ត្រីបាឡែនពិឃាតប្រមាណ ១០ ក្បាល ជាប់ក្នុងផ្ទាំងទឹកកកនៅសមុទ្រហុកកៃដូ ប្រទេសជប៉ុន។ AFP
ត្រីបាឡែនពិឃាតជាង ១០ ក្បាល ត្រូវបានគេរាយការណ៍ថាបានជាប់នៅក្នុងផ្ទាំងទឹកកកដ៏ក្រាស់មួយនៅឯឆ្នេរសមុទ្រហុកកៃដូភាគខាងជើងប្រទេសជប៉ុន ខណៈដែលក្រុមអ្នកស្រាវជ្រាវព្យាករថា វាអាចបាត់បង់ជីវិតដោយសារស្ថានភាពទឹកកកកាន់តែកើនឡើងនៅតំបន់នោះ។
ត្រីបាឡែនពិឃាតឬហៅម្យ៉ាងទៀតថាអ័រកា (orcas) ត្រូវបានគេមើលឃើញថាកំពុងតស៊ូជម្នះ និងលោតចេញពីចន្លោះតូចមួយនៅផ្ទៃខាងលើផ្ទៃទឹកនៅក្នុងឃ្លីបដែលចាក់ផ្សាយដោយទូរទស្សន៍សាធារណៈ NHK កាលពីថ្ងៃទី ៦ ខែកុម្ភៈ។
លោក Seiichiro Tsuchiya ដែលបានថតវីដេអូដែលត្រូវបានបង្ហោះនៅលើទំព័រហ្វេសប៊ុករបស់Wildlife Pro LLC បានប្រាប់ទូរទស្សន៍ NHK ថា៖ «ខ្ញុំបានឃើញត្រីបាឡែនពិឃាតប្រហែល ១៣ ក្បាល ដែលយកក្បាលរបស់វាបុកចេញពីរន្ធផ្ទៃទឹកកក»។
អ្នកជំនាញជីវិតសមុទ្រស្ថិតក្នុងតំបន់ធ្វើការស្រាវជ្រាវលើចំនួនសត្វតោសមុទ្រក្នុងតំបន់។
លោក Tsuchiya បាននិយាយថា៖ «ត្រីបាឡែនទាំងនោះហាក់ដូចជាពិបាកដកដង្ហើមហើយវាហាក់ដូចជាពួកវារួមបញ្ចូលកូន ៣ ឬ ៤ ផង»។
មន្ត្រីឆ្មាំសមុទ្រជប៉ុនបាននិយាយថា ពួកគេត្រូវបានជូនដំណឹងដោយអ្នកនេសាទក្នុងតំបន់នៅព្រឹកថ្ងៃទី ៦ ខែកុម្ភៈថា orcas ត្រូវបានជាប់នៅចន្លោះផ្ទាំងទឹកកកចេញពីទីក្រុង Rausu ភាគខាងកើតកោះហុកកៃដូ។ ផ្ទាំងទឹកកក គឺជាផ្ទាំងទឹកកកអណ្តែត។
ទោះបីជាយ៉ាងណាក៏ដោយមន្ត្រីមកពីតំបន់ Rausu បាននិយាយថាពួកគេគ្មានមធ្យោបាយ ដើម្បីជួយសង្គ្រោះសត្វដែលត្រូវបានគេប្រទះឃើញនៅចម្ងាយប្រហែល ១ គីឡូម៉ែត្រពីឆ្នេរសមុទ្រនោះទេ។
មន្ត្រីក្រុងតំបន់ Rausu បានប្រាប់ NHK ថា៖ «យើងគ្មានជម្រើសអ្វីក្រៅពីរង់ចាំឱ្យផ្ទាំងទឹកកកបែកហើយដើម្បីឱ្យពួកវាគេចចេញពីផ្លូវនោះ»។
មន្ត្រីឧតុនិយមក្នុងតំបន់ក៏បាននិយាយផងដែរថាផ្ទាំងទឹកកកប្រហែលជាកាន់តែធំជាងមុនខណៈដែលទឹករលកកក។
Orcas គឺជាថនិកសត្វសមុទ្រហើយពួកវាអាចអត់ដង្ហើមបានរហូតដល់ ១៥ នាទីនៅក្រោមទឹក។ នេះបើយោងតាមមជ្ឈមណ្ឌលស្រាវជ្រាវត្រីបាឡែនដែលមានមូលដ្ឋាននៅសហរដ្ឋអាមេរិក។
ក្នុងឆ្នាំ ២០០៥ ក្រុមត្រីបាឡែន Orcas ១ ក្រុម ត្រូវបានជាប់នៅក្នុងស្ថានភាពស្រដៀងគ្នានេះហើយភាគច្រើននៃពួកវាត្រូវបានគេរាយការណ៍ថា បានងាប់។នេះបើយោងតាម NHK ដោយដកស្រង់សម្តីមន្ត្រីក្រុង Rausu។
Rausu គឺជាកន្លែងមើលត្រីបាឡែនដ៏ពេញនិយមនៅក្នុងប្រទេសជប៉ុនហើយទឹកកកសមុទ្រដែលរសាត់គឺជាទិដ្ឋភាពទូទៅក្នុងរដូវរងា៕
