លោក គីម ជុងអ៊ុន ចាប់ដៃលោកពូទីនក្នុងដំណើរទស្សនកិច្ចនៅរុស្ស៊ីកាលខែកញ្ញា២០២៣។ AFP
ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃអាទិត្យ ទី ២១ ខែមករា ឆ្នាំ ២០២៤ ថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានបង្ហាញពីឆន្ទៈធ្វើទស្សនកិច្ចទៅកាន់ទីក្រុងព្យុងយ៉ាងនាពេលឆាប់ៗនេះ។
លោក ពូទីន បានបង្ហាញឆន្ទៈនេះ អំឡុងជួបជាមួយរដ្ឋមន្ត្រីការបរទេសកូរ៉េខាងជើង លោកស្រី Choe Son Hui ក្នុងប្រទេសរុស្ស៊ីកាលពីសប្តាហ៍មុន ហើយបានថ្លែងអំណរគុណដល់មេដឹកនាំកូរ៉េខាងជើងលោក គីម ជុងអ៊ុន សម្រាប់ការអញ្ជើញឱ្យទៅធ្វើទស្សនកិច្ចនៅប្រទេសរុស្ស៊ីកាលពីពាក់កណ្តាលខែកញ្ញា ឆ្នាំ ២០២៣។
កាលពីសប្ដាហ៍មុន អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានឱ្យដឹងថា រុស្ស៊ីសង្ឃឹមថា ដំណើរទស្សនកិច្ចរបស់លោក ពូទីន ទៅកាន់ប្រទេសកូរ៉េខាងជើង តាមការអញ្ជើញរបស់លោក គីម ជុងអ៊ុន នឹងប្រព្រឹត្តទៅ «នាពេលអនាគតដ៏ខ្លីខាងមុខ» ប៉ុន្តែ លោកបានបន្តថា មិនទាន់មានការឯកភាពគ្នានៅឡើយទេលើកាលបរិច្ឆេទជាក់លាក់សម្រាប់ដំណើរទស្សនកិច្ចរបស់មេដឹកនាំ។
គេមើលឃើញថា វានឹងក្លាយជាដំណើរទស្សនកិច្ចលើកដំបូងរបស់មេដឹកនាំរុស្ស៊ីទៅកាន់កូរ៉េខាងជើងក្នុងរយៈពេលជាង ២ ទសវត្សរ៍មកនេះ ខណៈដំណើរទស្សនកិច្ចរបស់លោក ពូទីន ចុងក្រោយ ធ្វើឡើងនៅឆ្នាំ ២០០០ ដោយលោកបានជួបជាមួយមេដឹកនាំកូរ៉េខាងជើងនាពេលនោះ គឺលោក គីម ជុងអ៊ីល ដែលជាឪពុករបស់លោក គីម ជុងអ៊ុន។
បើតាមលោក ប៉េស្កូវ លោក ពូទីន បានទទួលយកការអញ្ជើញរបស់លោក គីម នៅពេលមេដឹកនាំទាំង ២ បានជួបគ្នានៅប្រទេសរុស្ស៊ីសម្រាប់កិច្ចប្រជុំកំពូលមួយកាលពីខែកញ្ញាឆ្នាំមុន។ ប្រសិនបើប្រព្រឹត្តទៅមែននោះ ដំណើរទស្សនកិច្ចរបស់លោក ពូទីន នឹងធ្វើឡើងស្របពេលដែលសហរដ្ឋអាមេរិក និងសម្ព័ន្ធមិត្តបង្ហាញការព្រួយបារម្ភពីទំនាក់ទំនងកាន់តែស្អិតល្មួតរវាងប្រទេសទាំង ២ ដោយសហរដ្ឋអាមេរិកក៏ដូចជាកូរ៉េខាងត្បូងចោទទំនាក់ទំនងពួកគេថា បានធ្វើឱ្យកូរ៉េខាងជើងផ្តល់អាវុធឱ្យរុស្ស៊ីសម្រាប់ប្រើប្រាស់នៅសង្គ្រាមក្នុងប្រទេសអ៊ុយក្រែន ជាថ្នូរនឹងការទទួលបានកម្មវិធីអភិវឌ្ឍន៍និងធ្វើទំនើបកម្មសព្វាវុធជាពិសេសកម្មវិធីនុយក្លេអ៊ែរពីរុស្ស៊ី។
ទីភ្នាក់ងារព័ត៌មានមជ្ឈិមរបស់កូរ៉េខាងជើង KCNA បន្តរាយការណ៍ថា អំឡុងទស្សនកិច្ចរបស់លោកស្រី Choe កាលពីសប្ដាហ៍មុន រុស្ស៊ីបានថ្លែងអំណរគុណដល់កូរ៉េខាងជើង ចំពោះការគាំទ្រ និងសាមគ្គីភាពជាមួយរុស្ស៊ី ពាក់ព័ន្ធនឹងការឈ្លានពានអ៊ុយក្រែន ដែលរុស្ស៊ីហៅថាជា «ប្រតិបត្តិការយោធាពិសេស»។
ជាមួយគ្នានេះ សមភាគីទាំង ២ បានសម្តែងការព្រួយបារម្ភយ៉ាងខ្លាំងចំពោះទង្វើបង្កហេតុរបស់សហរដ្ឋអាមេរិក និងសម្ព័ន្ធមិត្ត ប្រឆាំងនឹងសិទ្ធិអធិបតេយ្យភាពរបស់កូរ៉េខាងជើង ខណៈមន្ត្រីប្រទេសទាំង ២ យល់ព្រមសហការក្នុងការដោះស្រាយស្ថានភាពក្នុងតំបន់អាស៊ីខាងកើតនោះ។
KCNA បន្តថា កិច្ចសហប្រតិបត្តិការរវាងរុស្ស៊ី និងកូរ៉េខាងជើង នឹងស្របតាមស្មារតីនៃធម្មនុញ្ញអង្គការសហប្រជាជាតិ និងច្បាប់អន្តរជាតិដទៃទៀត។
ការបង្កើនទំនាក់ទំនងរវាងលោក គីម និងលោក ពូទីន ក្នុងប៉ុន្មានឆ្នាំថ្មីៗនេះ រងការថ្កោលទោសពីសហរដ្ឋអាមេរិក និងសម្ព័ន្ធមិត្ត ដែលថា វារំលោភលើសេចក្ដីសម្រេចចិត្តជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិ។ កូរ៉េខាងជើងរងការចោទប្រកាន់ថា ជួយផ្គត់ផ្គង់អាវុធឱ្យរុស្ស៊ី ខណៈរុស្ស៊ីតែងនិយាយការពារក្រុងព្យុងយ៉ាងលើឆាកអន្តរជាតិពាក់ព័ន្ធនឹងកម្មវិធីនុយក្លេអ៊ែរ និងមីស៊ីលផ្លោងរបស់កូរ៉េខាងជើង៕
