ជំនួបរវាងរដ្ឋមន្ត្រីការបរទេសអាមេរិកលោក អាន់តូនី ប្ល៊ីនកែន (Antony Blinken) និងរាជ្ជទាយាទនៃប្រទេសអារ៉ាប៊ីសាអ៊ូឌីត ព្រះអង្គម្ចាស់ Mohammed bin Salman។ AFP
រដ្ឋមន្ត្រីការបរទេសអាមេរិក លោក អាន់តូនី ប្ល៊ីនកែន (Antony Blinken) នៅថ្ងៃទី៥ ខែកុម្ភៈ ២០២៤ នេះ បានជួបជា មួយរាជ្ជទាយាទនៃប្រទេសអារ៉ាប៊ីសាអ៊ូឌីត ព្រះអង្គម្ចាស់ Mohammed bin Salman។ ជំនួបនេះ ធ្វើឡើងមុនគេបង្អស់ក្នុងដំណើរទស្សនកិច្ចទៅកាន់តំបន់មជ្ឈិមបូព៌ារបស់លោក ប្ល៊ីនកែន។
យ៉ាងណាមិញគោលបំណងសំខាន់នៃដំណើរទស្សនកិច្ចទៅកាន់តំបន់មជ្ឈិមបូព៌ា របស់មន្ត្រីការបរទេសអាមេរិក នាពេលនេះគឺដើម្បីផ្សះផ្សានិងចរចារកបទឈប់បាញ់ថ្មីមួយទៀត សម្រាប់សង្គ្រាមអ៊ីស្រាអែល-ហាម៉ាស់។
នៅតំបន់ហ្គាហ្សាឯណោះវិញប្រជាជនប៉ាឡេស្ទីន ដែលកំពុងគេចខ្លួនពីការទម្លាក់គ្រាប់បែកបាននិយាយថាពួកគេដាក់ក្ដីសង្ឃឹមលើដំណើរទស្សនកិច្ចរបស់លោក ប្ល៊ីនកែន ទៅកាន់តំបន់មជ្ឈិមបូព៌ាថា នឹងអាចរកបានបទឈប់បាញ់ឱ្យបានទាន់ពេលវេលាដើម្បីផ្ដល់ឱកាសឱ្យប្រជាជនស៊ីវិលទាំងប៉ុន្មានអាចភៀសខ្លួនចេញមុនពេលដែលអ៊ីស្រាអែលវាយលុកតំបន់ចុងក្រោយនោះ។
ដោយឡែកជំនួបរបស់លោក ប្ល៊ីនកែន ជាមួយរាជ្ជទាយាទអារ៉ាប៊ីសាអ៊ូឌីត កាលពីពេលកន្លងទៅ មានរយៈពេលប្រហែល ២ម៉ោង។ប៉ុន្តែយ៉ាងណាលោកប្ល៊ីនកែនមិនបានឆ្លើយតបនឹងសំណួរដែលរបស់អ្នកកាសែតអំពីលទ្ធផលនៃជំនួបនោះទេ។
ក្រៅពីជំនួបជាមួយរាជ្ជទាយាទរបស់អារ៉ាប៊ីសាអ៊ូឌីត លោក ប្ល៊ីន កែន ក៏គ្រោងនឹងទៅបំពេញទស្សនកិច្ចនៅប្រទេសអេហ្ស៊ីបកាតាអ៊ីស្រាអែល និងតំបន់ West Bank ដែលជាតំបន់ស្ថិតក្រោមការគ្រប់គ្រងរបស់អ៊ីស្រាអែលក្រោយផ្ទុះសង្គ្រាមស្រដៀងនឹងតំបន់ហ្គាហ្សា។
ជំនួបជាមួយប្រទេសទាំងនេះ អាមេរិក ក៏នៅតែរក្សាគោលបំណងដដែលគឺស្វែងរកបទឈប់បាញ់។ ប៉ុន្តែគេអាចនឹងមានសង្ឃឹមវិញបន្តិចព្រោះប្រទេសអេហ្ស៊ីប និងកាតា នេះហើយ ដែលជាអ្នកចរចារកបានបទឈប់បាញ់ចំនួន៣ដងកាលពីចុងខែវិច្ឆិកា ឆ្នាំ២០២៣ កន្លងទៅ។
នេះជាដំណើរទស្សនកិច្ចលើកទី៥ ហើយរបស់មន្ត្រីការបរទេសអាមេរិក ទៅកាន់តំបន់មជ្ឈិមបូព៌ា ចាប់តាំងពីផ្ទុះសង្គ្រាមកាលពីខែតុលាឆ្នាំ២០២៣ មក។ ជម្លោះនេះ មិនត្រឹមតែជាជម្លោះឯកតោភាគីរវាងអ៊ីស្រាអែល និងក្រុមហាម៉ាស់ ប៉ុណ្ណោះទេតែក៏បានរីកសាយភាយពាសពេញតំបន់មជ្ឈិមបូព៌ាទាំងមូលនិងឈានទៅជះឥទ្ធិពលរហូតដល់ការធ្វើពាណិជ្ជកម្មអន្តរជាតិទៀតផង។
មិនត្រឹមតែប៉ុណ្ណោះថ្មីៗនេះ ក្រុមឧទ្ទាមដែលជាសម្ព័ន្ធមិត្តរបស់ប្រទេសអ៊ីរ៉ង់ ក៏បានធ្វើឱ្យប៉ះពាល់ដល់អាយុជីវិតទាហានអាមេរិក ដែលនាំឱ្យប្រទេសមហាអំណាចមួយនេះ ប្ដេជ្ញាតបស្នងវិញដោយមិនញញើតដៃផងដែរ។
បទឈប់បាញ់រវាងអ៊ីស្រាអែល និងហាម៉ាស់ កាលពីថ្ងៃទី២៤ ខែវិច្ឆិកា ដល់ថ្ងៃទី១ ខែធ្នូ កន្លងទៅ បានអនុញ្ញាតឱ្យមានការដោះលែងចំណាប់ខ្មាំងអ៊ីស្រាអែល បាន ៨០ នាក់ និងចំណាប់ខ្មាំងប៉ាឡេស្ទីនចំនួន ២៤០ នាក់។ ប៉ុន្តែយ៉ាងណាកិច្ចព្រមព្រៀងនេះហាក់មានភាពផុយស្រួយខ្លាំងដោយកាលណោះគ្រាន់តែចប់កិច្ចព្រមព្រៀងភ្លាមអ៊ីស្រាអែល-ហាម៉ាស់បានចាប់ផ្ដើមការប្រយុទ្ធគ្នាភ្លាមៗតែម្ដង៕
