ក្រុមសាច់ញាតិនៃជនដែលត្រូវបានចាប់ជំរិតជាចំណាប់ខ្មាំង រួមជាមួយអ្នកតវ៉ារាប់ពាន់នាក់នៅក្នុងការតវ៉ាកាលពីថ្ងៃសៅរ៍។ AFP
ប្រជាជនអ៊ីស្រាអែល នាថ្ងៃទី ២០ ខែមករា ឆ្នាំ ២០២៤ បានជួបជុំគ្នាធ្វើបាតុកម្មនៅទីក្រុងតែលអាវីវ (Tel Aviv) ដើម្បីតវ៉ាប្រឆាំងនឹងរដ្ឋាភិបាលដឹកនាំដោយនាយករដ្ឋមន្ត្រី លោក បេនចាមីន ណេតាន់យ៉ាហ៊ូ ដោយចោទប្រកាន់នាយករដ្ឋមន្ត្រីរបស់ខ្លួនថាបានធ្វើឱ្យប៉ះពាល់យ៉ាងធ្ងន់ធ្ងរដល់សន្តិសុខជាតិ។
តាមរយៈការមិនពេញចិត្តចំពោះរដ្ឋាភិបាលក្រោមការដឹកនាំរបស់លោក ណេតាន់យ៉ាហ៊ូ បែបនេះ ប្រជាជនអ៊ីស្រាអែលទាំងនោះក៏បានតវ៉ាឱ្យមានការបោះឆ្នោតជាថ្មីផងដែរ។
យ៉ាងណាក៏ដោយ ការតវ៉ាប្រឆាំងរដ្ឋាភិបាលនាពេលនេះ បានអង្រួនចលនាប្រទេសទាំងមូលឱ្យចាប់ផ្ដើមគិតគូពីប្រជាជនស្លូតត្រង់ដែលបានបាត់បង់ជីវិតក្នុងសង្គ្រាមកន្លងមកនិងប្រជាជនមួយចំនួនទៀតដែលត្រូវបានចាប់ធ្វើចំណាប់ខ្មាំង។
ទន្ទឹមនឹងសង្គ្រាមដែលឈានចូលដល់ខែទី៤ទៅហើយនោះសម្ទុះនៃការគាំទ្រលោកនាយករដ្ឋមន្ត្រីនេតាន់យ៉ាហ៊ូបានធ្លាក់ជាលំដាប់រីឯចលនានៃការតវ៉ាឱ្យផ្លាស់ប្ដូររដ្ឋាភិបាលក៏មានការវិវត្តកាន់តែខ្លាំងផងដែរ។
បើទោះជាមានការមិនពេញចិត្តចំពោះការដឹកនាំរបស់រដ្ឋាភិបាលបច្ចុប្បន្នប៉ុន្តែក្រុមអ្នកតវ៉ារាប់ពាន់នាក់បានជ្រើសរើសយកការធ្វើបាតុកម្មដោយគ្មានអំពើហិង្សាពោលគឺគ្រាន់តែវាយស្គរស្រែកទ្រហោយំនិងគ្រវីទង់ជាតិអ៊ីស្រាអែលប៉ុណ្ណោះ។
អ្នកតវ៉ាម្នាក់ក្នុងចំណោមអ្នកតវ៉ាទាំងនោះគឺអ្នកស្រី Noam Alonដែលមានប្អូនប្រុសជាទាហាននិងបានបាត់បង់ជីវិតក្នុងហេតុការណ៍វាយប្រហាររបស់ក្រុមហាម៉ាស់កាលពីថ្ងៃទី៧ ខែតុលាឆ្នាំ២០២៣ បាននិយាយថា៖ «រដ្ឋាភិបាលបានបោះបង់ចោលពួកយើងតាំងតែពីថ្ងៃសង្គ្រាមផ្ទុះឡើងហើយនៅតែបន្តបោះបង់ចោលយើងរហូតដល់រាល់ថ្ងៃនេះ»។
អ្នកស្រីបានបន្តថារដ្ឋាភិបាលបានបោះបង់ប្រជាជនដែលជម្លៀសខ្លួនចេញពីតំបន់ហ្គាហ្សាបោះបង់ក្រុមគ្រួសារជនរងគ្រោះនិងគ្រួសារចំណាប់ខ្មាំងដោយផ្ដោតតែទៅលើការវាយប្រហារសងសឹកក្រុមហាម៉ាស់។
នៅក្នុងការតវ៉ាអ្នកស្រីបាននិយាយដោយសង្កត់ធ្ងន់ថា៖ «អំណាចគឺនៅក្នុងដៃរបស់យើង! យើងមានសិទ្ធិសេរីភាពគ្រប់គ្រាន់ក្នុងការផ្លាស់ប្តូរនិងរៀបចំរដ្ឋាភិបាលឡើងវិញដូច្នេះហើយរដ្ឋាភិបាលត្រូវតែចុះចេញឥឡូវនេះ!»។
ក្រោយការស្រែកតវ៉ារបស់អ្នកស្រីបែបនេះក្រុមអ្នកតវ៉ាឯទៀតក៏នាំគ្នាស្រែកបន្ទោរតាមក្រោយថា ៖ «ចុះចេញឥឡូវនេះ!»។
យ៉ាងណាមិញកន្លងមកមេដឹកនាំគណបក្សប្រឆាំងធ្លាប់បានស្នើសុំឱ្យមានការបង្កើតរដ្ឋាភិបាលរួបរួមមួយដែលមិនមែនលោក ណេតាន់យ៉ាហ៊ូ ជាអ្នកដឹកនាំប៉ុន្តែគ្មានចំណាត់ការណាមួយចំពោះសំណើនេះនោះទេ។
ប្រជាជនអ៊ីស្រាអែលបានខឹងសម្បារយ៉ាងខ្លាំងចំពោះលោក ណេតាន់យ៉ាហ៊ូនៅក្រោយការវាយប្រហារកាលពីថ្ងៃទី៧ខែតុលាដែលបានសម្លាប់ជីវិតមនុស្សអស់១៤០០នាក់។
ជាងពាក់កណ្ដាលនៃប្រជាជនអ៊ីស្រាអែលចង់ឱ្យលោកនេតាន់យ៉ាហ៊ូចុះចេញពីតំណែងភ្លាមៗបន្ទាប់ពីសង្គ្រាមនេះបញ្ចប់ហើយមនុស្ស៩នាក់ក្នុងចំណោម១០នាក់និយាយថាការវាយលុករបស់ក្រុមហាម៉ាស់នាពេលនោះសបញ្ជាក់ឱ្យឃើញពីកម្សោយនៃការដឹកនាំរបស់រដ្ឋាភិបាលលោក ណេតាន់យ៉ាហ៊ូ៕
