លោក សឺហ្គេយ ឡាវរ៉ូវ រដ្ឋមន្ត្រីការបរទេសរុស្ស៊ី មើលមុខសមភាគីអ៊ុយក្រែនក្នុងកិច្ចប្រជុំនៅតួកគី។ AFP
រដ្ឋមន្ត្រីការបរទេសអ៊ុយក្រែនដែលកំពុងជាប់ផុងក្នុងសង្គ្រាមជាមួយមហាយក្សរុស្ស៊ី បានប្រាប់បណ្តាញផ្សព្វផ្សាយក្នុងស្រុកថា លោកស្ទើរតែទប់អារម្មណ៍លែងជាប់ ២ ឬ ៣ លើក និងហក់ដាល់ផ្ទៃមុខសមភាគីសត្រូវក្នុងកិច្ចសន្ទនាក្នុងពេលកន្លងមក ខណៈក្រសួងការបរទេសរុស្ស៊ីថា រិះគន់ថា លោកអសមត្ថភាព។
ដោយការដកស្រង់ការផ្សាយបន្តពីកិច្ចសម្ភាសន៍មួយរបស់អ្នកផលិតវីដេអូក្នុងប្រទេសអ៊ុយក្រែន ទីភ្នាក់ងារព័ត៌មានរ៉យទ័រ បានផ្សាយថា រដ្ឋមន្ត្រីការបរទេសអ៊ុយក្រែនលោក ឌីមីត្រូ គូលីបា (Dmytro Kuleba) បានរំឭកអំពីស្ថានភាពនៃការចរចាដែលទប់អារម្មណ៍លែងចង់បាន និងស្ទើរតែវាយ «ចំផ្ទៃមុខ» របស់រដ្ឋមន្ត្រីការបរទេសរុស្ស៊ី លោក សឺហ្គេយ ឡាវរ៉ូវ (Sergei Lavrov) ដែលដឹកនាំកិច្ចពិភាក្សាក្នុងដំណាក់កាលដំបូងនៃការលុកលុយរបស់ទីក្រុងម៉ូស្គូ។
តាមរ៉យទ័រ ការកត់សម្គាល់ខ្លីៗរបស់រដ្ឋមន្ត្រីការបរទេសអ៊ុយក្រែន គឺជាផ្នែកមួយនៃកិច្ចសម្ភាសន៍ក្រៅផ្លូវការរយៈពេល ១ ម៉ោងជាមួយអ្នកសរសេរប្លុកវីដេអូជនជាតិអ៊ុយក្រែនដែលផ្តោតលើប្រធានបទជាច្រើនចាប់ពីការចម្អិនអាហារ រហូតដល់ចំណង់ចំណូលចិត្ត និងបាល់ទាត់អ៊ុយក្រែន។
នៅពេលត្រូវបានសួរ ជាផ្នែកនៃសំណួរងាយឱ្យផ្ទុះកំហឹងឡើងយ៉ាងឆាប់រហ័ស អំពីសំណុំរឿងនៃការចរចាដ៏លំបាកបំផុត លោក គូលីបា បាននិយាយថា៖ «ការពិភាក្សាដ៏លំបាកបំផុតគឺមនុស្សដែលអ្នកមានអារម្មណ៍ជាធម្មតាថា អ្នកចង់តែស្ទុះទៅដាល់មុខមនុស្សដែលអង្គុយនៅទល់មុខអ្នកឱ្យចំច្រមុះ ប៉ុន្តែអ្នកពិតជាមិនអាចធ្វើវាបានទេ»។
រ៉យទ័របានស្រង់សម្តីដូចនិយាយថា៖ «ខ្ញុំអាចនិយាយបានថារឿងនេះធ្លាប់បានកើតឡើង ២ ឬ ៣ ដងហើយ។ ពេលមួយ គឺជាមួយ Lavrov នៅ (ទីក្រុងទេសចរណ៍តួកគី) Antalya នៅនិទាឃរដូវ ឆ្នាំ ២០២២»។
អ្នកចរចាអ៊ុយក្រែន និងរុស្ស៊ី បានជួបប្រជុំគ្នាជាច្រើនជុំនៃកិច្ចចរចានៅដើមសប្តាហ៍បន្ទាប់ពីការលុកលុយខែកុម្ភៈ ឆ្នាំ ២០២២ ដែលដំបូងគេនៅជិតព្រំដែនអ៊ុយក្រែនក្នុងប្រទេសបេឡារុស និងក្រោយមកបានធ្វើឡើងនៅប្រទេសតួកគី។
លោក គូលីបា បាននិយាយនៅពេលនោះថា កិច្ចចរចានៅប្រទេសតួកគីមានការពិបាក និងដោះស្រាយជាមួយនឹងបទឈប់បាញ់ និងការរៀបចំច្រករបៀងមនុស្សធម៌។ គ្មានកិច្ចព្រមព្រៀងណាមួយត្រូវបានរកឃើញក្នុងការចរចាទាំងនោះទេ ហើយក៏មិនមានការចរចាទៀតដែរចាប់តាំងពីពេលនោះមក។
ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេឡេនស្គី (Volodymyr Zelenskiy) ច្រានចោលការចរចាជាមួយទីក្រុងម៉ូស្គូរហូតទាល់តែទាហានរុស្ស៊ីត្រូវដកចេញពីអ៊ុយក្រែនឱ្យនៅសល់តិចជាង ២០ ភាគរយនៃទឹកដីដែលរុស្ស៊ីកាន់កាប់ឥឡូវនេះ។
មេដឹកនាំវិមានក្រឹមឡាំង លោក វ្ល៉ាឌីមៀរ ពូទីន និយាយថា រុស្ស៊ីត្រៀមខ្លួនរួចជាស្រេចសម្រាប់កិច្ចពិភាក្សា ប៉ុន្តែបានប្តេជ្ញាបន្តនូវអ្វីដែលទីក្រុងម៉ូស្គូហៅថា«ប្រតិបត្តិការយោធាពិសេស» របស់ខ្លួន។
នៅទីក្រុងម៉ូស្គូ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយថា ការថ្លែងចុងក្រោយរបស់លោក គូលីបា បានបង្ហាញពីការអសមត្ថភាពនៃការដឹកនាំរបស់អ៊ុយក្រែន។
លោកស្រី Zakharova បានប្រាប់កាសែត Izvestia ប្រចាំថ្ងៃថា«ហើយនោះជាបញ្ហា៖ មនុស្សដែលមិនមានការអប់រំ និងមនុស្សឆេវឆាវត្រូវបានជ្រើសរើសក្រោមការក្លែងបន្លំធ្វើជារដ្ឋមន្ត្រី ដើម្បីបំផ្លាញអ៊ុយក្រែន ដើម្បីលុយអាមេរិក»។
លោកស្រីបន្ថែមថា៖«ប្រហែលជាគាត់ស្ថិតក្នុងការប្រកួតដែលគ្មានការរារាំងជាជាងកិច្ចការបរទេស?»៕
