ថៃ និងចិន ក្នុងពិធីចុះហត្ថលេខាលើការលើកលែងទិដ្ឋាការទៅវិញទៅមក។ រូបថត AFP
ព្រះរាជាណាចក្រថៃ និងចិន ដែលជាប្រទេសមហាយក្សអាស៊ី បានព្រមព្រៀងគ្នាកាលពីថ្ងៃទី ២៨ ខែមករា ដើម្បីលើកលែងលក្ខខណ្ឌតម្រូវទិដ្ឋាការសម្រាប់ជនជាតិទាំង ២ ប្រទេសទៅវិញ-ទៅមក ដើម្បីសម្រួលដល់ការធ្វើដំណើរ និងទេសចរណ៍រវាងប្រទេសទាំង ២ ក្រោយការអនុវត្តការលើកលែងសាកល្បងកាលពីខែកញ្ញា ឆ្នាំមុន។
យោងការផ្សាយរបស់ទីភ្នាក់ងារព័ត៌មានរ៉យទ័រ រដ្ឋមន្ត្រីការបរទេសថៃ លោក Parnpree Bahiddhanukara និងសមភាគីចិនលោក Wang Yi បានចុះហត្ថលេខាលើការលើកលែងទិដ្ឋាការទៅវិញទៅមក ដែលចូលជាធរមាននៅថ្ងៃទី ១ ខែមីនា នៅក្នុងពិធីមួយបន្ទាប់ពីកិច្ចប្រជុំនៅទីក្រុងបាងកក។
លោក Wang Yi បានប្រាប់សន្និសីទសារព័ត៌មានរួមមួយថា៖ «យុគសម័យគ្មានទិដ្ឋាការនេះនឹងនាំមកនូវការផ្លាស់ប្តូររវាងប្រជាជន និងប្រជាជនទៅកាន់កម្ពស់ថ្មីមួយទៀត»។
ប្រទេសចិនគឺជាប្រភពដ៏សំខាន់សម្រាប់ឧស្សាហកម្មទេសចរណ៍របស់ប្រទេសថៃ ដែលជាកត្តាជំរុញដ៏សំខាន់នៃប្រទេសដែលមានសេដ្ឋកិច្ចធំបំផុតទី ២ របស់អាស៊ីអាគ្នេយ៍ មុនពេលជំងឺរាតត្បាត ប៉ុន្តែការវិលត្រឡប់នៃភ្ញៀវទេសចរចិនទៅកាន់ប្រទេសថៃវិញមានភាពយឺតយ៉ាវ។
ប្រទេសថៃ ក្រោយពីលោក សេដ្ឋា ថាវីស៊ីន ឡើងដឹកនាំរដ្ឋាភិបាលភ្លាម បានដាក់ឱ្យអនុវត្តការលើកលែងទិដ្ឋាការជាមួយប្រទេសចិន និងប្រទេសកាហ្សាក់ស្ថានមុនគេ កាលពីថ្ងៃទី ២៥ ខែកញ្ញា ហើយជាការកត់សម្គាល់ ភ្ញៀវទេសចរចិនជាច្រើនសម្រុកទៅប្រទេសថៃ ប៉ុន្តែចំនួនភ្ញៀវទេសចរចិនបានធ្លាក់ចុះវិញយ៉ាងខ្លាំងក្រោយមានអំពើឃាតកម្មបាញ់ប្រហារនៅផ្សារទំនើបក្នុងទីក្រុងបាងកកនៅដើមខែតុលា ឆ្នាំមុន បណ្តាលឱ្យទេសចរចិនម្នាក់បានស្លាប់ក្នុងចំណោមអ្នកស្លាប់ ៥ នាក់៕
