លោក Valery Zaluzhny អគ្គមេបញ្ជាការកងទ័ពអ៊ុយក្រែនដែលគេជឿថា ត្រូវដកហូតដំណែង។ AFP
ប្រមុខកងទ័ពអ៊ុយក្រែន លោក Valery Zaluzhny ត្រូវបានគេរាយការណ៍ថា ត្រូវបានបណ្តេញចេញពីតំណែងតាំងពីថ្ងៃចន្ទមកម្ល៉េះ ប៉ុន្តែមិនទាន់មានសេចក្តីប្រកាសជាផ្លូវការនៅឡើយ។
បណ្តាញទូរទស្សន៍ខ្សែកាប CNN របស់អាមេរិក បានដកស្រង់សម្តីប្រភព២រូប ដែលដឹងរឿងនេះ ដោយអះអាងថា លោក Valery Zaluzhny ដែលជាមេទ័ពដ៏មានប្រជាប្រិយរបស់អ៊ុយក្រែន ត្រូវបានកោះហៅឱ្យចូលរួមកិច្ចប្រជុំមួយនៅការិយាល័យប្រធានាធិបតីកាលពីថ្ងៃចន្ទ ហើយប្រាប់ថារូបលោកត្រូវបានបណ្តេញចេញ។
សេចក្តីរាយការណ៍របស់ Financial Times ដែលបានរាយការណ៍កាលពីថ្ងៃទី៣០ខែមករា ក៏បានអះអាងពីការបណ្តេញចេញពីតួនាទីមេបញ្ជាការកងទ័ពអ៊ុយក្រែនដែរ ហើយលោកត្រូវបានប្រគល់តួនាទីជាទីប្រឹក្សាក្រសួងការពារជាតិវិញ។
ទោះបីជាយ៉ាងណា មានប្រភពចំនួន ៤ ដែល Financial Times រាយការណ៍អះអាងថា លោកមេទ័ព Valery Zaluzhny បានបដិសេធទទួលយកបែបនោះ។
តាមសេចក្តីរាយការណ៍នោះ ប្រភព២ បានបញ្ជាក់ថា ប្រធានាធិបតី អ៊ុយក្រែន លោកវ៉ូឡូឌីមៀរ ហ្សេឡេនស្គី បានបញ្ជាក់ទៅលោក Zaluzhny ថា មិនថាតួនាទីអ្វីដែលគាត់ព្រមទទួលទេ ប៉ុន្តែគាត់ត្រូវបានដកចេញពីតួនាទីប្រមុខកងទ័ព។
ប្រភពប្រាប់ CNN វិញបានលើកឡើងថា ក្រឹត្យប្រធានាធិបតីត្រូវបានរំពឹងទុកនៅចុងសប្តាហ៍នេះ ដែលនេះនឹងក្លាយជាការរង្គោះរង្គើយោធាដ៏ធំបំផុតដែលលោកប្រធានាធិបតី ហ្សេឡេនស្គីបានធ្វើ។
ភាពតានតឹងត្រូវបានគេនិយាយថាបានកើនឡើងជាពិសេសនៅពេលដែល មេទ័ពអ៊ុយក្រែន លោក Zaluzhny បានពណ៌នាសង្គ្រាមជាមួយរុស្ស៊ីថា«ជាភាពទាល់ច្រក» នៅក្នុងបទសម្ភាសន៍ និងអត្ថបទជាមួយទស្សនាវដ្តី The Economist ដែលចេញផ្សាយកាលពីខែវិច្ឆិកា។
កាលពីថ្ងៃចន្ទ អ្នកនាំពាក្យប្រធានាធិបតី លោក Serhiy Nykyforov បានប្រាប់ CNN និងអ្នកផ្សេងទៀតថា ពាក្យចចាមអារ៉ាមអំពីការបណ្តេញចេញរបស់មេទ័ពគឺមិនពិតទេ។
ក្រសួងការពារជាតិអ៊ុយក្រែនក៏បានបង្ហោះសារនៅលើបណ្តាញទំនាក់ទំនងសង្គមរបស់ខ្លួនដែលសរសេរថា «អ្នកសារព័ត៌មានជាទីគោរព ចម្លើយភ្លាមៗទៅកាន់អ្នកគ្រប់គ្នា គឺថា «ទេ នេះមិនមែនជាការពិតទេ»។
ប៉ុន្តែយោងតាមប្រភពមួយ នៅឯការជួបជុំតូចមួយនៅការិយាល័យប្រធានាធិបតីកាលពីថ្ងៃចន្ទ ក៏មានការចូលរួមដោយរដ្ឋមន្ត្រីការពារជាតិ លោក Rustem Umerov ផងដែរនោះ ប្រធានាធិបតីបានប្រកាសថាគាត់៖ «បានធ្វើការសម្រេចចិត្តបណ្តេញអគ្គមេបញ្ជាការនៃកងកម្លាំងប្រដាប់អាវុធ»។ ព័ត៌មាននេះគឺស្របតាមរបាយការណ៍ផ្សេងទៀត រួមទាំងនៅក្នុងកាសែត Washington Post និង Financial Times ផងដែរ៕
