លោក វ្ល៉ាឌីមៀរ ពូទីន ជួបជាមួយទាហានអំឡុងពេលទស្សនកិច្ចនៅមជ្ឈមណ្ឌលហ្វឹកហ្វឺនយោធា នាពេលកន្លងទៅ។ រូបថត AFP
ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានគំរាមជាថ្មីថា រុស្ស៊ីនឹងបង្កើនការវាយប្រហារលើគោលដៅយោធាក្នុងប្រទេសអ៊ុយក្រែនឱ្យកាន់តែខ្លាំង បន្ទាប់ពីអ៊ុយក្រែនបើកការវាយប្រហារដែលមិនធ្លាប់មានពីមុនមក ចូលទៅក្នុងទឹកដីរបស់រុស្ស៊ីបណ្តាលឱ្យស្លាប់ និងរបួសជិត ១៥០ នាក់ក្នុងទីក្រុង Belgorod។
លោក ពូទីន បានថ្លែងក្នុងអំឡុងទស្សនកិច្ចទៅមន្ទីរពេទ្យយោធាថា៖ «យើងនឹងបង្កើនការវាយប្រហារឱ្យខ្លាំង។ ពិតមែនគ្មានឧក្រិដ្ឋកម្មប្រឆាំងនឹងជនស៊ីវិលណា ដែលនឹងមិនទទួលរងការដាក់ទោសវិញនោះទេ»។
លោក ពូទីន ដែលជាអ្នកសម្រេចលើកទ័ពចូលលុកលុយអ៊ុយក្រែនកាលពីដើមឆ្នាំ ២០២២ បានបន្តថា រុស្ស៊ីនឹងបន្តវាយលុកលើកន្លែងយោធារបស់អ៊ុយក្រែន ហើយថា៖ «យើងវាយប្រហារថ្ងៃនេះ និងថ្ងៃស្អែក ហើយនឹងបន្តវាយប្រហារទៀត»។
លោកប្រាប់ទៅទាហានរុស្ស៊ីដែលរងរបួសក្នុងមន្ទីរពេទ្យថា៖ «អ្វីដែលកើតឡើងនៅ Belgorod គឺជាអំពើភេរវកម្ម។ គ្មានពាក្យអ្វីផ្សេងហៅនោះទេ»។
ជាមួយគ្នានេះ លោក ពូទីន បានចោទប្រកាន់កងកម្លាំងអ៊ុយក្រែនថាបានកំណត់គោលដៅ«នៅកណ្តាលទីក្រុង ជាកន្លែងដែលមនុស្សម្នានាំគ្នាដើរលេងមុនថ្ងៃចូលឆ្នាំសកល» ដែលនោះគឺជាការវាយប្រហារលើជនស៊ីវិលដោយចេតនា។
អ៊ុយក្រែនបានវាយប្រហារលើទីក្រុង Belgorod ដែលនៅមិនឆ្ងាយប៉ុន្មានពីព្រំដែនខេត្តខាកៀវរបស់អ៊ុយក្រែននៅថ្ងៃសៅរ៍ ដោយបានសម្លាប់មនុស្ស ២៥ នាក់ រួមទាំងកុមារ ៥ នាក់ និងធ្វើឱ្យរបួស ១០៩ នាក់។
ការបាញ់ប្រហារនេះគឺបន្ទាប់ពីរុស្ស៊ីបានបើកការវាយប្រហារតាមអាកាសទ្រង់ទ្រាយធំទៅលើទីក្រុងនានារបស់អ៊ុយក្រែន។ អ៊ុយក្រែនបានចោទរុស្ស៊ីថាបានកំណត់គោលដៅលើប្រទេសខ្លួន ដោយបង្កើនការវាយប្រហារដោយ្រដូនចំនួន៩០នៅយប់ឆ្លងឆ្នាំសកល ២០២៤៕
