបង្ហាញការគាំទ្រអ៊ីស្រាអែល។ការបង្ហាញការគាំទ្រនេះ នាំទៅដល់ការរំសាយដំណើរទស្សនកិច្ចរបស់លោក ចូ បៃឌិន ប្រធានាធិបតីសហរដ្ឋអាមេរិកទៅ កាន់អារ៉ាប់។
ថ្ងៃទី ១៩ ខែតុលា នាវាចម្បាំង របស់កងទ័ពជើងទឹកអាមេរិកស្ទាក់ចាប់មីស៊ីលនិងយន្តហោះគ្មានមនុស្សបើកដែលបាញ់ចេញពីប្រទេសយេម៉ែនលើសមុទ្រក្រហមក្នុងទិសដៅទៅកាន់ប្រទេសអ៊ីស្រាអែល។
ក្រុមហ៊ូធី និងក្រុមហាម៉ាស់ដែលជាសម្ព័ន្ធមិត្តរបស់អ៊ីរ៉ង់បានបន្តការវាយប្រហាររយៈពេលវែងលើអ៊ីស្រាអែល និងបានឈានដល់ការវាយឆ្មក់លើនាវាជញ្ជូនតាមសមុទ្រក្រហម។
ថ្ងៃទី ២៧ ខែតុលាគឺមួយសប្ដាហ៍បន្ទាប់ពីការវាយលុកហាក់បានស្រាកស្រាន្តទៅហើយនោះបែរជាកក្រើកឡើងជាថ្មីដោយអ៊ីស្រាអែលប្ដេជ្ញាធ្វើឱ្យក្រុមហាម៉ាស់ដោះលែងប្រជាជនរបស់ខ្លួនទាំងអស់។
ថ្ងៃទី ៣១ ខែតុលា៖ទាហានអ៊ីស្រាអែល ១៥ នាក់ត្រូវបានសម្លាប់នៅក្នុងការប្រយុទ្ធនាតំបន់ហ្គាហ្សាដែលជាការខាតបង់ដ៏ធំបំផុតរបស់យោធាក្នុងរយៈពេល ១ ថ្ងៃនៃសង្គ្រាម។
នៅថ្ងៃទី ៩ ខែវិច្ឆិកាអ៊ីស្រាអែលនិយាយថា យន្តហោះគ្មានមនុស្សបើកចេញពីទឹកដីស៊ីរីបានវាយប្រហារទីក្រុង Eilat ភាគខាងត្បូងរបស់ខ្លួន។
ថ្ងៃ ១៥ ខែវិច្ឆិកា កងទ័ពអ៊ីស្រាអែលចូលទៅក្នុងមន្ទីរពេទ្យ Al Shifa ដ៏ធំបំផុតរបស់ហ្គាហ្សា បន្ទាប់ពីការឡោមព័ទ្ធជាច្រើនថ្ងៃក្នុងអំឡុងពេលដែលបុគ្គលិកពេទ្យនិយាយថា អ្នកជំងឺរួមទាំងទារកទើបនឹងកើតបានស្លាប់ដោយសារកង្វះថាមពល និងការផ្គត់ផ្គង់។
ខណៈនោះភាគីអ៊ីស្រាអែលបានអះអាងថា មន្ទីរពេទ្យនេះត្រូវបានគេប្រើប្រាស់ដើម្បីលាក់បាំងទីស្នាក់ការក្រោមដីមួយសម្រាប់ក្រុមយុទ្ធជនហាម៉ាស់។
ថ្ងៃទី ២១ ខែវិច្ឆិកាអ៊ីស្រាអែលនិងក្រុមហាម៉ាស់ប្រកាសបទឈប់បាញ់ដំបូងបង្អស់របស់ខ្លួន។កិច្ចព្រមព្រៀងផ្អាកការប្រយុទ្ធរយៈពេល ៤ ថ្ងៃនាពេលនោះធ្វើឡើងដើម្បីផ្លាស់ប្តូរចំណាប់ខ្មាំងស្ត្រីនិងកុមារ។ បទឈប់បាញ់បានអូសបន្លាយដល់ ១ សប្តាហ៍ ហើយចំណាប់ខ្មាំង ១០៥ នាក់ពីអ៊ីស្រាអែល និង ២៤០ នាក់ពីប៉ាឡេស្ទីនត្រូវបានដោះលែង។
ថ្ងៃទី ១១ ខែមករា មានយន្តហោះចម្បាំងនាវាមុជទឹករបស់សហរដ្ឋអាមេរិកនិងអង់គ្លេសបានចាប់ផ្តើមការវាយប្រហារតាមផ្លូវអាកាសជាច្រើនលើកនៅទូទាំងប្រទេសយេម៉ែនដើម្បីជាការសងសឹកប្រឆាំងនឹងកងកម្លាំងហ៊ូធីដែលបានវាយប្រហារនាវាដឹកទំនិញនៅសមុទ្រក្រហម។
នៅថ្ងៃទី ១១ ខែមករាផងដែរតុលាការយុត្តិធម៌អន្តរជាតិបានស្តាប់សេចក្តីថ្លែងការណ៍ដោយបើកចំហលើករណីដែលអ្រាហ្វិកខាងត្បូងប្តឹងពីបទបានប្រព្រឹត្តអំពើប្រល័យពូជសាសន៍៕
