គំរូយន្តហោះ Boeing ដែលតាំងបង្ហាញនៅពិព័រណ៍គ្រឿងអវកាសនៅសិង្ហបុរី។ AFP
ក្រុមហ៊ុនផលិតយន្តហោះ Boeing នៅថ្ងៃទី២១ ខែកុម្ភៈ ឆ្នាំ២០២៤ បានប្រកាសពីការត្រៀមខ្លួន ក្នុងការប្រកួតប្រជែងជាមួយនឹងក្រុមហ៊ុនផលិតយន្តហោះក្នុងស្រុករបស់ប្រទេសចិន ប្រភេទ C919 ដែលបានដាក់បង្ហាញដល់អ្នកទិញអន្តរ ជាតិនៅក្នុងកម្មវិធីពិព័រណ៍យន្តហោះដ៏ធំបំផុតនៅអាស៊ី ហៅថា Singapore Airshow ។ យន្តហោះ C919 ត្រូវបានគេដាក់បង្ហាញតាមរយៈការហោះហើរនៅលើអាកាសនិងការបើកបរនៅលើដី ដើម្បីទាក់ទាញអ្នកទិញទូទាំងពិភពលោក។
ក្រុមហ៊ុនសាជីវកម្មយន្តហោះពាណិជ្ជកម្មរបស់រដ្ឋចិនឬហៅកាត់ថា COMAC មានគោលបំណងផលិតយន្តហោះប្រភេទ C919 នេះឡើងដើម្បីជាគូប្រជែងនឹងយន្តហោះ A320 របស់ក្រុមហ៊ុន Airbus និង737 MAX របស់ក្រុមហ៊ុនBoeing ដែលបច្ចុប្បន្នកំពុងមានវត្តមាននៅលើទីផ្សារយន្តហោះអន្តរជាតិ។
លោកដេវ ស្កាល់តេ (Dave Schulte) នាយកគ្រប់គ្រងទីផ្សារពាណិជ្ជកម្មរបស់ក្រុមហ៊ុន Boeing ប្រចាំតំបន់អាស៊ីប៉ាស៊ីហ្វិកបាននិយាយថា យន្តហោះ C919 មានតួខ្លួនប្រហាក់ប្រហែលនឹងយន្តហោះរាងតូចចង្អៀតដែលផលិតដោយក្រុមហ៊ុនBoeing និង Airbus ដូច្នេះក្រុមហ៊ុនអាកាសចរណ៍ក្នុងតំបន់អាចពិចារណាបាន។
លោកបានប្រាប់អ្នកសារព័ត៌មាននៅកន្លែងតាំងពិព័រណ៍ថា៖"វាគឺជាយន្តហោះដែលយើងនឹងបន្តប្រកួតប្រជែងជាមួយ"។លោកបានបន្ថែមថា៖ "ក្រុមហ៊ុនផលិតនីមួយៗត្រូវការបង្ហាញពីគុណសម្បត្តិនៃយន្តហោះរបស់ខ្លួន ដល់ក្រុមហ៊ុនអាកាស ចរណ៍ និងភាពខ្លាំងនៃការផលិតរបស់ពួកគេ"។
លោក ស្កាល់តេបាននិយាយថា "ខ្ញុំជឿថា COMAC នឹងប្រឈមមុខនឹងបញ្ហាដែលពួកគេនឹងត្រូវគិតគូរដោះស្រាយដើម្បីរក្សាការប្រកួតប្រជែងនៅក្នុងទីផ្សារក្នុងតំបន់"។ លោកបានរំពឹងថាតំបន់អាស៊ីអាគ្នេយ៍នឹងត្រូវការយន្តហោះថ្មីចំនួន ៤២២៥ គ្រឿងនៅត្រឹមឆ្នាំ២០៤២ ហើយក្រុមហ៊ុនបានត្រៀមខ្លួនរួចជាស្រេចដើម្បីប្រកួតប្រជែងជាមួយCOMAC ។
