យន្តហោះគ្មានមនុស្សបើក Sky Guardian។
រដ្ឋបាលប្រធានាធិបតីអាមេរិក លោក Biden កាលពីថ្ងៃព្រហស្បតិ៍ ទី ១ ខែកុម្ភៈ ឆ្នាំ ២០២៤ កន្លងទៅ បានសម្រេចអនុម័តការលក់យន្តហោះគ្មានមនុស្សបើក និងឧបករណ៍យោធា ក្នុងរង្វង់ទឹកប្រាក់ ប្រមាណ ៤ ពាន់លានដុល្លារទៅឱ្យប្រទេសឥណ្ឌា ដែលមានបំណងប្រើប្រាស់ដើម្បីបង្កើនសុវត្ថិភាព និងការឃ្លាំមើលដែនសមុទ្ររបស់ខ្លួន។
ការអនុម័តនេះកើតឡើងនៅពេលដែលក្រុងវ៉ាស៊ីនតោន ទាក់ទងទៅកាន់ទីក្រុងញូវដែលី ដើម្បីបង្កើនកិច្ចសហប្រតិបត្តិការរបស់ខ្លួនសម្រាប់យុទ្ធសាស្ត្រឥណ្ឌូប៉ាស៊ីហ្វិករបស់សហរដ្ឋអាមេរិក ដែលផ្តោតសំខាន់លើការប្រឆាំងឥទ្ធិពលរបស់ចិននៅក្នុងតំបន់។
ក្រសួងការបរទេសសហរដ្ឋអាមេរិក បានជូនដំណឹងដល់សភាអំពីការលក់អាវុធតម្លៃ ៣,៩៩ ពាន់លានដុល្លារ ដែលនឹងរួមបញ្ចូលយន្តហោះគ្មានមនុស្សបើក Sky Guardian ចំនួន ៣១ គ្រឿង កាំជ្រួច មីស៊ីល Hellfire ១៧០ គ្រាប់ គ្រាប់បែកបំពាក់លើយន្តហោះចម្បាំង ៣១០ គ្រាប់ និងសម្ភារជំនួយដែលពាក់ព័ន្ធ។
ក្រសួងបាននិយាយនៅក្នុងសេចក្តីថ្លែងការណ៍មួយថា៖ «ការលក់ដែលបានស្នើឡើងនេះ នឹងគាំទ្រដល់គោលនយោបាយការបរទេស និងគោលបំណងសន្តិសុខជាតិរបស់សហរដ្ឋអាមេរិក ដោយជួយពង្រឹងទំនាក់ទំនងយុទ្ធសាស្ត្ររវាងសហរដ្ឋអាមេរិក និងឥណ្ឌា ហើយវានឹងធ្វើឱ្យប្រសើរឡើងនូវសន្តិសុខនៃដៃគូ ការពារជាតិដ៏សំខាន់មួយរបស់ខ្លួន ដែលនៅតែបន្តជាកម្លាំងដ៏សំខាន់សម្រាប់ស្ថិរភាពនយោបាយ សន្តិភាព និងវឌ្ឍនភាពសេដ្ឋកិច្ចនៅក្នុងតំបន់ឥណ្ឌូប៉ាស៊ីហ្វិក និងអាស៊ីខាងត្បូង»។
សេចក្តីថ្លែងការណ៍ដដែលនេះក៏បានបញ្ជាក់ថា៖ «វានឹងធ្វើឱ្យប្រសើរឡើងនូវសមត្ថភាពរបស់ប្រទេសឥណ្ឌាក្នុងការទប់ទល់នឹងការគំរាមកំហែងនាពេលបច្ចុប្បន្ន និងអនាគតដោយអនុញ្ញាតឱ្យប្រទេសមួយនេះមានសមត្ថភាពក្នុងការឃ្លាំមើល តាមរយៈយន្តហោះគ្មានមនុស្សបើក និងការល្បាតឈ្លបយកការណ៍នៅក្នុងប្រតិបត្តិការនៃផ្លូវសមុទ្រ»។
ក្រសួងថែមទាំងបានលើកឡើងថា ឥណ្ឌាបានបង្ហាញពីការប្តេជ្ញាចិត្តក្នុងការធ្វើទំនើបកម្មយោធារបស់ខ្លួន ហើយនឹងមិនមានការពិបាកក្នុងការស្រូបយកបច្ចេកវិទ្យា និងសេវាកម្មទាំងនេះដាក់ចូលទៅក្នុងកងកម្លាំងប្រដាប់អាវុធរបស់គេឡើយ៕
