ផែនទីបង្ហាញតំបន់ត្រួតមើលសន្តិសុខរបស់តៃវ៉ាន់ AFP
តាំងតែពីដើមមកចិនដីគោកតែងចាត់ទុកថាកោះតៃវ៉ាន់ជាផ្នែកមួយរបស់ខ្លួនបើទោះបីជាតៃវ៉ាន់ខ្លួនឯងមិនព្រមចុះញ៉មជាមួយរបបកុម្មុយនីស្តក៏ដោយ។ កន្លងមកប្រទេសណាដែលមានទំនាក់ទំនងជាមួយចិនគឺត្រូវតែគោរពគោលការណ៍ចិនតែមួយដោយមិនឱ្យមានទំនាក់ទំនងផ្លូវការណាមួយជាមួយតៃវ៉ាន់ឡើយ។
មិនត្រឹមតែប៉ុណ្ណោះចិនក៏មិនដែលខ្វល់ខ្វាយពីខ្សែបន្ទាត់ដែលខណ្ឌចែកដែនទឹករវាងកោះតៃវ៉ាន់និងសមុទ្រចិនខាងត្បូងដែរ។ម្ល៉ោះហើយជារឿយៗចិនតែងតែល្មើសឆ្លងកាត់ខ្សែបន្ទាត់ដែនទឹកកោះតៃវ៉ាន់ដោយមិនមានការអនុញ្ញាត។
ដោយឡែកនាថ្ងៃទី១៨ ខែកុម្ភៈ ចិនរឹតតែប្រកែកមិនទទួលស្គាល់កាន់តែខ្លាំងឡើងចំពោះដែនអធិបតេយ្យភាពរបស់តៃវ៉ាន់។ភាពចម្រូងចម្រាសនេះកើតឡើងក្រោយទូកនេសាទរបស់ចិនមួយបានចូលទៅនេសាទនៅក្បែរតំបន់ហាមឃាត់របស់តៃវ៉ាន់កាលពីថ្ងៃទី១៤ ខែកុម្ភៈហើយបានជួបគ្រោះថ្នាក់និងធ្វើឱ្យមនុស្ស ២នាក់បាត់បង់ជីវិត។
បើតាមអាជ្ញាធរតៃវ៉ាន់ទូកនេសាទរបស់ចិន ១គ្រឿងនោះបានចូលទៅកៀកដែនទឹករបស់តៃវ៉ាន់ដោយមានចម្ងាយប្រមាណតែ ១គីឡូម៉ែត្រប៉ុណ្ណោះពីកោះតៃវ៉ាន់។ក្នុងពេលនោះទាហានជើងទឹករបស់តៃវ៉ាន់បានព្យាយាមបញ្ឈប់ទូកនោះដើម្បីត្រួតពិនិត្យប៉ុន្តែទូកនេសាទបានព្យាយាមបើកគេចរហូតជួបគ្រោះថ្នាក់។
នៅក្នុងពេលនោះដែរមនុស្សចំនួន៤នាក់ដែលនៅលើទូកបានធ្លាក់ចូលទៅក្នុងទឹកហើយជាលទ្ធផលមនុស្ស ២នាក់បានស្លាប់បាត់បង់ជីវិត។
ក្រោយហេតុការណ៍នេះការិយាល័យកិច្ចការបរទេសរបស់ចិននៅតៃវ៉ាន់ចោទប្រកាន់តៃវ៉ាន់ថាសកម្មភាពតបតរបស់ទាហានជើងទឹកតៃវ៉ាន់ទៅលើទូកនេសាទរបស់ខ្លួនជាដើមចមដែលនាំឱ្យកើតមានគ្រោះថ្នាក់ហើយចិនក៏បានទាមទារឱ្យមានការស៊ើបអង្កេតបន្តលើករណីនេះផងដែរ។
ភាគីចិន បានបន្ថែមទៀតថាការនេសាទនៅជុំវិញតំបន់កោះតៃវ៉ាន់នេះ ធ្វើឡើងតាំងតែបុរាណកាលមកម្ល៉េះហើយគ្មានឡើយតំបន់ហាមឃាត់ឬខ្សែបន្ទាត់ព្រំដែនរបស់តៃវ៉ាន់។
តៃវ៉ាន់ឯណោះវិញបានត្អូញត្អែរពីសកម្មភាពរបស់ទូកនេសាទ និងកប៉ាល់របស់ចិន ដែលចេញចូលក្បែរតំបន់ហាមឃាត់របស់ខ្លួនជាពិសេសនៅតំបន់កោះ Kinmen និងកោះ Matsu ដែលនៅក្បែរចិនដីគោកនិងមានចម្ងាយប្រមាណជា២០គីឡូម៉ែត្រប៉ុណ្ណោះពីកោះតៃវ៉ាន់។
មិនត្រឹមតែផ្លូវទឹកប៉ុណ្ណោះទេថ្មីៗនេះតៃវ៉ាន់ក៏ទទួលរងសម្ពាធផ្លូវអាកាសដោយចិនបានបង្ហោះបាឡុងរបស់ខ្លួននៅពីលើដែនកោះតៃវ៉ាន់ និងថែមទាំងទៅដល់មូលដ្ឋានយោធាតៃវ៉ាន់ទៀតផង។
យ៉ាងណាក៏ដោយសម្រាប់ចិនគ្មានទេពាក្យថាដាច់ដោយឡែករវាងខ្លួននិងតៃវ៉ាន់ដូច្នេះហើយអ្វីៗដែលជារបស់តៃវ៉ាន់គឺប្រៀបដូចជាកម្មសិទ្ធិរបស់ចិនទាំងមូលដែរ៕
