លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីពាណិជ្ជកម្មរបស់ថៃ។ AFP
ទោះបីមានការអះអាងពីនាយករដ្ឋមន្ត្រីថៃ លោក សេដ្ឋា ថាវីស៊ីន ថា ក្រោយការដោះលែងឱ្យនៅក្រៅការឃុំឃាំង លោក ថាក់ស៊ីន ស៊ីណាវ៉ាត្រា បានក្លាយជាប្រជាជនសាមញ្ញម្នាក់ ប្រជាប្រិយភាព និងឥទ្ធិពលរបស់អតីតនាយករដ្ឋមន្ត្រីថៃ នៅតែអង្រួនសង្គមថៃឱ្យមានការជជែក ដេញដោលពីភាពត្រឹមត្រូវនៃការអនុវត្តច្បាប់របស់រដ្ឋាភិបាល ដែលដឹកនាំដោយគណបក្សភឿថៃ។
ក្រោយការដោះលែងឱ្យនៅក្រៅការឃុំឃាំងពីមន្ទីរពេទ្យប៉ូលិស កាលថ្ងៃទី ១៨ ខែកុម្ភៈ តាមរយៈការអនុវត្តព្យួរទោស គណបក្សឆ្ពោះទៅមុខ (Move Foreward Party) ដែលជាបក្សឈ្នះឆ្នោតភាគច្រើន ប៉ុន្តែបរាជ័យក្នុងការបង្កើតរដ្ឋាភិបាលចម្រុះ ហើយក្លាយជាបក្សប្រឆាំងធំបំផុតរបស់ប្រទេសថៃ បានប្រើប្រាស់បណ្តាញសង្គម ចែករំលែកសារ ដែលចោទសួរភាពត្រឹមត្រូវនៃការអនុវត្តច្បាប់។
អតីតមន្ត្រីជាន់ខ្ពស់ក្នុងរដ្ឋាភិបាលដឹកនាំដោយលោក ថាក់ស៊ីន ស៊ីណាវ៉ាត្រា លោក Phumtham Wechayachai ដែលបច្ចុប្បន្នជារដ្ឋមន្ត្រីក្រសួងពាណិជ្ជកម្មថៃ ដែលជាឧបនាយករដ្ឋមន្ត្រីផងដែរនោះ បានច្រានចោល ការជជែកទាំងឡាយអះអាងថា អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រាដែលទើបដោះលែងនៅក្រៅឃុំ នឹងចាប់ផ្តើមប្រើឥទ្ធិពលលើរដ្ឋបាលរបស់រដ្ឋាភិបាល ដែលដឹកនាំដោយគណបក្សភឿថៃ សារព័ត៌មាន The Nation បានដកស្រង់សម្តី លោករដ្ឋមន្ត្រី Phumtham ដែលនិយាយនៅថ្ងៃទី ១៩ ខែកុម្ភៈថា អ្នកទាំងឡាយណាដែលមានក្តីបារម្ភលើឥទ្ធិពលរបស់អតីតនាយករដ្ឋមន្ត្រី គឺជាប់គាំងនៅក្នុងរឿងអតីតកាល។
លោក ថាក់ស៊ីន ជាស្ថាបនិកនៃគណបក្ស ថៃស្រឡាញ់ថៃ ឬហៅថា (Thai Rak Thai) ដែលក្រោយមកក្លាយជាបក្សភឿថៃ នាពេលបច្ចុប្បន្នត្រូវបានគេជឿថា មានការគោរពចំពោះសមាជិកសំខាន់ៗ ដែលធ្លាប់បម្រើការងារដឹកនាំដោយលោកថាក់ស៊ីន រួមទាំង លោក Phumtham ដែលកាន់តួនាទីជាន់ខ្ពស់នៅរដ្ឋាភិបាលថៃបច្ចុប្បន្ន។
លោក ថាក់ស៊ីន បានវិលត្រឡប់ទៅកាន់ភូមិគ្រឹះផ្ទាល់របស់លោកវិញ កាលថ្ងៃទី ១៨ ខែកុម្ភៈ បន្ទាប់ពីបានឃុំខ្លួននៅមន្ទីរពេទ្យប៉ូលិសរយៈពេល ១៨០ ថ្ងៃ ក្រោយពេលលោកត្រឡប់មកមាតុភូមិវិញពីការនិរទេសខ្លួនឯង ១៥ ឆ្នាំ។
នៅពេលអ្នកសារព័ត៌មានសួរអំពីលទ្ធភាពដែលលោកថាក់ស៊ីននឹងជួយពង្រឹងបក្សភឿថៃឬយ៉ាងណា? លោក Phumtham បាននិយាយថា គណបក្សមានភាពរឹងមាំ និងប្តេជ្ញាចិត្តក្នុងការថែរក្សាប្រជាជនរួចហើយ។
លោកបានថ្លែងថា៖ «កម្លាំងរបស់គណបក្សភឿថៃមិនអាស្រ័យលើបុគ្គលណាម្នាក់ទេ»។
ចំពោះសំណួរដែលលើកឡើងដែរថាតើលោកថាក់ស៊ីននឹងដើរតួក្នុងការងាររបស់រដ្ឋាភិបាលដែរឬទេ? លោក Phumtham បាននិយាយថា អតីតនាយករដ្ឋមន្ត្រីបានបញ្ជាក់រួចហើយថាលោកចង់ចំណាយពេលដែលនៅសល់ជាមួយគ្រួសាររបស់គាត់។
លោកបញ្ជាក់ថា៖ «សូមកុំបារម្ភ ហើយកុំធ្វើនយោបាយក្នុងរឿងនេះ។ កុំបារម្ភថានឹងមាននាយករដ្ឋមន្ត្រី ២ នៅក្នុងរដ្ឋាភិបាលរបស់យើង»។
ជុំវិញការដោះលែង លោក ថាក់ស៊ីន លោក Phumtham បាននិយាយថា វានឹងមិនប៉ះពាល់ដល់ប្រព័ន្ធយុត្តិធម៌របស់ប្រទេសទេ ព្រោះលោកថាក់ស៊ីនត្រូវបានដោះលែងស្របតាមច្បាប់។
លោកបានបន្ថែមថា អ្នករិះគន់មានការរើសអើងខ្លាំងពេកចំពោះលោកថាក់ស៊ីន។តាមការស្រង់សម្តីរបស់ The Nation សមាជិកព្រឹទ្ធសភា លោក Kittisak Ratanawaraha បានរិះគន់ការដោះលែងនេះ ហើយថា លោកថាក់ស៊ីនមិនបានចំណាយពេលសូម្បី ១ ថ្ងៃនៅក្នុងកន្លែងឃុំខ្លួនផង ហើយ ការឈឺកអាចជារឿងមិនពិតផងដែរ។ លោកនិយាយថា៖ «នេះជារឿងអយុត្តិធម៌ចំពោះអ្នកទោសជាង ២០ ម៉ឺននាក់ផ្សេងទៀត»៕
