លោក មាឆៀស ដែលមានឈ្មោះហៅក្រៅថា«Fito» រងការកាត់ទោសក្នុងឆ្នាំ ២០១១ និងកាត់ទោស៣៤ឆ្នាំ ពេលនេះគេចខ្លួនពីគុក។ AFP
ទីភ្នាក់ងារសារព័ត៌មានរ៉យទ័រ បានរាយការណ៍ថា មេក្លោងដ៏ធំបំផុតនៃក្រុមឧក្រិដ្ឋជន ឡូស ឆនណឺរ៉ឺស (Los Choneros) របស់ប្រទេសអេក្វាទ័រ បានបាត់ខ្លួនចេញពីគុក ហើយក្រុមអាជ្ញាធររបស់ប្រទេសនៅតំបន់អាមេរិកខាងត្បូងនេះកំពុងប្រតិបត្តិការស្វែងរកនាពេលនេះ។
មេបញ្ជាការប៉ូលិសជាតិអេក្វាទ័រ លោក Cesar Zapata បានប្រាប់សន្និសីទសារព័ត៌មាន កាលពីថ្ងៃអាទិត្យថា កងកម្លាំងប្រដាប់អាវុធរបស់ប្រទេសរបស់លោកបានកំណត់ថាអ្នកទោសម្នាក់នៅក្នុងពន្ធនាគារ Guayaquil បានបាត់ខ្លួន។
លោក Zapata មិនបានបង្ហាញឈ្មោះអ្នកទោសនោះទេ ប៉ុន្តែការិយាល័យរដ្ឋអាជ្ញាអេក្វាទ័របាននិយាយថា ខ្លួននឹងស៊ើបអង្កេតការរត់គេចខ្លួនរបស់លោក ចូស អាដុលហ្វូ មាឆៀស (Jose Adolfo Macias) ដែលជាមេដឹកនាំក្រុមឡស ឆនណឺរ៉ឺស។
ចំណែកឯអ្នកនាំពាក្យរបស់ប្រធានាធិបតីអេក្វាទ័រ បាននិយាយក្នុងសន្និសីទកាសែតថា ប្រតិបត្តិការស្វែងរក លោក មាឆៀស ដែលជា «អ្នកទោសដែលគេចង់បានខ្លួនខ្លាំងជាទីបំផុតនាពេលនេះ» ចូលរួមដោយក្រុមអាជ្ញាធរអនុវត្តច្បាប់ជាង ៣ ០០០ នាក់។
លោក មាឆៀស ដែលមានឈ្មោះហៅក្រៅថា «Fito» រងការកាត់ទោសក្នុងឆ្នាំ ២០១១ ឱ្យជាប់គុក ៣៤ ឆ្នាំ ពីបទឧក្រិដ្ឋកម្មផ្សេងៗរួមទាំងការជួញដូរគ្រឿងញៀន និងឃាតកម្ម។
ក្រុមឧក្រិដ្ឋជន ឡស ឆនណឺរ៉ឺស របស់លោក គឺជាអង្គការឧក្រិដ្ឋជនដែលមានទំនាក់ទំនងជាមួយការជំរិតទារប្រាក់ ឃាតកម្ម និងការជួញដូរគ្រឿងញៀន ក្នុងចំណោមឧក្រិដ្ឋកម្មផ្សេងៗទៀត ហើយត្រូវបានចោទប្រកាន់ពីបទគ្រប់គ្រងគុកសំខាន់ៗរបស់អេក្វាទ័រ។
ក្រុមឧក្រិដ្ឋជនដែលជាគូប្រជែងនឹងគ្នា បានប៉ះទង្គិចគ្នាជាញឹកញាប់នៅក្នុងគុកដែលមានអ្នកទោសច្រើនកកកុញរបស់ប្រទេសអេក្វាទ័រ ហើយតួលេខផ្លូវការបង្ហាញថា អ្នកទោសជាង ៤០០ នាក់ បានស្លាប់ដោយសារតែការប៉ះទង្គិចគ្នាចាប់តាំងពីឆ្នាំ ២០២១ មក៕
