តំបន់ច្រកព្រំដែនដីគោកឈ្មោះថា Woodlands Checkpoint។ AFP
ប្រទេសសិង្ហបុរី កំពុងរង់ចាំការឆ្លើយតបពីប្រទេសម៉ាឡេស៊ី ចំពោះការស្នើសុំទិញដីពីរកន្លែង ដើម្បីជួយសម្រួលដល់ការអភិវឌ្ឍឡើងវិញនៅតំបន់ច្រកព្រំដែនដីគោកឈ្មោះថា Woodlands Checkpoint។ កាលពីថ្ងៃព្រហស្បតិ៍ម្សិលមិញ អាជ្ញាធរអន្តោប្រវេសន៍ និងប៉ុស្តិ៍ត្រួតពិនិត្យ (ICA) បានឱ្យដឹងថា ស្នងការដែនដីសហព័ន្ធរបស់ម៉ាឡេស៊ី ជាម្ចាស់កម្មសិទ្ធិតំបន់ដីតូចៗចំនួនពីរកន្លែងនៅជាប់នឹង Woodlands Checkpoint។
អាជ្ញាធរអន្តោប្រវេសន៍ និងប៉ុស្តិ៍ត្រួតពិនិត្យ បានបញ្ជាក់ថា ដីឡូតិ៍ដែលមិនទាន់បានប្រើប្រាស់នេះ ស្ថិតនៅចំកណ្តាលនៃតំបន់ Woodlands Checkpoint ដែលសិង្ហបុរីគ្រោងនឹងធ្វើការអភិវឌ្ឍឡើងវិញ។ ពួកគេបានសង្កត់ធ្ងន់ថា បើសិង្ហបុរីមិនអាចទិញដីឡូតិ៍ទាំងនេះពីម៉ាឡេស៊ីបានទេ នោះការបង្កើនប្រសិទ្ធភាពនៃការអភិវឌ្ឍឡើងវិញរបស់ប៉ុស្តិ៍ត្រួតពិនិត្យ នឹងមិនអាចទៅរួចនោះទេ។
គួរបញ្ជាក់ថា ការអភិវឌ្ឍឡើងវិញនេះ ធ្វើឡើងក្នុងគោលបំណងធ្វើឱ្យប្រសើរឡើងនូវកិច្ចការអន្តោប្រវេសន៍សម្រាប់អ្នកធ្វើដំណើរចេញ និងចូលរវាងសិង្ហបុរី និងម៉ាឡេស៊ី តាមរយៈផ្លូវថ្នល់។ អាជ្ញាធរអន្តោប្រវេសន៍ និងប៉ុស្តិ៍ត្រួតពិនិត្យ បានបន្ថែមថា សិង្ហបុរីបានសរសេរលិខិតស្នើសុំទិញដីនេះទៅកាន់ភាគីម៉ាឡេស៊ីកាលពីខែឧសភា ឆ្នាំ ២០២២ និងបានទាក់ទងម្តងទៀតនៅខែវិច្ឆិកា ឆ្នាំ ២០២៣ ដើម្បីពិភាក្សាអំពីការទិញដីពីរកន្លែងនេះ។
លើសពីនេះ បញ្ហានេះក៏ត្រូវបានលើកឡើងនៅក្នុងកិច្ចប្រជុំនៃគណៈកម្មាធិការចម្រុះរដ្ឋមន្ត្រីស្ដីពីការអភិវឌ្ឍតំបន់អ៊ីសកាន់ដា (Iskandar) របស់ប្រទេសម៉ាឡេស៊ីកាលពីខែកក្កដា ឆ្នាំ ២០២៣ និងកិច្ចជំនួបប្រជុំរវាងមេដឹកនាំសិង្ហបុរី និងម៉ាឡេស៊ី លើកទី១០ នៅខែតុលា ឆ្នាំ ២០២៣។ នៅក្នុងកិច្ចប្រជុំទាំងអស់នេះ ភាគីទាំងពីរបានសន្យាថានឹងពង្រឹងដំណើរការចរាចរណ៍ចេញចូលនៅតាមច្រកព្រំដែនផ្លូវគោកមួយនេះ។
អាជ្ញាធរអន្តោប្រវេសន៍ និងប៉ុស្តិ៍ត្រួតពិនិត្យ បានរំលេចថា ពួកគេកំពុងរង់ចាំការឆ្លើយតបរបស់ម៉ាឡេស៊ីចំពោះសំណើនេះ។ យោងតាមរបាយការណ៍របស់ទីភ្នាក់ងារសារព័ត៌មានម៉ាឡេស៊ី បឺណាម៉ា (Bernama) ចុះនៅថ្ងៃទី ១៨ ខែកុម្ភៈ បានឱ្យដឹងថា អាជ្ញាធរម៉ាឡេស៊ីនៅតែបន្តពិចារណាជុំវិញការលក់ដីនេះ។
ឧត្តមស្នងការម៉ាឡេស៊ីប្រចាំប្រទេសសិង្ហបុរី លោក អាហ្វា ម៉ូហាម៉ាដ មូស្ថាហ្វា (Azfar Mohamad Mustafar) បានលើកឡើងថា វាជារឿងដែលសមហេតុផលសម្រាប់ប្រទេសសិង្ហបុរីក្នុងការស្នើសុំទិញដីនោះ ប៉ុន្តែប្រទេសម៉ាឡេស៊ីកំពុងសម្រេចចិត្តថាតើគួរតែលក់ដីនោះ ឬរៀបចំកិច្ចព្រមព្រៀងដោះដូរដីធ្លីនៅកន្លែងណាមួយ ដូចទៅនឹងកិច្ចព្រមព្រៀងដោះដូរដីដែលធ្លាប់បានធ្វើកាលពីឆ្នាំ ២០១០។
លោក អាហ្វា បានបន្ថែមថា សិង្ហបុរីបានទាក់ទងម៉ាឡេស៊ីដើម្បីស្នើសុំទិញដីនេះ ប៉ុន្តែអាជ្ញាធរពាក់ព័ន្ធរបស់ម៉ាឡេស៊ីនៅតែពិចារណាមិនទាន់ដាច់ស្រេច ហើយពួកគេមិនទាន់ទទួលបានការឆ្លើយតបណាមួយនៅឡើយទេ។ លោកក៏បានបញ្ជាក់ផងដែរថា ដីរបស់រដ្ឋាភិបាលម៉ាឡេស៊ីនៅបរទេសទាំងអស់ គឺត្រូវបានចុះបញ្ជីក្រោមស្នងការដែនដីសហព័ន្ធ៕
