លោក ភិថា លីមចារើនរ៉ាត់ (Pita Limjaroenrat) អតីតបេក្ខជននាយករដ្ឋមន្ត្រី និងជាអតីតមេដឹកគណបក្សឈានទៅមុខ (Move Forward Party)។ AFP
តុលាការថៃបានសម្រេចផ្តន្ទារទោសដោយការព្យួរទោស លោក ភិថា លីមចារើនរ៉ាត់ (Pita Limjaroenrat) អតីតបេក្ខជននាយករដ្ឋមន្ត្រី និងជាអតីតមេដឹកគណបក្សឈានទៅមុខ (Move Forward Party) និងឥស្សរជននយោបាយចំនួន ៧ រូបផ្សេងទៀតពីបទរៀបចំការបាតុកម្មខុសច្បាប់កាលពីឆ្នាំ ២០១៩។
គណបក្សឈានទៅមុខដែលកំពុងដើរតួជាគណបក្សប្រឆាំងនៅក្នុងសភា កំពុងប្រឈមមុខនឹងបញ្ហាផ្លូវច្បាប់កាន់តែច្រើន ខណៈដែលសំណុំរឿងតុលាការកាន់តែកើនឡើងជាបន្តបន្ទាប់។ ជាក់ស្ដែង តុលាការធម្មនុញ្ញថៃបានសម្រេចថា គណបក្សនេះបានធ្វើឱ្យខូចខាតដល់គុណតម្លៃរបបរាជានិយម និងសន្តិសុខជាតិ តាមរយៈការធ្វើយុទ្ធនាការធ្វើវិសោធនកម្មច្បាប់ស្ដីពីព្រះមហាក្សត្រ និងរាជវង្សានុវង្សពីការរិះគន់។
តុលាការស្រុកប៉ាធុមវ៉ាន់ (Pathumwan) នៅទីក្រុងបាងកកបានកាត់ទោសសមាជិកសំខាន់ៗចំនួន ៦ រូប មកពីគណបក្សឈានទៅមុខនិងសកម្មជន ២ រូបទៀត ឱ្យជាប់ពន្ធនាគាររយៈពេល ៤ ខែ និងពិន័យជាប្រាក់ចំនួន ១១ ២០០ បាតថៃស្មើនឹង ៣១៣ ដុល្លារសហរដ្ឋអាមេរិក នេះបើយោងតាមមេធាវី លោក គ្រីសាដាង នូឆារូស (KrisadangNutcharus)។
លោកមេធាវីបានឱ្យដឹងថា ការចោទប្រកាន់នេះកើតចេញពីការតវ៉ាដែលពួកគេបានរៀបចំធ្វើបាតុកម្មកាលពីខែធ្នូ ឆ្នាំ ២០១៩ នៅទីក្រុងបាងកក ដែលមានការចូលរួមពីអ្នកគាំទ្ររាប់ពាន់នាក់។
លោកមេធាវីខាងលើបានបញ្ជាក់ថា មនុស្សចំនួន ៨ រូប ក្នុងនោះក៏មាននាយកប្រតិបត្តិធុរកិច្ចដ៏ល្បីល្បាញ លោកថាណាថន ចួងរូងរួងគិត (Thanathorn Juangroongruangkit) និងសមាជិកសភា លោក ពីយ៉ាប៊ុត សែងកាណូគុល (PiyabutrSaengkanokkul) មានបំណងបន្តប្តឹងឧទ្ធរណ៍ចំពោះសេចក្ដីសម្រេចសាលក្រមនេះ។
ប្រសិនបើបណ្តឹងឧទ្ធរណ៍របស់លោក ភិថា មិនអាចទទួលបានជោគជ័យ ហើយតុលាការតម្កល់សាលក្រម នោះលោកអាចនឹងប្រឈមមុខនឹងការដកសិទ្ធិចេញពីសភា ព្រោះច្បាប់នៅប្រទេសថៃមានការហាមប្រាមបុគ្គលដែលត្រូវបានកាត់ទោសពីបទឧក្រិដ្ឋធ្ងន់ធ្ងរមិនឱ្យមានអាសនៈនៅក្នុងសភា។
ម្យ៉ាងវិញទៀត គណបក្សប្រឆាំងមួយនេះកំពុងស្ថិតនៅក្នុងស្ថានភាពពិបាកដែលអាចឈានដល់ការរំលាយ ហើយមេដឹកនាំរបស់ខ្លួនអាចត្រូវបានរារាំងមិនឱ្យធ្វើនយោបាយ ដោយសារតែបញ្ហាប្រឈមផ្លូវច្បាប់ថ្មីបន្ទាប់ពីសេចក្តីសម្រេចរបស់តុលាការធម្មនុញ្ញ។
គណបក្សឈានទៅមុខដែលជាគណបក្សធំជាងគេនៅក្នុងសភា មានភាពលេចធ្លោខ្លាំង ដោយបានទទួលបានជ័យជម្នះដ៏គួរឱ្យភ្ញាក់ផ្អើលនៅក្នុងការបោះឆ្នោតកាលពីឆ្នាំមុន។ គណបក្សនេះបានផ្ដោតលើរបៀបវារៈនយោបាយលុបបំបាត់ភាពផ្តាច់មុខអាជីវកម្ម និងកាត់បន្ថយឥទ្ធិពលរបស់យោធានៅក្នុងនយោបាយថៃ។
គំនិតសេរីនិយមរបស់គណបក្ស និងការគាំទ្រខ្លាំងពីអ្នកបោះឆ្នោតវ័យក្មេងនៅតាមបណ្ដាទីក្រុងនានា បានបង្កឱ្យមានការផ្លាស់ប្ដូរសណ្តាប់ធ្នាប់សង្គមនយោបាយថៃដែលធ្លាប់មានកន្លងមក។ យ៉ាងណាក៏ដោយ កាលពីឆ្នាំមុន ការព្យាយាមបង្កើតរដ្ឋាភិបាលរបស់គណបក្សឈានទៅមុខ បានបរាជ័យដោយមានការរារាំងពីសមាជិកព្រឹទ្ធសភាដែលត្រូវបានតែងតាំងដោយរបបយោធា និងជាក្រុមអភិរក្សនិយម៕
