ប្រជាជនចូលរួមពិធីបង្ហូតទង់ជាតិចិននៅថ្ងៃបុណ្យជាតិឆ្នាំ២០២៣នៅទីលាន Tiananmen ក្នុងទីក្រុងប៉េកាំង។ AFP
ក្រុមអ្នកឃ្លាំមើលឌីជីថល Citizen Lab បានចេញរបាយការណ៍ថ្មីកាលពីថ្ងៃពុធ ដោយរកឃើញថា ក្រុមហ៊ុនចិននៅពីក្រោយការបង្កើតគេហទំព័រព័ត៌មានជាង ១០០ ដែលបន្លំខ្លួនជាសារព័ត៌មានក្នុងស្រុកនៅអឺរ៉ុប អាស៊ី និងអាមេរិកឡាទីនដើម្បីជំរុញការឃោសនាមាតិកាគាំទ្ររដ្ឋាភិបាលចិន ក្នុងយុទ្ធនាការបន្សាយឥទ្ធិពលបម្រើប្រយោជន៍ឱ្យទំនាក់ទំនងសាធារណៈសម្រាប់រដ្ឋាភិបាលចិន។
របាយការណ៍របស់ Citizen Lab ដែលមានមូលដ្ឋាននៅប្រទេសកាណាដា បាននិយាយថា ការឃោសនាដែលផ្សព្វផ្សាយឡើងលើគេហទំព័រព័ត៌មានក្នុងប្រទេសជាង ៣០ ត្រូវបានលាយបញ្ចូលគ្នាជាមួយនឹងព័ត៌មាន ដែលទាញយកពីបណ្តាញព័ត៌មានក្នុងស្រុក និងប្រព័ន្ធផ្សព្វផ្សាយរដ្ឋចិន។
អ្នកស្រាវជ្រាវរបស់ Citizen Lab លោកAlberto Fittarelliបាននិយាយក្នុងរបាយការណ៍ដដែលថា៖ «ខណៈគេហទំព័រទាំងនោះ មិនទាន់មានគេតាមដានច្រើននាពេលបច្ចុប្បន្ន វាមានហានិភ័យខ្ពស់ដែលវានឹងរីកសាយភាយឡើងដោយសារប្រព័ន្ធផ្សព្វផ្សាយក្នុងស្រុក និងទស្សនិកជនគោលដៅ ដែលនេះជាលទ្ធផលនៃកំណើនយ៉ាងឆាប់រហ័សនៃគេហទំព័រទាំងនោះនិងការសម្របខ្លួនរបស់ពួកគេទៅនឹងភាសា និងមាតិកាក្នុងស្រុក»។
របាយការណ៍អះអាងថា ខ្លឹមសារនៃគេហទំព័រទាំងនោះ មានជាប់ទាក់ទងនឹងទ្រឹស្តីឃុបឃិត ដែលជារឿយៗលើកឡើងអំពីសហរដ្ឋអាមេរិក ឬសម្ព័ន្ធមិត្តរបស់មហាអំណាចមួយនេះ ឧទាហរណ៍ជាក់ស្ដែងដូចជា ការស្តីបន្ទោសអ្នកវិទ្យាសាស្ត្រអាមេរិក ចំពោះការ «លេចធ្លាយ» វីរុសកូវីដ ១៩ ជាដើម។ ក្រៅពីនេះ ក្រុមគេហទំព័រព័ត៌មានដដែល ក៏ប្រមូលផ្ដុំផងដែរនូវអត្ថបទវាយប្រហារអ្នករិះគន់រដ្ឋាភិបាលចិន។
គេមើលឃើញថា វាកម្រណាស់ដែលអ្នកស្រាវជ្រាវតភ្ជាប់ប្រតិបត្តិការបែបនេះ ទៅនឹងអង្គភាពជាក់លាក់ណាមួយ។ ប៉ុន្តែCitizen Lab បាននិយាយថា យុទ្ធនាការបង្កើតគេហទំព័រព័ត៌មាននេះ បានចាប់ផ្តើមនៅពាក់កណ្តាលឆ្នាំ ២០២០ ហើយមានបណ្តាញទៅកាន់ក្រុមហ៊ុនទំនាក់ទំនងសាធារណៈ Shenzhen Haimaiyunxiang Media Co., Ltd. ដែលគេស្គាល់ជាទូទៅថា Haimai។
ក្រុមហ៊ុន Haimai មិនទាន់ចេញប្រតិកម្មយ៉ាងណានោះទេ ពាក់ព័ន្ធនឹងរបាយការណ៍របស់ Citizen Lab។ យ៉ាងណាមិញ អ្នកនាំពាក្យស្ថានទូតចិនប្រចាំទីក្រុងវ៉ាស៊ីនតោន បាននិយាយថា៖ «ជាគោលការណ៍ វាជាការលម្អៀង និងការមានស្តង់ដា ២ ក្នុងការចោទប្រកាន់ថា ខ្លឹមសារ និងរបាយការណ៍ដែលគាំទ្រចិនគឺជាព័ត៌មានមិនពិត ហើយហៅអ្នកប្រឆាំងចិនថា ផ្សាយព័ត៌មានពិត។
ខណៈយុទ្ធនាការបន្សាយឥទ្ធិពលតាមអ៊ីនធឺណិត កាន់តែក្លាយជារឿងធម្មតាទៅៗសម្រាប់បុគ្គលមានអំណាច និងរដ្ឋាភិបាលនានា មិនថាតែចិន ជុំវិញពិភពលោក អ្នកជំនាញដែលតាមដានប្រតិបត្តិការបែបនេះ បាននិយាយថាចិនគឺជាប្រភពដ៏ធំបំផុតមួយដែលប្រតិបត្តិការយុទ្ធនាការបែបនេះ ទន្ទឹមគ្នានឹងប្រទេសរុស្ស៊ី និងអ៊ីរ៉ង់៕
