អ្នកជំនាញ UN ស៊ើបអង្កេតលើការវាយប្រហារតាមអ៊ីនធឺណិត ៥៨ ករណី ដោយសង្ស័យថាមកពីកូរ៉េខាងជើង។ AFP
អ្នកជំនាញរបស់អង្គការសហប្រជាជាតិ បានឱ្យដឹងថា ខ្លួនកំពុងស៊ើបអង្កេតការវាយប្រហារតាមអ៊ិនធឺណិត ដែលសង្ស័យថា កូរ៉េខាងជើងជាអ្នកធ្វើចំនួន ៥៨ ករណី ចន្លោះពីឆ្នាំ២០១៧ ដល់ឆ្នាំ២០២៣ ដែលធ្វើឱ្យបាត់បង់សរុបជាទឹកប្រាក់ប្រហែល ៣ពាន់លានដុល្លារ។
ក្រុមអ្នកជំនាញបានឱ្យដឹងយ៉ាងដូច្នេះ នៅក្នុងសេចក្តីសង្ខេបប្រតិបត្តិនៃរបាយការណ៍ថ្មីមួយ ទៅកាន់ក្រុមប្រឹក្សាសន្តិសុខអង្គការសហប្រជាជាតិ ដែលទីភ្នាក់ងារសារព័ត៌មាន AP បានឃើញកាលពីថ្ងៃសុក្រ។
អ្នកជំនាញនិយាយថា ប្រាក់ដែលប្រមូលបានពីការវាយប្រហារតាមអ៊ិនធឺណិត ត្រូវបានកូរ៉េខាងជើង យកទៅប្រើប្រាស់ដើម្បីជួយផ្តល់មូលនិធិដល់ការអភិវឌ្ឍអាវុធប្រល័យលោក។
មិនត្រឹមតែប៉ុណ្ណេះ ការវាយប្រហារតាមអ៊ិនធឺណិតយ៉ាងច្រើនពីក្រុមជនអនាមិក (ហ៊ែកឃើរ) របស់កូរ៉េខាងជើង ត្រូវមានការជូនដំណឹងទៅការិយាល័យត្រួតពិនិត្យទូទៅ (RGB) ដែលជាអង្គភាពចារកម្មបរទេសចម្បងរបស់កូរ៉េខាងជើង ហើយការណ៍នេះ នៅតែបន្តកើតឡើង។
ជុំវិញការណ៍នេះ កូរ៉េខាងជើងមិនបានឆ្លើយតបយ៉ាងណាភ្លាមនោះទេ ប៉ុន្តែកន្លងមក ប្រទេសនេះបានច្រានចោលការជាប់ពាក់ព័ន្ធណាមួយទៅនឹងការធ្វើការវាយប្រហារតាមអ៊ិនធឺណិត។
ក្នុងរបាយការណ៍ថ្មីដដែល អ្នកជំនាញក៏បានលើកឡើងផងដែរថា ចំពេលមានភាពតានតឹងផ្នែកយោធា និងនយោបាយកើនឡើងនៅលើឧបទ្វីបកូរ៉េ កូរ៉េខាងជើងនៅតែបន្តប្រឆាំងនឹងទណ្ឌកម្មរបស់អង្គការសហប្រជាជាតិ ហើយបន្តអភិវឌ្ឍអាវុធនុយក្លេអែររបស់ខ្លួនបន្ថែមទៀត។
របាយការណ៍ដដែលរំពឹងថានឹងចេញផ្សាយជាសាធារណៈនៅចុងខែនេះ ឬដើមខែក្រោយ ខណៈមេដឹកនាំកូរ៉េខាងជើង លោក គីម ជុងអ៊ុន បានបង្កើនភាពតានតឹងនៅក្នុងតំបន់។
លោកកំពុងគំរាមកំហែងថា នឹងកម្ទេចប្រទេសកូរ៉េខាងត្បូង ប្រសិនបើមានការបង្កហេតុណាមួយកើតឡើង។ ជាការឆ្លើយតប សហរដ្ឋអាមេរិក កូរ៉េខាងត្បូង និងជប៉ុន បានពង្រឹងសមយុទ្ធយោធារួមគ្នារបស់ពួកគេ៕
