អនុរដ្ឋមន្ត្រីការបរទេសថៃលោក ស៊ីហាសាក់ ភួងកេតកែវ (SihasakPhuangketkeow)។ Reuteurs
អនុរដ្ឋមន្ត្រីការបរទេសថៃលោក ស៊ីហាសាក់ ភួងកេតកែវ (SihasakPhuangketkeow) បានថ្លែងថា គំនិតផ្តួចផ្តើមមនុស្សធម៌ថ្មី ដែលដឹកនាំដោយប្រទេសថៃ មានគោលបំណងត្រួសត្រាយផ្លូវឆ្ពោះទៅរកកិច្ចពិភាក្សាស្ដីពីជម្លោះផ្ទៃក្នុងនៃប្រទេសមីយ៉ាន់ម៉ា ដែលកំពុងគ្រប់គ្រងដោយរបបយោធា។ នេះបើតាមការរាយការណ៍ទីភ្នាក់ងារសារព័ត៌មាន រ៉យទ័រ។
លោក ស៊ីហាសាក់ លើកឡើងថា តាមរយៈគំនិតផ្ដួចផ្ដើមផ្ដល់ជំនួយ ប្រទេសថៃគ្រោងនឹងបង្កើតតំបន់សុវត្ថិភាពមនុស្សធម៌នៅចុងខែនេះ នៅឯព្រំដែនជាប់មីយ៉ាន់ម៉ា ក្បែរច្រកឆ្លងកាត់ព្រំដែន Mae Sot Myawaddy ដើម្បីចែកចាយស្បៀងអាហារ និងការផ្គត់ផ្គង់ថ្នាំពេទ្យដល់សហគមន៍មូលដ្ឋាន និងមនុស្ស ២០ ០០០ នាក់ ដែលត្រូវរត់ភៀសខ្លួនដោយសារការប្រយុទ្ធគ្នាក្នុងប្រទេសមីយ៉ាន់ម៉ា។
មន្ត្រីការទូតជាន់ខ្ពស់ថៃដដែល បាននិយាយថា ផែនការនេះនឹងបង្កើនកិច្ចខិតខំប្រឹងប្រែងដោយសមាជិកទាំង១០ប្រទេសនៃសមាគមប្រជាជាតិអាស៊ីអាគ្នេយ៍ ហៅកាត់«អាស៊ាន» ដែលព្យាយាមតែមិនជោគជ័យក្នុងការចាប់ផ្តើមដំណើរការសន្តិភាពរវាងយោធា និងកងកម្លាំងតស៊ូប្រដាប់អាវុធផ្សេងៗ។
លោក ស៊ីហាសាក់ បានបញ្ជាក់ថា គោលដៅសំខាន់នៃគំនិតផ្ដួចផ្ដើម គឺធ្វើយ៉ាងណាឱ្យគេអាចគ្រប់គ្រងជម្លោះ និងបើកបណ្តាញសន្ទនាដើម្បីស្វែងរកដំណោះស្រាយ។ លោកបន្តថា៖«យើងមិនចង់ឃើញប្រទេសមីយ៉ាន់ម៉ាមានអស្ថិរភាពបន្ថែមទៀតទេ» ហើយបន្ថែមថា ដំណើរការលើបញ្ហានេះ ត្រូវតែមាន«ប្រសិទ្ធភាព ភាពគួរឱ្យទុកចិត្ត និងតម្លាភាព»។
គំនិតផ្តួចផ្តើមផ្ដល់ជំនួយ ដែលត្រូវបានអនុម័តកាលពីសប្តាហ៍មុនដោយរដ្ឋមន្ត្រីការបរទេសអាស៊ាន និងអ្នកតំណាងមកពីប្រទេសមីយ៉ាន់ម៉ា នឹងបើកផ្លូវឱ្យកាកបាទក្រហមប្រទេសថៃនិងមីយ៉ាន់ម៉ាដើម្បីផ្តល់ការផ្គត់ផ្គង់ជំនួយដោយផ្ទាល់ ក្រោមការសង្កេតរបស់ស្ថាប័នជំនួយមនុស្សធម៌របស់អាស៊ាន។
មីយ៉ាន់ម៉ាបានជាប់គាំងនៅក្នុងជម្លោះ ចាប់តាំងពីក្រុមយោធាបានធ្វើរដ្ឋប្រហារដណ្តើមអំណាចក្នុងខែកុម្ភៈ ឆ្នាំ ២០២១ ដែលបង្កជាចលនាតស៊ូប្រឆាំងនឹងរបបយោធា ហើយបង្កើតការប៉ះទង្គិចគ្នាដោយបង្ហូរឈាមសម្លាប់ជនស៊ីវិលរាប់ពាន់នាក់។ អង្គការសហប្រជាជាតិបាននិយាយថា មនុស្សយ៉ាងហោចណាស់ ២,៦ លាននាក់ បានផ្លាស់ទីលំនៅរស់នៅដោយសារតែការប្រយុទ្ធគ្នា ហើយប្រជាជនមីយ៉ាន់ម៉ា ១៨ លាននាក់កំពុងត្រូវការជំនួយមនុស្សធម៌៕
