ប្រធានាធិបតីហ្វីលីពីន លោក ហ្វឺរឌីណង់ ម៉ាកូស ជូនៀ (Ferdinand Marcos Jr) AFP
ស្ថានទូតចិន ប្រចាំប្រទេសហ្វីលីពីន បានទទូចថា រដ្ឋាភិបាលចិនប្រឆាំង និងបង្រ្កាបគ្រប់ទម្រង់ណាមួយនៃការវាយប្រហារតាមអ៊ីនធឺណិត ក្រោយហ្វីលីពីនបានអះអាងពីការប៉ុនប៉ងវាយប្រហារតាមអ៊ិនធឺណិតលើគេហទំព័ររដ្ឋាភិបាលហ្វីលីពីន ពីក្រុមហែកឃឺមកពីចិន។
ទីភ្នាក់ងារសារព័ត៌មានរ៉យទ័រ បានចុះផ្សាយដោយស្រង់សម្ដីអ្នកនាំពាក្យស្ថានទូតចិន ដែលបាននិយាយកាលពីយប់ថ្ងៃចន្ទ យ៉ាងដូច្នេះថា៖ «រដ្ឋាភិបាលចិន ប្រឆាំងយ៉ាងម៉ឺងម៉ាត់ និងបង្ក្រាបរាល់ទម្រង់នៃការវាយប្រហារតាមប្រព័ន្ធអ៊ិនធឺណិត ដោយស្របតាមច្បាប់ប្រទេស»។
អ្នកនាំពាក្យដដែលបន្តថា៖«រដ្ឋាភិបាលចិន មិនអនុញ្ញាតឱ្យប្រទេស ឬបុគ្គលណាមួយ ចូលរួមក្នុងការវាយប្រហារតាមអ៊ិនធឺណិត និងសកម្មភាពខុសច្បាប់ផ្សេងៗទៀតនៅលើដីចិន ឬប្រើប្រាស់ហេដ្ឋារចនាសម្ព័ន្ធរបស់ចិននោះទេ»។
ការលើកឡើងយ៉ាងដូច្នេះរបស់ស្ថានទូតចិន ធ្វើឡើងបន្ទាប់ពីប្រទេសហ្វីលីពីន កាលពីថ្ងៃចន្ទ បាននិយាយថា ពួកចោរបច្ចេកវិទ្យាអនាមិក (Hackers) មកពីប្រទេសចិន កាលពីខែមុន បានប៉ុនប៉ងហែកចូលទៅក្នុងគេហទំព័ររបស់រដ្ឋាភិបាល រួមទាំងគេហទំព័រផ្ទាល់ខ្លួនរបស់លោកប្រធានាធិបតី ហ្វឺរឌីណង់ ម៉ាកូស ជូនៀ (Ferdinand Marcos Jr) ប៉ុន្តែមិនបានសម្រេច។
ហ្វីលីពីនមិនបានបង្ហើបថា ពួកហែកឃឺរ មានទំនាក់ទំនងជាមួយរដ្ឋបរទេសណាមួយនោះទេ ប៉ុន្តែអះអាងថា ពួកគេបានប្រើប្រាស់សេវាកម្មអ៊ិនធឺណិតរបស់ក្រុមហ៊ុនទូរគមនាគមន៍រដ្ឋចិន Unicom។ ក្រុមហ៊ុន Unicom មិនបានប្រតិកម្មភ្លាមៗចំពោះការណ៍នេះទេ។
បច្ចុប្បន្ន ហ្វីលីពីនកំពុងធ្វើការលើយុទ្ធសាស្ត្រសន្តិសុខតាមអ៊ីនធឺណិតរយៈពេល៥ឆ្នាំ ដើម្បីពង្រឹងការការពារតាមអ៊ិនធឺណិតរបស់ខ្លួន។ យោធារបស់ប្រទេសនេះ កាលពីឆ្នាំមុនបានប្រកាសថា ខ្លួននឹងបង្កើតអង្គភាពប្រឆាំងនឹងការវាយប្រហារតាមអ៊ីនធឺណិត៕
