ការបង្ហាញអាវុធទំនើបក្នុងក្បួនព្យុហយាត្រាយោធាក្នុងទីក្រុងព្យុងយ៉ាងកន្លងមក។ AFP
ក្រសួងការបរទេសកូរ៉េខាងត្បូងបានឱ្យដឹងនៅថ្ងៃពុធថា កូរ៉េខាងត្បូងបានដាក់ទណ្ឌកម្មលើបុគ្គលចំនួន២រូប អង្គភាពចំនួន៣ និងនាវាចំនួន ១១ គ្រឿង ដែលពាក់ព័ន្ធទៅនឹងកម្មវិធីផលិតអាវុធនុយក្លេអ៊ែរ និងមីស៊ីលរបស់កូរ៉េខាងជើង។
ក្រសួងបានគូសបញ្ជាក់ថា គោលដៅដែលបានដាក់ក្នុងបញ្ជីខ្មៅថ្មីនេះ ភាគច្រើនជាប់ពាក់ព័ន្ធនឹងការរត់ពន្ធថាមពលខុសច្បាប់តាមសមុទ្រ ចូលទៅកូរ៉េខាងជើង។
ដោយសារតែភាពជាប់គាំងយូរយារនៅអង្គការសហប្រជាជាតិ កូរ៉េខាងត្បូងបានងាកទៅរកការដាក់ទណ្ឌកម្មលើកូរ៉េខាងជើងដោយខ្លួនឯង ឬរួមគ្នាជាមួយសហរដ្ឋអាមេរិក និងជប៉ុន ដើម្បីធ្វើឱ្យរាំងស្ទះដល់ប្រភពមូលនិធិដែលកូរ៉េខាងជើងយកទៅប្រើក្នុងកម្មវិធីផលិតអាវុធរបស់ខ្លួន។
ការប្រកាសដាក់ទណ្ឌកម្មនាពេលនេះ ធ្វើឡើងប៉ុន្មានថ្ងៃប៉ុណ្ណោះ បន្ទាប់ពីកូរ៉េខាងជើងបានបាញ់បង្ហោះមីស៊ីលប្រើឥន្ធនៈរឹងមានល្បឿនលឿនជាងសំឡេង ដែលកូរ៉េខាងត្បូង និងសហរដ្ឋអាមេរិកបានថ្កោលទោសយ៉ាងខ្លាំងថាជាការរំលោភយ៉ាងធ្ងន់ធ្ងរលើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
គេមើលឃើញថា ស្ថានភាពនៅឧបទ្វីបកូរ៉េបន្តតានតឹងខ្លាំង ជុំវិញការសាកល្បងអាវុធរបស់កូរ៉េខាងជើង និងសកម្មភាពយោធារបស់អាមេរិក និងសម្ព័ន្ធមិត្តក្នុងតំបន់ រួមមានកូរ៉េខាងត្បូង និងជប៉ុន ដើម្បី «ទប់ទល់នឹងការគំរាមកំហែងរបស់ក្រុងព្យុងយ៉ាង»៕
