ស្លាកសញ្ញាក្រុមហ៊ុន Google តាំងបង្ហាញជាមួយកម្មវិធីបច្ចេកវិទ្យាផ្សេងៗទៀត។ AFP
ក្រុមហ៊ុនបច្ចេកវិទ្យាយក្ស Google របស់សហរដ្ឋអាមេរិក កាលពីថ្ងៃព្រហស្បតិ៍ ទី ១៨ ខែមករា ឆ្នាំ ២០២៤ កន្លងទៅថ្មីៗបាននិយាយថា ខ្លួននឹងវិនិយោគទឹកប្រាក់ ១ ពាន់លានដុល្លារលើការកសាងមជ្ឈមណ្ឌលទិន្នន័យនៅខាងក្រៅទីក្រុងឡុងដ៍ដែលនេះជាការវិនិយោគធំបំផុតចុងក្រោយរបស់ខ្លួននៅក្នុងប្រទេសអង់គ្លេសដើម្បីឆ្លើយតបនឹងតម្រូវការកើនឡើងសម្រាប់សេវាកម្មអ៊ីនធឺណិតនៅក្នុងតំបន់។
នៅក្នុងសេចក្តីថ្លែងការណ៍មួយ របស់ក្រុមហ៊ុន Google បានឱ្យដឹងថាមជ្ឈមណ្ឌលទិន្នន័យថ្មីនេះស្ថិតនៅលើផ្ទៃដីទំហំ ១៣ ហិកតាដែលខ្លួនបានទិញក្នុងឆ្នាំ ២០២០ មានទីតាំងនៅទីក្រុង Waltham Cross មានចម្ងាយប្រមាណ ១៥ ម៉ាយភាគខាងជើងនៃកណ្តាលទីក្រុងឡុងដ៍។
រដ្ឋាភិបាលអង់គ្លេសដែលជំរុញការវិនិយោគពីសំណាក់ក្រុមហ៊ុនបច្ចេកវិទ្យាជួយជ្រោមជ្រែងលើហេដ្ឋារចនាសម្ព័ន្ធថ្មីជាពិសេសនៅក្នុងឧស្សាហកម្មកំពុងរីកចម្រើនដូចជាបច្ចេកវិទ្យា និងបញ្ញាសិប្បនិម្មិតហើយបានពិព័ណ៌នាការវិនិយោគរបស់ Google ថាជា «ទំនុកចិត្ត» លើចក្រភពអង់គ្លេស។
នាយករដ្ឋមន្ត្រីអង់គ្លេស លោក Rishi Sunak បាននិយាយនៅក្នុងសេចក្តីថ្លែងការណ៍ថា៖ «ការវិនិយោគ១ពាន់លានដុល្លាររបស់ Google គឺជាសក្ខីភាពថា ចក្រភពអង់គ្លេសគឺជាមជ្ឈមណ្ឌលផ្នែកបច្ចេកវិទ្យា និងមានសក្តានុពលដ៏ធំសម្រាប់ការរីកចម្រើន»។
ការវិនិយោគនេះធ្វើឡើងបន្ទាប់ពីក្រុមហ៊ុន Google ទិញអគារការិយាល័យមួយកណ្តាលទីក្រុងឡុងដ៍ក្នុងតម្លៃ១ពាន់លានដុល្លារក្នុងឆ្នាំ ២០២២ នៅជិតតំបន់ Covent Garden និងទីតាំងមួយផ្សេងទៀតដែលក្រុមហ៊ុនកំពុងសាងសង់ការិយាល័យថ្មីនៅជិតតំបន់ King's Cross ហើយវាក៏ជាកន្លែងដែលក្រុមហ៊ុនបញ្ញាសិប្បនិម្មិត AI DeepMind កំពុងមានមូលដ្ឋាននៅទីនោះផងដែរ។
ការវិនិយោគនេះក៏កើតឡើងត្រឹមប៉ុន្មានសប្តាហ៍បន្ទាប់ពីក្រុមហ៊ុន Microsoft បង្ហាញផែនការរបស់ខ្លួនក្នុងការវិនិយោគទឹកប្រាក់ប្រមាណ ២,៥ ពាន់លានផោនស្មើនឹង ៣,២ ពាន់លានដុល្លារចូលទៅក្នុងចក្រភពអង់គ្លេសក្នុងរយៈពេល ៣ ឆ្នាំរួមទាំងការបង្កើតមជ្ឈមណ្ឌលទិន្នន័យរបស់ខ្លួនដើម្បីគាំទ្រសេវាកម្ម AI នាពេលអនាគត។
លោក Ruth Porat ប្រធានផ្នែកហិរញ្ញវត្ថុរបស់ Alphabet ដែលជាក្រុមហ៊ុនមេរបស់ Google បាននិយាយនៅក្នុងសេចក្តីថ្លែងការណ៍ថា៖«មជ្ឈមណ្ឌលទិន្នន័យថ្មីនេះនឹងជួយបំពេញតម្រូវការសេវាកម្ម AI និង cloud ដែលកំពុងកើនឡើងរបស់យើងហើយនាំមកនូវភាពសំខាន់ដល់អាជីវកម្មនៅទូទាំងចក្រភពអង់គ្លេស»។
បច្ចេកវិទ្យា AI បានក្លាយជាអនាគតនៃការអភិវឌ្ឍក្នុងវិស័យបច្ចេកវិទ្យា ដោយក្រុមហ៊ុនយក្សនានាបង្កើនការវិនិយោគយ៉ាងធំសម្បើម។ កាលពីខែតុលា ឆ្នាំ ២០២៣ ក្រុមហ៊ុន Google បានប្រកាសផែនការវិនិយោគក ២ ពាន់លានដុល្លារ ១ សប្តាហ៍ក្រោយក្រុមហ៊ុន Amazon បានប្រកាសវិនិយោគ ៤ ពាន់លានដុល្លារក្នុងវិស័យនេះ៕
