សភាប្រជាជនកូរ៉េខាងជើង អនុម័តលុបចោលទីភ្នាក់ងារជាតិនានា ដែលធ្វើការបំណងបង្រួបបង្រួមកូរ់េខាងជើង។ AFP
រដ្ឋសភាប្រជាជនកូរ៉េខាងជើង បានប្រកាសលុបចោល«គណៈកម្មាធិការដើម្បីការបង្រួបបង្រួមដោយសន្តិភាព» របស់ប្រទេសនេះ ដែលកន្លងមកធ្វើការងារសំដៅលើការងារបង្រួបបង្រួមកូរ៉េទាំង២ ដែលច្រៀកជា២ អស់រយៈពេល៧៥ឆ្នាំមកហើយ។
យោងតាម AFP ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានរាយការណ៍កាលពីថ្ងៃទី១៦ ខែមករា ថា ប្រទេសកូរ៉េខាងជើងកំពុងលុបចោលជាផ្លូវការនូវទីភ្នាក់ងាររដ្ឋាភិបាលសំខាន់ៗមួយចំនួនដែលត្រូវបានចោទប្រកាន់ពីបទជំរុញកិច្ចសហប្រតិបត្តិការ និងការបង្រួបបង្រួមជាមួយកូរ៉េខាងត្បូង។
ទីភ្នាក់ងារសារព័ត៌មានកណ្តាលកូរ៉េ (KCNA) បាននិយាយថា ការសម្រេចចិត្តនេះត្រូវបានប្រកាសដោយសភាដែលរង់ចាំតែប្រថាប់ត្រារបស់កូរ៉េខាងជើង ហើយបានកើតឡើងតែប៉ុន្មានសប្តាហ៍បន្ទាប់ពីមេដឹកនាំរបស់ប្រទេសនេះ លោក គីម ជុងអ៊ុន (Kim Jong Un)បានបញ្ជាក់ថា ការបន្តស្វែងរកការផ្សះផ្សាជាមួយកូរ៉េខាងត្បូងគឺជា«កំហុស»។
ទំនាក់ទំនងកូរ៉េទាំង២ បានធ្លាក់ចុះយ៉ាងខ្លាំងក្នុងឆ្នាំ២០២៤ បន្ទាប់ពីកូរ៉េខាងជើងបាញ់បង្ហោះផ្កាយរណបចារកម្ម ដែលបានជំរុញឱ្យទីក្រុងសេអ៊ូលផ្អាកមួយផ្នែកនៃកិច្ចព្រមព្រៀងយោធាឆ្នាំ២០១៨សំដៅលុបបំបាត់ភាពតានតឹង។
ដោយដាក់ស្លាកកូរ៉េខាងត្បូងថាជា«សត្រូវចម្បង»ប្រមុខរដ្ឋកូរ៉េខាងជើង លោក គីម ជុងអ៊ុន ថ្មីៗនេះបានប្រកាសថាកិច្ចខិតខំប្រឹងប្រែងដើម្បីផ្សះផ្សា និងបង្រួបបង្រួមជាមួយគូប្រជែងរបស់កូរ៉េខាងជើង«គឺជាកំហុសដែលយើងមិនគួរធ្វើបន្តទៀតទេ»។
នៅក្នុងរដ្ឋធម្មនុញ្ញរបស់ពួកគេ ទាំងកូរ៉េខាងជើង និងកូរ៉េខាងត្បូងទាមទារអធិបតេយ្យភាពលើឧបទ្វីបទាំងមូល។
សាធារណរដ្ឋប្រជាមានិតប្រជាធិបតេយ្យកូរ៉េ និងសាធារណរដ្ឋកូរ៉េ ដែលជាឈ្មោះផ្លូវការរបស់កូរ៉េខាងជើង និងខាងត្បូង ត្រូវបានបង្កើតឡើងកាលពី៧៥ឆ្នាំមុន ប៉ុន្តែប្រទេសនីមួយៗនៅតែចាត់ទុកផ្នែកផ្សេងៗខ្លះទៀតជាលក្ខណៈបច្ចេកទេសថាជាអង្គភាពខុសច្បាប់។
រហូតមកដល់ពេលនេះ អ្វីដែលបានអនុម័តសម្រាប់ទំនាក់ទំនងការទូតរបស់ពួកគេត្រូវបានគ្រប់គ្រងដោយក្រសួងបង្រួបបង្រួមរបស់ទីក្រុងសេអ៊ូល និងគណៈកម្មាធិការដើម្បីការបង្រួបបង្រួមដោយសន្តិភាព របស់ទីក្រុងព្យុងយ៉ាង ដែលជាទីភ្នាក់ងារមួយក្នុងចំណោមទីភ្នាក់ងារដែលសភាប្រជាជនកំពូលបានប្រកាសថាត្រូវបានលុបចោល។
សេចក្តីសម្រេចដែលបានអនុម័តដោយសភានេះ យោងទៅតាម KCNA បាននិយាយថា៖«រដ្ឋដែលមានអរិភាពបំផុតទាំង២ ដែលកំពុងមានសង្គ្រាម ឥឡូវនេះកំពុងប្រឈមមុខគ្នាយ៉ាងធ្ងន់ធ្ងរនៅលើឧបទ្វីបកូរ៉េ»និងបានបន្ថែមថា«ការបង្រួបបង្រួមកូរ៉េមិនអាចសម្រេចបានជាមួយសាធារណរដ្ឋកូរ៉េទេ»៕