លោកបានព្យាករថា តម្រូវការនឹងកើនឡើងបន្ថែមទៀត ដោយសារតែថវិការបស់ក្រុមហ៊ុនអាកាសចរណ៍ភាគច្រើននៅមានកម្រិត ដូច្នេះវានឹងមានប្រជាប្រិយភាពខ្លាំងនៅក្នុងតំបន់ដែលមានមនុស្សជាង ៦៥០ លាននាក់រស់នៅ។យន្តហោះ C919 បានចាប់ផ្តើមប្រតិបត្តិការជើងហោះហើរពាណិជ្ជកម្មនៅក្នុងប្រទេសចិន ចាប់តាំងពីខែឧសភាឆ្នាំ២០២៣ ហើយត្រូវបានដាក់តាំងបង្ហាញជាលើកដំបូងនៅខាងក្រៅប្រទេសចិនដីគោកក្នុងទីក្រុងហុងកុងកាលពីខែធ្នូ។
ក្រុមហ៊ុន COMAC បានលក់យន្តហោះ C919 ចំនួន ៤០ គ្រឿង ហើយទៅឱ្យក្រុមហ៊ុនអាកាសចរណ៍ Tibet Airlines របស់ប្រទេសចិន ប៉ុន្តែមិនទាន់អាចទាក់ទាញអ្នកទិញពីប្រទេសផ្សេងទៀតនៅឡើយទេ។ ដោយឡែក ក្រុមហ៊ុន Boeing បានប្រកាសថាក្រុមហ៊ុនអាកាសចរណ៍ Royal Brunei Airlines បានបញ្ជាទិញយន្តហោះប្រភេទ ៧៨៧ ចំនួន ៤ គ្រឿងហើយក្រុមហ៊ុន Thai Airways បានបញ្ជាទិញយន្តហោះប្រភេទ Dreamliners ចំនួនរហូតដល់ទៅ ៤៥ គ្រឿងឯណោះ។
បើទោះបីជាការតាំងពិព័រណ៍យន្តហោះនេះ បានផ្តល់ឱកាសឱ្យទីក្រុងប៉េកាំងអាចដាក់បង្ហាញយន្តហោះប្រភេទC919 អ្នកវិភាគអាកាសចរណ៍លោក ស៊ូកូ យូសូហ្វ (ShukorYusof) មកពីក្រុមហ៊ុនប្រឹក្សា Endau Analytics របស់ប្រទេសសិង្ហបុរី បានលើកឡើងថា ក្រុមហ៊ុន COMAC នឹងជួបប្រទះនឹងការប្រកួតប្រជែងខ្លាំងក្នុងការទាក់ទាញអ្នកទិញអន្តរជាតិ។
លោកបានប្រាប់ភ្នាក់ងារព័ត៌មានAFP ថា៖«បើទោះបីជាប្រទេសចិនបាននាំមុខគេនៅក្នុងទីផ្សាររថយន្តអគ្គិសនីក៏ដោយនៅក្នុងវិស័យអាកាសចរណ៍ នៅតែមានការយល់ឃើញអវិជ្ជមាន ទាក់ទងនឹងម៉ាកយីហោដែលដាក់ឃ្លាថា ផលិតនៅប្រទេសចិន (Made in China)»។
លោកបានពន្យល់បន្តថា៖"យន្តហោះ C919 ត្រូវការពេលវេលាយូរ ដើម្បីទទួលបានការបញ្ជាទិញពីក្រុមហ៊ុនអាកាសចរណ៍ធំៗមួយចំនួន"។ លោកបានកត់សម្គាល់ថាវាជារឿងចៀសមិនរួចនោះទេ ពោលគឺក្រុមហ៊ុនអាកាសចរណ៍លំដាប់កំពូលនឹងទិញយន្តហោះពាណិជ្ជកម្មដែលផលិតដោយប្រទេសចិន៕
