មេដឹកនាំបស្ចិមប្រទេសនិងមេដឹកនាំអឺរ៉ុបធ្វើដំណើរទស្សនកិច្ចរួមគ្នាទៅកាន់ប្រទេសអ៊ុយក្រែនក្នុងខួបសង្គ្រាម។ AFP
មេដឹកនាំកំពូលៗនៃសហភាពអឺរ៉ុបចំនួន ៤ រូប បានធ្វើដំណើរទៅកាន់រដ្ឋធានីកៀវនៃប្រទេសអ៊ុយក្រែន នៅក្នុងឱកាសគម្រប់ខួប ២ ឆ្នាំ នៃការវាយប្រហារប្រទេសអ៊ុយក្រែន ពីសំណាក់ប្រទេសរុស្ស៊ី ខណៈបណ្តាប្រទេសលោកខាងលិចទាំងនោះបានរក្សាជំហររបស់ខ្លួនក្នុងការជួយជ្រោមជ្រែងអ៊ុយក្រែនរហូតរំដោះប្រទេសមកជាប្រទេសមានសេរីភាពសាជាថ្មីម្តងទៀត។ នេះបើតាមការចុះផ្សាយដោយកាសែត Aljazeera។
ប្រភពដដែលបានឱ្យដឹងទៀតថា មេដឹកនាំកំពូលៗរបស់អឺរ៉ុបទាំងនោះមានដូចជាលោកស្រីនាយករដ្ឋមន្ត្រីអ៊ីតាលី GiogiaMeloni នាយករដ្ឋមន្ត្រីកាណាដា លោក Justin Trudeau នាយករដ្ឋមន្ត្រីបែលហ្ស៊ិក លោក Alexander De Croo និងប្រធានគណៈកម្មការអឺរ៉ុបលោកស្រី Ursula Von Der Leyen បានធ្វើដំណើរទៅសួរសុខទុក្ខនិងទៅគោរពវិញ្ញាណក្ខន្ធប្រជាជនអ៊ុយក្រែនដែលស្លាប់បាត់បង់ជីវិតនៅអំឡុងសង្គ្រាមរុស្ស៊ីអ៊ុយក្រែនរយៈពេល ២ ឆ្នាំកន្លងមកនេះ។
ប្រធានគណៈកម្មការអឺរ៉ុបលោកស្រី Ursula Von Der Leyen បានលើកឡើងតាមរយៈបណ្តាញសង្គម X របស់ខ្លួនថា៖ «ច្រើនជាងពេលណាទាំងអស់ យើងឈរយ៉ាងរឹងមាំជាមួយអ៊ុយក្រែនមិនថាហិរញ្ញវត្ថុសេដ្ឋកិច្ចយោធារហូតទាល់តែប្រទេសមួយនេះមានសេរីភាពឡើងវិញ»។
នាយករដ្ឋមន្ត្រីកាណាដាលោក Justin Trudeau វិញក៏បានគូសបញ្ជាក់ផងដែរថា ប្រទេសអ៊ុយក្រែន កំពុងប្រយុទ្ធដើម្បីអនាគតរួមរបស់ពួកយើង។ពួកគេកំពុងតែរំឭកទៅដល់ពិភពលោកថា លទ្ធិប្រជាធិបតេយ្យគឺមានសារៈសំខាន់ក្នុងការស្លាប់ និងគ្រប់គ្រាន់ក្នុងការយកឈ្នះ»។
បើតាមកាសែត Aljazeera លោកប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី បានលើកឡើងថា៖ «ពួកយើងបានប្រឡូកចូលក្នុងសមរភូមិអស់រយៈពេល ៧៣០ ថ្ងៃមកហើយ ដើម្បីបុព្វហេតុជាតិ និងដើម្បីការរស់នៅរបស់ពួកយើង»។
កិច្ចប្រជុំបណ្តាមេដឹកនាំប្រទេសក្រុមប្រទេសឧស្សាហកម្មកំពូល ហៅកាត់ថា «G7» ធ្វើឡើងនៅប្រទេសអ៊ីតាលីនៅឆ្នាំនេះហើយលោកប្រធានាធិបតីអ៊ុយក្រែនក៏ត្រូវចូលរួមថ្លែងតាមរយៈប្រព័ន្ធ Zoom ផងដែរនៅថ្ងៃអាទិត្យនេះ។ ការថ្លែងរបស់លោកប្រធានាធិបតីអ៊ុយក្រែននេះ ដើម្បីទទូចឱ្យបណ្តាក្រុមប្រទេសទាំងនោះបន្តចូលរួមជួយអ៊ុយក្រែនបន្ថែមទៀតក្នុងការប្រយុទ្ធតតាំងជាមួយនឹងរុស្ស៊ី។
នៅក្នុងសេចក្តីប្រកាសរបស់បណ្តាប្រទេសក្រុម G7 បានបញ្ជាក់ថា៖ «ប្រទេសអ៊ុយក្រែន បានឈានជើងចូលនៅក្នុងសង្គ្រាមដែលកើតឡើងពីការវាយប្រហាររបស់ប្រទេសរុស្ស៊ី រហូតមកទល់ពេលនេះ ប្រទេសអ៊ុយក្រែន ក៏ដូចជាប្រជាជនអាចទទួលជំនួយពីសំណាក់បណ្តាប្រទេស G7 ជាដរាបដើម្បីបុព្វហេតុជាតិ និងបូរណភាពទឹកដីរបស់ខ្លួនពីការឈ្លានពានរបស់មហាអំណាចរុស្ស៊ី»។
នៅក្នុងសេចក្តីប្រកាសដដែលបានឱ្យដឹងថា បណ្តាក្រុមប្រទេស G7 នឹងខិតខំស្វែងរកមធ្យោបាយដើម្បីធ្វើឱ្យទីក្រុងម៉ូស្គូ ចំណាយលើការខូចខាតទាំងឡាយរបស់អ៊ុយក្រែន។
បណ្តាក្រុមប្រទេសទាំងនេះនឹងខិតខំស្វែងរកមធ្យោបាយកាត់ផ្តាច់ប្រភពចំណូលរបស់រុស្ស៊ីក្នុងការយកមកផ្គត់ផ្គង់ក្នុងសង្គ្រាមផងដែរ។
សហភាពអឺរ៉ុបបានក្លាយជាអ្នកផ្គត់ផ្គង់ធំបំផុតដល់ប្រទេសអ៊ុយក្រែន រហូតមកដល់ដើមឆ្នាំទី៣ នៃសង្គ្រាមរុស្ស៊ី-អ៊ុយក្រែន ដោយសារតែសហរដ្ឋអាមេរិកដែលជាអ្នកផ្គត់ផ្គង់ធំបំផុតក្នុង ២ ឆ្នាំកន្លងមក បានជាប់គាំងក្នុងការអនុម័តជំនួយសម្រាប់ប្រទេសអ៊ុយក្រែន។
រដ្ឋបាលប្រធានាធិបតីសហរដ្ឋអាមេរិក ចូ បៃដិន តែងតែខិតខំចង់ទម្លាក់ជំនួយយោធាមានតម្លៃប្រមាណ ៦០ ពាន់លានដុល្លារដល់អ៊ុយក្រែនសម្រាប់ឆ្នាំ ២០២៤ នេះ ប៉ុន្តែសភាតំណាងរាស្ត្រអាមេរិកដែលមានសិទ្ធិអនុម័តលើការចំណាយរបស់រដ្ឋតែងច្រានចោលសំណើនោះ៕
