ប្រជាជនប៉ាគីស្ថាន ទៅបោះឆ្នោតសភានៅថ្ងៃទី៨ ខែកុម្ភៈ។ AFP
អំពើហិង្សាបានផ្ទុះឡើងក្នុងប្រទេសប៉ាគីស្ថាន ចំថ្ងៃបោះឆ្នោត ដែលបណ្តាលឱ្យមនុស្សយ៉ាងហោចណាស់មនុស្ស ៥ នាក់ត្រូវបានសម្លាប់នៅក្នុងការវាយប្រហារដោយក្រុមសកម្មប្រយុទ្ធ។
អាជ្ញាធរបានផ្អាកជាបណ្តោះអាសន្ននូវសេវាទូរស័ព្ទនៅទូទាំងប្រទេស និងបិទព្រំដែនដីគោកមួយចំនួនដើម្បីរក្សាច្បាប់ និងសណ្តាប់ធ្នាប់ ក្រោយមានការបំផ្ទុះ២កន្លែងផ្សេងគ្នាកើតមានមួយថ្ងៃមុនការបោះឆ្នោតមកដល់។
យោងតាមរ៉យទ័រក្រសួងមហាផ្ទៃប៉ាគីស្ថាន បាននិយាយថា ខ្លួនបានចាត់វិធានការបន្ទាប់ពីមនុស្សយ៉ាងតិច ២៦នាក់ត្រូវបានសម្លាប់នៅក្នុងការបំផ្ទុះ២កន្លែងនៅជិតការិយាល័យបេក្ខជនបោះឆ្នោតក្នុងខេត្ត Balochistan ភាគនិរតីកាលពីថ្ងៃទី៧ខែកុម្ភៈ។ ក្រុមរដ្ឋអ៊ីស្លាមអ៊ីរ៉ាក់ និងស៊ីរី (ISIS) ក្រោយមកបានអះអាងទទួលខុសត្រូវចំពោះការវាយប្រហារទាំងនោះ។
ក្រសួងបាននិយាយនៅក្នុងសារបង្ហោះនៅលើបណ្តាញសង្គម X ថា៖«ដោយសារលទ្ធផលនៃឧប្បត្តិហេតុនៃអំពើភេរវកម្មនាពេលថ្មីៗនេះក្នុងប្រទេសបានបាត់បង់ជីវិតដ៏មានតម្លៃ វិធានការសន្តិសុខមានសារៈសំខាន់ណាស់ដើម្បីរក្សាស្ថានភាពច្បាប់ និងសណ្តាប់ធ្នាប់ និងដោះស្រាយការគំរាមកំហែងដែលអាចកើតមាន»។
ទាហានរាប់ពាន់នាក់ត្រូវបានដាក់ពង្រាយនៅតាមដងផ្លូវ និងនៅតាមការិយាល័យបោះឆ្នោតទូទាំងប្រទេស ហើយព្រំដែនជាប់អ៊ីរ៉ង់ និងអាហ្វហ្គានីស្ថានត្រូវបានបិទជាបណ្តោះអាសន្ន។
មេប៉ូលិសក្នុងតំបន់ លោក Rauf Qaisrani បាននិយាយថា ប៉ូលិសបួននាក់បានស្លាប់នៅក្នុងការបំផ្ទុះគ្រាប់បែក និងការបាញ់ប្រហារទៅលើក្រុមល្បាតរបស់ប៉ូលីសនៅក្នុងតំបន់ Kulachi នៃស្រុក Dera Ismail Khan នៅភាគពាយព្យ។
មនុស្សម្នាក់ត្រូវបានសម្លាប់នៅពេលខ្មាន់កាំភ្លើងបានបើកការបាញ់ប្រហារលើរថយន្តរបស់កងកម្លាំងសន្តិសុខក្នុងទីក្រុង Tank ចម្ងាយប្រហែល ៤០ គីឡូម៉ែត្រទៅភាគខាងជើង។
លោក Saeed Ahmed Umrani ស្នងការនៃភូមិភាគ Makran បានប្រាប់រ៉យទ័រថា ការវាយប្រហារដោយគ្រាប់បែកដៃត្រូវបានគេរាយការណ៍ផងដែរនៅក្នុងផ្នែកផ្សេងៗនៃ Balochistan ប៉ុន្តែការប៉ះឆ្នោតនៅតែមិនមានផលប៉ះពាល់ចាប់តាំងពីមិនមានអ្នករងរបួស។
ថ្វីបើមានការព្រួយបារម្ភអំពីសន្តិសុខ និងរដូវរងារដ៏ខ្លាំងក៏ដោយ ប្រជាជនទៅបោះឆ្នោតឈរជួរដ៏វែងបានចាប់ផ្តើមនៅការិយាល័យបោះឆ្នោតជាច្រើនម៉ោង មុនពេលការបោះឆ្នោតនឹងចាប់ផ្តើម៕
