ប្រធានាធិបតី Mohamed Muizzu នឹងធ្វើទស្សនកិច្ចទៅកាន់ប្រទេសចិន រវាងថ្ងៃទី៨ ដល់ថ្ងៃទី១២ ខែមករានេះ។ AFP
រដ្ឋាភិបាលប្រទេសដែនកោះម៉ាល់ឌីវ នៅក្នុងមហាសមុទ្រឥណ្ឌា បានផ្អាកតួនាទីមន្ត្រីជាន់ខ្ពស់របស់រដ្ឋាភិបាល ៣ រូប ចំពោះសារក្នុងបណ្តាញសង្គម ដែលធ្វើឱ្យប៉ះពាល់ដល់នាយករដ្ឋមន្ត្រីឥណ្ឌា ខណៈពេលដែលប្រទេសទាំង២ធ្លាក់ចុះចំណងទំនាក់ទំនង ដោយសារប្រទេសម៉ាល់ឌីវកែប្រែគោលនយោបាយការបរទេស និងទំនងងាកទៅរកមហាយក្សចិន។
ប្រទេសម៉ាល់ឌីវដែលល្បីល្បាញដោយសារការអភិវឌ្ឍដែនកោះទៅជារមណីយដ្ឋានប្រណីតៗ និងទាក់ទាញទេសចរលំដាប់ខ្ពស់ទៅទស្សនា។
ទីភ្នាក់ងារព័ត៌មានរ៉យទ័រ បានដកស្រង់សម្តីមន្ត្រីរដ្ឋាភិបាលជាន់ខ្ពស់ ដែលនិយាយថា មន្ត្រីជាន់ខ្ពស់៣រូបនោះ រួមមាន អ្នកនាង MalshaShareef អ្នកនាង MariyamShiuna និងលោក Mr Abdulla Mahzoom Majid ធ្វើការឱ្យក្រសួងអំណាចយុវជន ព័ត៌មាន និងសិល្បៈ និង បានប្រព្រឹត្តប្រាសចាកក្រមសីលធម៌ចំពោះការអត្ថាធិប្បាយរបស់ពួកគេលើបណ្តាញសង្គម។
សារបន្តុះបង្អាប់របស់មន្ត្រីទាំង៣រូបនោះ បានដៅនាយករដ្ឋមន្ត្រីឥណ្ឌា Narendra Modi ដោយហៅនាយករដ្ឋមន្ត្រីឥណ្ឌាថា ជា «ត្លុក ជាភេរវករ និងជាអាយ៉ងរបស់អ៊ីស្រាអែល» លើបណ្តាញសង្គម X ឆ្លើយតបចំពោះវីដេអូ ដែលលោកនាយករដ្ឋមន្ត្រីទស្សនាកោះ Lakshadweep របស់ឥណ្ឌាដើម្បីលើកកម្ពស់ទេសចរណ៍ក្នុងស្រុក។
អ្នកខ្លះមើលឃើញថា ការបំពេញទស្សនកិច្ចរបស់នាយករដ្ឋមន្ត្រីឥណ្ឌាទៅកាន់កោះនោះ ជាមធ្យោបាយព្យាយាមទាក់ទាញទេសចរងាកចេញពីប្រទេសម៉ាល់ឌីវដ៏ល្បីល្បាញជាសកលនោះ ដែលកោះចំនួន១១៩២ ក្នុងមហាសមុទ្រឥណ្ឌាត្រូវបានអភិវឌ្ឍជាមួយរមណីយដ្ឋានប្រណីតៗជាច្រើន។
ប្រភពស្និទ្ធនឹងរឿងនេះបានប្រាប់រ៉យទ័រថា ឧត្តមស្នងការឥណ្ឌាក្នុងប្រទេសម៉ាល់ឌីវ បានលើកឡើងនិងបង្ហាញក្តីកង្វល់ជុំវិញការអត្ថាធិប្បាយ។
ភាពចម្រូងចម្រាសកើតឡើងនៅមុនទស្សនកិច្ចដោយប្រធានាធិបតី Mohamed Muizzu ទៅកាន់ប្រទេសចិនរវាងថ្ងៃទី៨ដល់ថ្ងៃទី១២ខែមករានេះ។ លោក Muizzu បានឈ្នះការបោះឆ្នោតក្នុងឆ្នាំ២០២៣ ដោយសន្យាបញ្ចប់គោលនយោបាយ «ឥណ្ឌាទី១» “India first” របស់ប្រទេសកោះម៉ាល់ឌីវ នៅក្នុងតំបន់ដែលទីក្រុងញូវដែលី និងទីក្រុងប៉េកាំង ប្រកួតប្រជែងឥទ្ធិពល។
លោក Muizzuក៏បានសន្យាថានឹងដកបុគ្គលិកយោធាឥណ្ឌាចំនួន ៧៥ នាក់ចេញពីប្រទេសដែលមានប្រជាជនជាងកន្លះលាននាក់៕
