ប្រធានាធិបតីវៀតណាម លោក Vo Van Thuong
មន្ត្រី និងអ្នកការទូតរបស់អង្គការសហប្រជាជាតិ (UN) បាននិយាយថា វៀតណាម រំពឹងថា នឹងផ្តល់សច្ចាប័ននៅឆ្នាំនេះ លើអនុសញ្ញារបស់អង្គការ សម្រាប់ការបង្កើតសហជីពដោយសេរី ក្នុងសកម្មភាពមួយសំដៅកាត់បន្ថយហានិភ័យនៃភាពចម្រូងចម្រាស់ផ្នែកពាណិជ្ជកម្ម ប៉ុន្តែទំនងជាធ្វើឱ្យក្រុមហ៊ុនបរទេសមួយចំនួនមិនសប្បាយចិត្ត។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ បានរាយការណ៍ ថ្ងៃអង្គារ។
ក្រោមកិច្ចព្រមព្រៀងពាណិជ្ជកម្មរាប់ពាន់លានដុល្លារជាមួយសហភាពអឺរ៉ុប និងដៃគូប៉ាស៊ីហ្វិក វៀតណាមត្រូវបានតម្រូវឱ្យអនុវត្តស្តង់ដារ UN ស្តីពីសិទ្ធិកម្មករ ដើម្បីជៀសវាងភាពចម្រូងចម្រាសពាក់ព័ន្ធនឹង «ការបោះចោលសង្គម» ឬ «Social Dumping» ដែលគេសំដៅលើការដាក់ទីតាំងផលិតកម្មក្នុងប្រទេសដែលមានតម្លៃពលកម្មថោកៗ។
លោក Ingrid Christensen ប្រធានអង្គការពលកម្មអន្តរជាតិប្រចាំប្រទេសវៀតណាម ដែលជាទីភ្នាក់ងារទទួលបន្ទុកសិទ្ធិការងាររបស់ UN បានប្រាប់រ៉យទ័រថា៖ «យើងមានទំនុកចិត្តថា វៀតណាមប្តេជ្ញាផ្តល់សច្ចាប័នលើអនុសញ្ញាលេខ ៨៧ ឱ្យបានឆាប់តាមដែលអាចធ្វើទៅបាន»។
អនុសញ្ញា ៨៧ ស្តីពី «សេរីភាពក្នុងការបង្កើតសមាគម និងការការពារសិទ្ធិក្នុងការរៀបចំ» ត្រូវបានអនុម័តនៅឆ្នាំ ១៩៤៨ និងជាច្បាប់មូលដ្ឋានមួយ ដែលការពារសិទ្ធិការងារនៅទូទាំងពិភពលោក។
អ្នកការទូតនៅក្រុងហាណូយ បានប្រាប់រ៉យទ័រថា ក្នុងកិច្ចប្រជុំមួយកាលពីខែធ្នូ ជាមួយនឹងអ្នកជំនាញការបរទេស មន្ត្រីក្រសួងការងារវៀតណាមបាននិយាយថា ការផ្តល់សច្ចាប័នលើអនុសញ្ញានរបស់ UN ត្រូវបានគេរំពឹងថានឹងធ្វើឡើងនៅខែតុលា ឆ្នាំ ២០២៤ នេះ។ អ្នកការទូតផ្សេងទៀត ក៏បានបញ្ជាក់ពីផែនការផ្តល់សច្ចាប័ននៅឆ្នាំនេះផងដែរ។
បន្ទាប់ពីមានកិច្ចពិភាក្សាអស់រយៈពេលមួយទសវត្សរ៍រួចមក សភាវៀតណាមរំពឹងថានឹងផ្តល់សច្ចាប័នលើអនុសញ្ញាកាលពីឆ្នាំមុន មុនពេលផុតកំណត់នៅខែមករា តាមការយល់ព្រមជាមួយកាណាដា។ ប៉ុន្តែនៅពេលខកខានលើការណ៍នេះ កាណាដាបានស្វែងរកការដាក់ទណ្ឌកម្មវៀតណាម ក្រោមកិច្ចព្រមព្រៀងគ្រប់ជ្រុងជ្រោយ និងរីកចម្រើនសម្រាប់ភាពជាដៃគូអន្តរប៉ាស៊ីហ្វិក (CPTPP)។
