រដ្ឋសមាជិកអឺរ៉ុប នឹងបើកកិច្ចប្រជុំនៅដើមខែកុម្ភៈរឿងជំនួយអ៊ុយក្រែន។ AFP
កាសែត Wall Street Journal ដ៏ល្បីល្បាញមានមូលដ្ឋាននៅសហរដ្ឋអាមេរិក បានរាយការណ៍ដោយដកស្រង់ឯកសារព្រាងមួយ ឱ្យដឹងថា សហភាពអឺរ៉ុបបានបង្កើតផែនការមួយដែលខ្លួនអាចផ្តល់មូលនិធិដែលមានតម្លៃជាង ២០ ពាន់លានអឺរ៉ូក្នុងរយៈពេល ៤ ឆ្នាំ ខាងមុខទៅឱ្យអាជ្ញាធរអ៊ុយក្រែន សម្រាប់ការគាំទ្រផ្នែកយោធា។
សំណើនេះបាននិយាយថា «ដោយសារការពឹងផ្អែករបស់អ៊ុយក្រែនលើការគាំទ្រពីខាងក្រៅ ជម្រើសដែលធ្វើឡើងដោយរដ្ឋសមាជិកសហភាពអឺរ៉ុប និងដៃគូក្នុងរយៈពេលខាងមុខនឹងអនុញ្ញាតឱ្យអ៊ុយក្រែនមានការរីកចម្រើនយ៉ាងពិតប្រាកដ ឬនឹងធ្វើឱ្យខូចដល់សមត្ថភាពទប់ទល់យ៉ាងធ្ងន់ធ្ងរ»។
សំណើថ្មីនេះអំពាវនាវឱ្យមានការបង្កើតមូលនិធិដែលនឹងប្រើប្រាស់ថវិកាចំនួន ៦,៥ ពាន់លានអឺរ៉ូពីមូលនិធិសន្តិភាពអឺរ៉ុបដែលបានបង្កើតឡើងក្នុងឆ្នាំ ២០២២ ទឹកប្រាក់ ៥ ពាន់លានអឺរ៉ូផ្សេងទៀតនឹងត្រូវបានផ្តល់ឥណទានពីឆ្នាំ ២០២៤ ដល់ឆ្នាំ ២០២៧។ មូលនិធិថ្មីនេះនឹងផ្តល់សំណងដល់បណ្តាប្រទេសសហភាពអឺរ៉ុបសម្រាប់ការចំណាយនៃការផ្តល់ជំនួយយោធាដល់អាជ្ញាធរអ៊ុយក្រែន។
ថវិកាដែលនៅសេសសល់ក្រៅពីនោះនឹងត្រូវចំណាយលើកម្មវិធីហ្វឹកហ្វឺនការប្រយុទ្ធ សម្រាប់យោធាអ៊ុយក្រែន។ នៅឆ្នាំនេះ គម្រោងផ្តល់សំណងដល់ទៅ ៧,៥ ពាន់លានអឺរ៉ូ ដល់បណ្តាប្រទេសសហភាពអឺរ៉ុប។
កាសែត Wall Street Journal សរសេរថា៖«មន្ត្រីសហភាពអឺរ៉ុបបាននិយាយថា រដ្ឋជាសមាជិកនឹងចាប់ផ្តើមការពិភាក្សាជាផ្លូវការអំពីផែនការនេះនៅប៉ុន្មាន ថ្ងៃខាងមុខ ហើយសំណើនេះទំនងជាត្រូវបានពិភាក្សាដោយមេដឹកនាំសហភាពអឺរ៉ុបនៅក្នុងកិច្ចប្រជុំកំពូលរបស់ពួកគេនៅថ្ងៃទី ១ ខែកុម្ភៈ។ ការសម្រេចចិត្តចុងក្រោយណាមួយទំនងជាត្រូវចំណាយពេលជាច្រើនសប្តាហ៍តទៅមុខទៀត»៕
