ប្រធានាធិបតីអាមេរិក លោក ចូ បៃដិន និងអតីតប្រធានាធិបតីលោក ដូណាល់ ត្រាំ។ AFP
ប្រធានាធិបតីអាមេរិក លោក ចូ បៃដិន ដែលមិនសម្រេចបំណងក្នុងការផ្តល់ជំនួយដល់សម្ព័ន្ធមិត្តអ៊ុយក្រែន ដែលកំពុងជាប់ដៃក្នុងសង្គ្រាមជាមួយមហាអំណាចរុស្ស៊ី បានរិះគន់លោក ដូណាល់ ត្រាំ ដែលជាអតីតគូប្រជែងតំណែងកំពូល និងអាចជាគូប្រជែងដ៏មានសក្តានុពលក្នុងតំណែងប្រធានាធិបតីដែលលើកទឹកចិត្តឱ្យរុស្ស៊ីវាយប្រហារសមាជិកណាតូដែលមិនចំណាយមូលនិធិគ្រប់គ្រាន់ក្នុងវិស័យការពារជាតិ។
ថ្លែងពីវិមានប្រធានាធិបតីនៅថ្ងៃទី១៣ កុម្ភៈ ក្រោយព្រឹទ្ធសភាអនុម័តសេចក្តីព្រាងច្បាប់ផ្តល់ជំនួយដល់អ៊ុយក្រែនក្រោយជាប់គាំងច្រើនខែ លោក ចូ បៃដិន បានរិះគន់លោក ដូណាល់ ត្រាំ បន្ទាប់ពីអតីតប្រធានាធិបតីមួយអាណត្តិបានលើកទឹកចិត្តរុស្ស៊ីឱ្យវាយប្រហារសមាជិកណាតូដែលមិនបានទទួលការប្តេជ្ញាចិត្តផ្នែកហិរញ្ញវត្ថុ។
លោក ចូ បៃដិន បាននិយាយដោយសំដៅទៅលើលោក ដូណាល់ ត្រាំ ដែលត្រូវបានចោទប្រកាន់២លើកក្នុង១អាណត្តិរបស់លោក ចំពោះការរំលោភអំណាចសាធារណៈ ដោយនិយាយថា៖«សម្រាប់បុព្វហេតុព្រះជាម្ចាស់ វាជាភាពល្ងង់ខ្លៅ។ វាគួរឱ្យខ្មាស់អៀន។ វាមានគ្រោះថ្នាក់។ វាមិនមែនជាជនជាតិអាមេរិកទេ។»
ដោយសំដៅលើការនិយាយរបស់លោក ត្រាំ ដែលមើលឃើញភាពមិនចាំបាច់ក្នុងការការពារសម្ព័ន្ធមិត្តណាតូនៅតំបន់អឺរ៉ុប លោក ចូ បៃដិន បាននិយាយថា៖«គ្មានប្រធានាធិបតីណាផ្សេងទៀតក្នុងប្រវត្តិសាស្ត្ររបស់យើង ដែលធ្លាប់ឱនក្បាលដល់មេដឹកនាំផ្តាច់ការរុស្ស៊ីទេ»។
ជំនួយរបស់សហរដ្ឋអាមេរិកដល់អ៊ុយក្រែនត្រូវបានរារាំងអស់ជាច្រើនខែដោយសារភាពចលាចលនៅក្នុងសភា ទោះបីជាទីក្រុងកៀវសុំជំនួយដើម្បីទប់ទល់នឹងការកើនឡើងនៃការវាយប្រហាររបស់រុស្ស៊ីក៏ដោយ។
កញ្ចប់ថវិកាព្រឹទ្ធសភាចំនួន៩៥ពាន់លានដុល្លារ រួមមានការផ្តល់មូលនិធិសម្រាប់យោធារបស់អ៊ីស្រាអែល និងសម្រាប់តៃវ៉ាន់ ប៉ុន្តែចំណែកធំ ដែលមានចំនួន៦០ពាន់លានដុល្លារ នឹងជួយអ៊ុយក្រែនឡើងវិញនូវការផ្គត់ផ្គង់គ្រាប់រំសេវ អាវុធ និងតម្រូវការសំខាន់ៗផ្សេងទៀត៕
