អតីតរដ្ឋមន្ត្រីដឹកជញ្ជូនរបស់សិង្ហបុរី លោក S. Iswaran ពេលដើរចេញពីអគារតុលាការនៅថ្ងៃទី១៨ មករានេះ។ AFP
ទីភ្នាក់ងារប្រឆាំងអំពើពុករលួយសិង្ហបុរី បានឱ្យដឹងនៅថ្ងៃព្រហស្បតិ៍ ទី ១៨ មករា នេះថា អតីតរដ្ឋមន្ត្រីដឹកជញ្ជូនរបស់រដ្ឋមួយនេះគឺ លោក S. Iswaran រងការកាត់ទោសនៅតុលាការពីបទប្រព្រឹត្តអំពើពុករលួយដ៏កម្រពាក់ព័ន្ធទទួលសំណូកពីមហាសេដ្ឋអចលទ្រព្យ។នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
ការិយាល័យស៊ើបអង្កេតអំពើពុករលួយ (CPIB) បាននិយាយក្នុងសេចក្តីថ្លែងការណ៍ថា លោកIswaran ដែលត្រូវបានអាជ្ញាធរចាប់ខ្លួនកាលពីខែកក្កដាឆ្នាំមុនរងការចោទប្រកាន់ថាបានទទួលប្រាក់សំណូកដែលមានតម្លៃ ៣៨៤ ៣៤១ ដុល្លារសិង្ហបុរី ( ២៨៦ ១៨១ ដុល្លារអាមេរិក) ពីមហាសេដ្ឋីអចលនទ្រព្យសិង្ហបុរី លោក Ong Beng Seng ជាថ្នូរជំរុញផលប្រយោជន៍អាជីវកម្មរបស់ លោក Ong។
ឯកសារចោទប្រកាន់របស់ភ្នាក់ងារដដែល បានបង្ហាញថា ការឃុបឃិតគ្នានេះ រួមបញ្ជូលទាំងសំបុត្រចូលរួមទស្សនាបាល់ទាត់ ការប្រគុំតន្ត្រី និងជើងហោះហើរលើយន្តហោះឯកជនរបស់លោក Ong ក៏ដូចជាសំបុត្រចូលមើលការប្រណាំងឡាននៅទីប្រកួត Formula 1 Grand Prix ជាដើម។
លោក Iswaran គឺជាទីប្រឹក្សានៃគណៈកម្មាធិការដឹកនាំរបស់ Grand Prix ខណៈលោក Ong ជាម្ចាស់សិទ្ធិនៃកម្មវិធីប្រណាំងឡាននេះ។
CPIB បាននិយាយថា លោក Iswaran ប្រឈមមុខនឹងការកាត់ទោសលើបទចោទប្រកាន់សរុបចំនួន២៧ រួមទាំងអំពើពុករលួយ និងការរារាំងដំណើរការរកយុត្តិធម៌។
ក្នុងលិខិតលាលែងចេញពីតំណែងដែលចេញផ្សាយដោយការិយាល័យនាយករដ្ឋមន្ត្រីសិង្ហបុរី លោក Iswaran បានច្រានចោលការចោទប្រកាន់ទាំងពួង ហើយនិយាយថា លោកនឹងមិនផ្ដោតលើការជម្រះរឿងអាស្រូវដើម្បីបង្ហាញពីភាពស្អាតស្អំរបស់លោកទេ។
យ៉ាងណាមិញ លោក Iswaran អាចនឹងត្រូវពិន័យជាប្រាក់រហូតដល់ ១០០ ០០០ ដុល្លារ និងជាប់គុកយ៉ាងហោចណាស់ ៧ឆ្នាំ ប្រសិនបើលោករកឃើញថាមានពិរុទ្ធ ហើយត្រូវផ្តន្ទាទោសពីបទពុករលួយ។
នៅថ្ងៃព្រហស្បតិ៍នេះ ការិយាល័យរបស់លោក Ong មិនបានចេញប្រតិកម្មយ៉ាងណាមួយភ្លាមៗទេ។មហាសេដ្ឋីអចលនទ្រព្យរូបនេះ ក៏ត្រូវបានចាប់ខ្លួនផងដែរកាលពីខែកក្កដាឆ្នាំមុនដើម្បីជាផ្នែកមួយនៃការស៊ើបអង្កេតអំពើពុករលួយ ប៉ុន្តែមកទល់ពេលនេះ គេមិនទាន់ឃើញមានការចោទប្រកាន់ណាមួយធ្វើឡើងប្រឆាំងនឹងរូបលោកនៅឡើយទេ។
សំណុំរឿងពុករលួយលើមន្រ្តីជាន់ខ្ពស់រដ្ឋាភិបាលសិង្ហបុរីគឺជារឿងមួយកម្រ ខណៈមន្ត្រីរាជការទទួលបានប្រាក់ខែខ្ពស់ ដើម្បីទប់ស្កាត់អំពើពុករលួយ ដោយប្រាក់ខែប្រចាំឆ្នាំរបស់គណៈរដ្ឋមន្ត្រីជាច្រើន មានលើសពី១ លានដុល្លារសិង្ហបុរីទៀតផង។
នៅឆ្នាំ ២០២២អង្គការតម្លាភាពអន្តរជាតិបានចាត់ចំណាត់ថ្នាក់សិង្ហបុរី ថា ជាប្រទេស ដែលមានអំពើពុករលួយតិចបំផុតទី៥ចំណោមប្រទេស ១៨០ ក្នុងសន្ទស្សន៍ការយល់ឃើញពីអំពើពុករលួយអន្តរជាតិ។ ករណីពុករលួយចុងក្រោយដែលពាក់ព័ន្ធនឹងរដ្ឋមន្ត្រី គឺនៅឆ្នាំ ១៩៨៦ នៅពេលដែលរដ្ឋមន្ត្រីអភិវឌ្ឍន៍ជាតិរងការស៊ើបអង្កេតពីបទទទួលសំណូក។ លោករដ្ឋមន្ត្រីរូបនោះ បានស្លាប់មុនរងការកាត់ទោសនៅតុលាការ៕
