ប្រធានាធិបតីរុស្ស៊ី លោក វ៉្លាឌីមៀរ ពូទីន ក្នុងពេលជួបជាមួយមន្ត្រីថ្នាក់ក្រោម។ AFP
ក្រោយពីថ្នាក់ដឹកនាំអ៊ុយក្រែនជួបប្រជុំជាមួយទីប្រឹក្សាសន្តិសុខជាតិមកពីជាង ៨៣ ប្រទេសក្នុងទីក្រុង Davos ប្រទេសស្វ៊ីសនៅដើមសប្តាហ៍នេះ ក្រសួងការបរទេសរុស្ស៊ីហៅកិច្ចប្រជុំសន្តិភាពអ៊ុយក្រែននាពេលនោះថា «គ្មានន័យ» និងជាផែនការមិនអាចសម្រេចបាន។
ក្នុងសន្និសីទសារព័ត៌មានកាលពីថ្ងៃចន្ទ លោក Andriy Yermak នាយសេនាធិការចម្រុះ (chief of staff) របស់ប្រធានាធិបតីអ៊ុយក្រែន បានលើកឡើងពីសារៈសំខាន់នៃវត្តមានប្រទេសចិនក្នុងការចូលរួមក្នុងកិច្ចចរចាដើម្បីបញ្ចប់សង្គ្រាមជាមួយរុស្ស៊ី។
យោងការចេញផ្សាយរបស់ទីភ្នាក់ងារព័ត៌មានរុស្ស៊ី TASS រុស្ស៊ីបាននិយាយកាលពីថ្ងៃអង្គារថា វាបង្ហាញកាន់តែច្បាស់សម្រាប់ពិភពលោកថា ផែនការរបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី (Volodymyr Zelenskiy) ដើម្បីដោះស្រាយសង្គ្រាមជិត ២ ឆ្នាំមិនមានសង្ឃឹមទទួលបានជោគជ័យ និងបានច្រានចោលកិច្ចប្រជុំដែលផ្តោតលើបញ្ហាសន្តិភាពនោះថា «គ្មានន័យ និងគ្រោះថ្នាក់»។
ដោយដកស្រង់ចេញពីគេហទំព័ររបស់ក្រសួងការបរទេសរុស្ស៊ី ភាគីរុស្ស៊ីបានអះអាងថា កិច្ចប្រជុំបានលាតត្រដាងពីភាពខុសគ្នារវាងអ្នកចូលរួម ហើយមិនមានការកើនឡើងនូវការគាំទ្រចំពោះសំណើនោះទេ។
ប្រទេសអ៊ុយក្រែនរួមជាមួយប្រទេសដៃគូផ្តល់ជំនួយសម្រាប់ការធ្វើសង្គ្រាមប្រឆាំងរុស្ស៊ីក្នុងរយៈពេលជិត ២ ឆ្នាំកន្លងមកនេះ បានរៀបចំកិច្ចប្រជុំដែលមានបំណងស្វែងរកដំណោះស្រាយនយោបាយ និងការស្តារអ៊ុយក្រែនឡើងលើកទី ៤ ប៉ុន្តែពួកគេនៅមិនទាន់រកឃើញផែនការសន្តិភាពណាមួយឡើយ ដោយសារភាគីជម្លោះអ៊ុយក្រែន និងរុស្ស៊ីបដិសេធការចរចាដោយផ្ទាល់ដើម្បីបញ្ចប់សង្គ្រាម។
ក្រសួងការបរទេសរុស្ស៊ីបានលើកឡើងថា៖ «មានការយល់ដឹងកាន់តែច្រើនឡើងថា គ្មានសន្តិភាពរួម យុត្តិធម៌ និងនិរន្តរភាពណាមួយអាចសម្រេចបានដោយផ្តោតលើឱសានវាទនៃរូបមន្តហ្សេឡេនស្គី នោះទេ។ កិច្ចប្រជុំបែបនេះទាំងអស់ រួមទាំងការប្រជុំនៅ Davos និងអ្នកដែលត្រូវអនុវត្តតាមវាគ្មានន័យ និងគ្រោះថ្នាក់សម្រាប់ការដោះស្រាយវិបត្តិអ៊ុយក្រែន»។
ទោះជាបែបណា កិច្ចប្រជុំចុងក្រោយស្តីពីសន្តិភាពអ៊ុយក្រែន នៅទីក្រុង Davos មានការប្រែប្រួលខ្លាំងឆ្ពោះទៅរកដំណោះស្រាយនយោបាយ ដោយសារភាគីអ៊ុយក្រែនបានមើលឃើញសារៈសំខាន់របស់វត្តមានចិនក្នុងដំណើរការចរចារកសន្តិភាពនៅក្នុងវិបត្តិអ៊ុយក្រែន ដោយខុសពីពេលកន្លងមក ភាគីអ៊ុយក្រែនមិនបានពេញចិត្តជំហររបស់ចិនឡើយ៕
