លោក ថាក់ស៊ីន ស៊ីណាវ៉ាត្រា លើកដៃដាក់អ្នកគាំទ្រ មុនពេលនាំទៅឃុំខ្លួន។ AFP
នាយករដ្ឋមន្ត្រីថៃលោក សេដ្ឋា ថាវីស៊ីន (SretthaThavisin) នៅថ្ងៃទី ១៣ ខែកុម្ភៈ ឆ្នាំ ២០២៤ បានប្រកាសថា លោក ថាក់ស៊ីន ស៊ីណាវ៉ាត្រា (Thaksin Shinawatra) នឹងត្រូវបានដោះលែងឱ្យនៅក្រៅឃុំជាផ្លូវការហើយ បន្ទាប់ពីលោកបានសម្រាកព្យាបាលនៅមន្ទីរពេទ្យប៉ូលិសខេត្តអស់រយៈពេល ៦ ខែ។ លោក សេដ្ឋា ក៏បានសម្ដែងការគោរព និងទទួលស្គាល់ចំពោះការរួមចំណែកដឹកនាំប្រទេសថៃរបស់លោក ថាក់ស៊ីន ផងដែរ។
លោក ថាក់ស៊ីន ជាមហាសេដ្ឋីដ៏លេចធ្លោ និងធ្លាប់ជានាយករដ្ឋមន្ដ្រីដ៏ល្បី ១ រូបផងដែរនៅប្រទេសថៃ។ លោកបានវិលត្រឡប់ចូលមាតុប្រទេសវិញ បន្ទាប់ពីចំណាយពេលនិរទេសខ្លួន ១៥ ឆ្នាំនៅក្រៅប្រទេស ដើម្បីគេចចេញពីការជាប់ពន្ធនាគារដោយសារជម្លោះផលប្រយោជន៍។
តុលាការថៃបានកាត់ទោសលោកឱ្យជាប់ពន្ធនាគាររយៈពេល ៨ ឆ្នាំ ប៉ុន្តែព្រះមហាក្សត្រថៃបានបន្ធូរបន្ថយទោសមកនៅត្រឹមតែ ១ ឆ្នាំប៉ុណ្ណោះ។ ឥស្សរជននយោបាយវ័យ ៧៤ ឆ្នាំរូបនេះ បានចំណាយពេល ៦ ខែ ក្នុងការឃុំខ្លួននៅឯមន្ទីរពេទ្យប៉ូលិសខេត្ត ដោយសារតែមានបញ្ហាសុខភាពធ្ងន់ធ្ងរ។ ទោះយ៉ាងណា ស្ថានភាពពិតប្រាកដនៃសុខភាព របស់លោកមិនដែលបានបង្ហាញជាសាធារណៈឡើយ ហើយលោកក៏មិនដែលបានជាប់ឃុំនៅក្នុងពន្ធនាគារដែរ។
លោក សេដ្ឋា ថាវីស៊ីន ដែលជាសម្ព័ន្ធមិត្តរបស់គ្រួសារស៊ីណាវ៉ាត្រា និងជាមហាសេដ្ឋី ១ រូបផងដែរនោះ បានបញ្ជាក់ប្រាប់អ្នកសារព័ត៌មានថា ៖ «លោកថាក់ស៊ីន ត្រូវបានដោះលែងឱ្យនៅក្រៅឃុំជាផ្លូវការ ស្របតាមច្បាប់របស់នាយកដ្ឋានពន្ធនាគារ»។
លោក សេដ្ឋា បានបន្ថែមថា៖ «លោក ថាក់ស៊ីន ធ្លាប់ជាអតីតនាយករដ្ឋមន្ត្រីដែលបានរួមចំណែកកសាងប្រទេសថៃអស់រយៈពេលជាច្រើនឆ្នាំ។ បន្ទាប់ពីការដោះលែងគាត់ នោះគាត់នឹងក្លាយទៅជាពលរដ្ឋធម្មតាម្នាក់ប៉ុណ្ណោះ»។
លោក ថាក់ស៊ីន ស្ថិតនៅក្នុងចំណោមអ្នកទោសចំនួន ៩៣០ នាក់ ដែលចាត់ទុកថាជាមនុស្សចាស់ ឬមនុស្សមានជំងឺ និងដែលត្រូវបានអនុម័តឱ្យនៅក្រៅឃុំ នេះបើយោងតាមការរាយការណ៍ដោយប្រព័ន្ធផ្សព្វផ្សាយក្នុងស្រុកថៃ។
លោកអាចនឹងត្រូវបានដោះលែងបន្ទាប់ពីថ្ងៃទី ១៨ ខែកុម្ភៈ។ នេះបើយោងតាមការសម្រេចរបស់នាយកដ្ឋានពន្ធនាគារ។ ប៉ុន្តែ មេធាវីរបស់លោក ថាក់ស៊ីន គឺលោក វីនយ៉ាត ឆាតមន្ទ្រី (Winyat Chatmontri) មិនទាន់បានទទួលកាលបរិច្ឆេទដោះលែងជាក់លាក់នៅឡើយទេ។ ដូច្នេះ ខ្លឹមសារលម្អិតនៃសេចក្ដីសម្រេចដោះលែង នៅមិនទាន់ចេញផ្សាយនៅឡើយទេ ប៉ុន្តែលោកអាចប្រឈមមុខនឹងការតាមដានឃ្លាំមើលពីអាជ្ញាធរ និងហាមមិនឱ្យធ្វើដំណើរចេញក្រៅប្រទេស។
កូនស្រីរបស់លោកថាក់ស៊ីន គឺលោកស្រី ភែថងថាន ស៊ីណាវ៉ាត្រា (Paetongtarn Shinawatra) បាននិយាយថា វាដល់ពេលដែលឪពុករបស់ លោកស្រីត្រូវត្រឡប់មកផ្ទះវិញហើយ។ លោកស្រី សង្ឃឹមថា គាត់នឹងមានសុខភាពល្អ និងអាចរស់នៅក្នុងប្រទេសថៃបាន៕
