រ៉ុក្កែតអភិវឌ្ឍ ដោយក្រសួងការពារជាតិអ៊ីរ៉ង់នាំយកផ្កាយរណបទៅកាន់ទីអវកាស។ AFP
ប្រទេសអ៊ីរ៉ង់ ដែលប្រឈមសហរដ្ឋអាមេរិកខ្លាំងបំផុតនៅតំបន់មជ្ឈិមបូព៌ា បានបាញ់បង្ហោះផ្កាយរណបចំនួន ៣ ទៅកាន់ទីអវកាសដោយជោគជ័យ ដោយប្រើរ៉ុក្កែតដែលធ្លាប់បរាជ័យជាច្រើនលើក នាពេលកន្លងមក។ យោងសេចក្តីរាយការណ៍របស់ទីភ្នាក់ងារសារព័ត៌មាន AP របស់សហរដ្ឋអាមេរិក។
ការបាញ់បង្ហោះនេះ ធ្វើឡើងចំពេលដែលភាពតានតឹងក្នុងតំបន់កើនឡើង ក្រោមបរិបទនៃសង្គ្រាមបោសសម្អាតក្រុមប្រដាប់អាវុធហាម៉ាស់នៅហ្គាហ្សារបស់អ៊ីស្រាអែល ដែលបង្កជាការភ័យខ្លាចថា សង្គ្រាមទូទាំងតំបន់មជ្ឈិមបូព៌ានេះនឹងផ្ទុះឡើង។
ក្នុងវីដេអូដែលចេញផ្សាយដោយទូរទស្សន៍រដ្ឋអ៊ីរ៉ង់ គេអាចមើលឃើញពីការបាញ់បង្ហោះផ្កាយរណបនាពេលយប់ តាមរយៈរ៉ុក្កែត Simorgh ចេញពីទីបាញ់បង្ហោះយានអវកាស Imam Khomeini ក្នុងខេត្ត Semnan របស់អ៊ីរ៉ង់។
បើតាមទូរទស្សន៍រដ្ឋដដែល ផ្កាយរណបទាំង ៣ ដែលត្រូវបានបាញ់បង្ហោះមានឈ្មោះ Mahda Kayhan-2 និង Hatef-1។ ផ្កាយរណប Mahda គឺជាផ្កាយរណបស្រាវជ្រាវ ខណៈផ្កាយរណប Kayhan និង Hatef គឺជាផ្កាយរណបណាណូ (ផ្កាយរណបខ្នាតតូចល្អិត) ដែលផ្តោតលើសេវាទំនាក់ទំនងសកល។
លោក Isa Zarepour រដ្ឋមន្ត្រីបច្ចេកវិទ្យាព័ត៌មាន និងទំនាក់ទំនងរបស់អ៊ីរ៉ង់ បាននិយាយថា ផ្កាយរណេប Mahda បានចាប់ផ្ដើមបញ្ជូនសញ្ញាត្រឡប់មកផែនដីវិញហើយ។
ការបាញ់បង្ហោះផ្កាយរណបតាមរយៈរ៉ុក្កែត Simorgh បានបរាជ័យ ៥ ដងរួចមកហើយ មុនការបាញ់បង្ហោះចុងក្រោយ ដែលការបរាជ័យទាំងនោះ ត្រូវបានគេមើលឃើញថាជាផ្នែកមួយនៃការបរាជ័យកម្មវិធីអវកាសស៊ីវិលជាបន្តបន្ទាប់របស់អ៊ីរ៉ង់ក្នុងរយៈពេលប៉ុន្មានឆ្នាំចុងក្រោយនេះ។
ការវាយតម្លៃការគំរាមកំហែងទូទាំងពិភពលោកឆ្នាំ ២០២៣ របស់សហគមន៍ស៊ើបការណ៍សម្ងាត់អាមេរិក បាននិយាយថា ការអភិវឌ្ឍយានបាញ់បង្ហោះផ្កាយរណប បង្ហាញពីសញ្ញាថា អ៊ីរ៉ង់ឈានកាន់តែកៀកទៅរកការអភិវឌ្ឍមីស៊ីលផ្លោងអន្តរទ្វីប ដោយសារវាប្រើប្រាស់បច្ចេកវិទ្យាស្រដៀងគ្នា។
របាយការណ៍នោះ បានលើកឡើងជាពិសេសអំពី Simorgh ថា ជារ៉ុក្កែត ដែលអាចប្រើបានទាំងផ្នែកស៊ីវិល និងវិស័យយោធា។
កន្លងមក សហរដ្ឋអាមេរិកធ្លាប់បាននិយាយថា ការបាញ់បង្ហោះផ្កាយរណបរបស់អ៊ីរ៉ង់ ប្រឆាំងនឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងបានអំពាវនាវឱ្យទីក្រុងតេអេរ៉ង់មិនធ្វើសកម្មភាពពាក់ព័ន្ធនឹងមីស៊ីលផ្លោង ដែលអាចដាក់អាវុធនុយក្លេអ៊ែរ។ ទណ្ឌកម្មរបស់អង្គការសហប្រជាជាតិទាក់ទងនឹងកម្មវិធីមីស៊ីល ផ្លោងរបស់អ៊ីរ៉ង់ បានផុតកំណត់កាលពីខែតុលា ឆ្នាំមុន។
កាលពីថ្ងៃសុក្រ ប្រទេសបារាំង អាល្លឺម៉ង់ និងចក្រភពអង់គ្លេស បានចេញសេចក្ដីថ្លែងការរណ៍ថ្កោលទោសការបាញ់បង្ហោះផ្កាយរណបមួយរបស់អ៊ីរ៉ង់ កាលពីថ្ងៃទី ២០ ខែមករា ដោយអះអាងស្រដៀងគ្នាថា វាមានសមត្ថភាពជួយអ៊ីរ៉ង់ក្នុងការអភិវឌ្ឍមីស៊ីលផ្លោងរយៈចម្ងាយឆ្ងាយ៕