អ្នកនាំពាក្យរដ្ឋាភិបាលកាណាដាបាននិយាយថា កាណាដា ដែលមានពាណិជ្ជកម្មជាមួយវៀតណាមតម្លៃជាង ១០ ប៊ីលានដុល្លារ កំពុងពិនិត្យមើលការតវ៉ា អំពីថាតើច្បាប់ការងាររបស់វៀតណាម អនុលោមតាមកាតព្វកិច្ចរបស់ CPTPP ស្តីពីសិទ្ធិកម្មករដែរ ឬយ៉ាងណា។
ចំណែកឯឯកអគ្គរដ្ឋទូតសហភាពអឺរ៉ុបប្រចាំវៀតណាម លោក Julien Guerrier វិញ បាននិយាយថា EU ដែលមានពាណិជ្ជកម្មទ្វេភាគីជាមួយទីក្រុងហាណូយជិត ៦៥ ប៊ីលានដុល្លារក្នុងឆ្នាំ ២០២២ មើលឃើញថា ការផ្តល់សច្ចាប័នលើអនុសញ្ញាលេខ ៨៧ និងវិសោធនកម្មច្បាប់ពាក់ព័ន្ធ «មានសារៈសំខាន់» ដើម្បីអនុលោមតាមកិច្ចព្រមព្រៀងដែលមានស្រាប់។
វិធានការ ដែលត្រូវបានវៀតណាមពន្យារពេលយូរលើការផ្ដល់សច្ចាប័ននេះ នឹងក្លាយជាជំហានផ្លូវការដ៏សំខាន់មួយក្នុងប្រទេសកុម្មុយនីស្តវៀតណាម ដែលមានសហជីពជាតិតែមួយគត់ ដំណើរការក្នុងរចនាសម្ព័ន្ធបក្សកុម្មុយនិស្ត។ ប៉ុន្តែគេមិនច្បាស់អំពីរបៀប និងពេលវេលាជាក់លាក់ ដែលអនុសញ្ញានេះនឹងត្រូវបានអនុវត្តពិតប្រាកដ ក្រោយទទួលបានសច្ចាប័ន នោះទេ។
ទោះជាយ៉ាងណាក៏ដោយ អ្នកជំនាញមើលឃើញថា ការផ្ដល់សច្ចាប័នលើអនុសញ្ញា UN នឹងបង្កការមិនសប្បាយចិត្តពីក្រុមហ៊ុនបរទេស។ លោក Nguyen Hung អ្នកឯកទេសផ្នែកចង្វាក់ផ្គត់ផ្គង់នៅសកលវិទ្យាល័យ RMIT ប្រទេសវៀតណាម បានព្រមានថា៖ «ប្រសិនបើការផ្តល់សច្ចាប័ននាំទៅរកថាមពលពិតប្រាកដសម្រាប់សហជីព ក្រុមហ៊ុនមួយចំនួនអាចនឹងមិនសប្បាយចិត្ត» ដែលនេះ អាចប៉ះពាល់ដល់ការវិនិយោគបរទេស រួមទាំងពីក្រុមហ៊ុន Samsung ដែលជាអ្នកវិនិយោគធំជាងគេនៅវៀតណាមផងដែរ។
វៀតណាម ដែលជាមជ្ឈមណ្ឌលផលិតកម្មនៅអាស៊ីអាគ្នេយ៍ សម្រាប់រោងចក្ររបស់ក្រុមហ៊ុនអន្តរជាតិធំៗជាច្រើន រួមមានក្រុមហ៊ុន Samsung Electronics, Intel, Foxconn និងក្រុមហ៊ុន Canon ជាដើមនោះពឹងផ្អែកយ៉ាងខ្លាំងលើពាណិជ្ជកម្ម៕
