យន្តហោះរបស់ក្រុមហ៊ុនអាកាសចរណ៍ អាឡាស្កា អ៊ែរឡាញស៍ ចតនៅព្រលានយន្តហោះ Los Angeles។
ក្រុមហ៊ុនអាកាសចរណ៍ អាឡាស្កា អ៊ែរឡាញស៍ (Alaska Airlines) បានឱ្យដឹងថា ខ្លួនបានលុបជើងហោះហើរចំនួន ១៧០ ជើង កាលពីថ្ងៃអាទិត្យ និង៦០ ជើងទៀតនៅថ្ងៃចន្ទនេះ បន្ទាប់ពីរដ្ឋបាលអាកាសចរណ៍សហព័ន្ធអាមេរិក (FAA) បានបញ្ជាឱ្យផ្អាកការហោះហើរនៃធុនយន្តហោះប៊ូអ៊ីង737 MAX 9 ចំនួន ១៧១ គ្រឿង ដើម្បីដំណើរការត្រួតពិនិត្យសុវត្ថិភាព។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
ក្រុមហ៊ុនអាកាសចរណ៍ដដែល បាននិយាយថា ការលុបជើងហោះហើរនឹងអាចបន្តចូលទៅសប្ដាហ៍ក្រោយទៀត ខណៈវាបានប៉ះពាល់ដល់ភ្ញៀវអ្នកដំណើរជិត ២៥ ០០០ នាក់កាលពីថ្ងៃអាទិត្យ។ យ៉ាងណាមិញ ក្រុមហ៊ុននៅតែបន្តប្រតិបត្តិការជើងហោះហើរ ដោយយន្តហោះធុនផ្សេងទៀត។
កាលពីថ្ងៃសៅរ៍ FAA បានបញ្ជាឱ្យផ្អាកការហោះហើយរជាបណ្តោះអាសន្ននូវធុនយន្តហោះប៊ូអ៊ីង737 MAX 9 ចំនួន ១៧១ គ្រឿង ដែលកំពុងប្រតិបត្តិការទូទាំងពិភពលោក។
វិធានការនេះ ដាក់ចេញឡើងក្រោយយន្តហោះ737 MAX 9 មួយគ្រឿងរបស់ Alaska Airlines បានបង្ខំចុះចតដោយសារតែបង្អួចខាងឆ្វេងនៃតួយន្តហោះបានរបើកដាច់ទៅតាមខ្យល់ ពេលកំពុងហោះហើរចេញពីក្រុងផតឡែនដ៍ នៃរដ្ឋអូរីហ្គែន ឆ្ពោះទៅក្រុងអនថារីយ៉ូ នៃរដ្ឋកាលីហ្វ័រនីញ៉ា កាលពីថ្ងៃសុក្រ។ អ្នកបើកយន្តហោះ បានបង្ខំត្រឡប់ចុះចតវិញដោយសុវត្ថិភាព ជាមួយនឹងអ្នកដំណើរ ១៧១ នាក់ និងក្រុមការងារលើយន្តហោះ ៦ នាក់ផ្សេងទៀត។
អ្នកនាំពាក្យ FAAបាននិយាយកាលពីថ្ងៃអាទិត្យថា ក្រុមហ៊ុនអាកាសចរណ៍នានា អាចប្រតិបត្តិការហោះហើរយន្តហោះម៉ាក 737 MAX 9 ឡើងវិញ ទាល់តែ FAA បញ្ជាក់ថា វាមានសុវត្ថិភាពគ្រប់គ្រាន់។
នៅសហរដ្ឋអាមេរិក មានតែក្រុមហ៊ុន Alaska Airlines និងក្រុមហ៊ុនអាកាសចរណ៍ យូណាយធីដ អ៊ែរឡាញស៍ (United Airlines) ប៉ុណ្ណោះ ដែលប្រើប្រាស់យន្តហោះប៊ូអ៊ីង 737 Max 9 ។ ក្រុមហ៊ុន Alaska Airlinesមានយន្តហោះ 737 Max 9 ចំនួន ៦៥ គ្រឿង ហើយក្រុមហ៊ុន United Airlines មាន ៧៩ គ្រឿង៕
