លោក វិកទ័រ អូបាន នាយករដ្ឋមន្ត្រីហុងគ្រីដែលទោរទន់ទៅរក លោក វ៉្លាឌីមៀរ ពូទីន។ AFP
គណៈកម្មការអឺរ៉ុបដែលជារឿយៗមិនចុះសម្រុងជាមួយនាយករដ្ឋមន្ត្រីហុងគ្រីនៅថ្ងៃទី ៧ ខែកុម្ភៈ ឆ្នាំ ២០២៤ បានចាប់ផ្ដើមចាត់វិធានការផ្លូវច្បាប់ប្រឆាំងនឹងច្បាប់អធិបតេយ្យភាពរបស់ប្រទេសហុងគ្រី ដែលផ្តល់សិទ្ធិអំណាចដល់រដ្ឋក្នុងការស៊ើបអង្កេតទៅលើបុគ្គល និងក្រុមដែលហុងគ្រីចាត់ទុកថា មានការគំរាមកំហែងដល់អធិបតេយ្យភាពរបស់ប្រទេសដោយជនជាប់ចោទអាចត្រូវបានកាត់ទោសជាប់ពន្ធនាគាររហូតដល់ទៅ ៣ ឆ្នាំ។
កន្លងមករដ្ឋាភិបាលហុងគ្រីតែងតែប្រឆាំងបំណងរបស់សហភាពអឺរ៉ុបក្នុងការខ្នះខ្នែងជួយអ៊ុយក្រែន ដោយសារតែនាយករដ្ឋមន្ត្រីហុងគ្រី លោក វិកទ័រ អូបាន (Viktor Orban) ដែលជាមិត្តជិតស្និទ្ធរបស់លោក វ្ល៉ាឌីមៀរ ពូទីន តែងប្រើសិទ្ធិវេតូមិនឱ្យសេចក្តីសម្រេចនានារបស់អឺរ៉ុបក្នុងការជួយអ៊ុយក្រែនចេញរួច។ លើសពីនេះទៀត រដ្ឋាភិបាលហុងគ្រីក៏ជាអ្នករារាំងដ៏សំខាន់ខ្ទាស់មិនឱ្យប្រទេសស៊ុយអែតចូលជាសមាជិករបស់អង្គការណាតូ។
នាយករដ្ឋមន្ត្រីហុងគ្រី លោក វិកទ័រ អូបាន បានអះអាងថា ច្បាប់អធិបតេយ្យភាពមានសារៈសំខាន់ណាស់ក្នុងការការពារប្រទេសហុងគ្រីពីការជ្រៀតជ្រែករបស់បរទេស។ ច្បាប់នេះនឹងពឹងផ្អែកលើការិយាល័យការពារអធិបតេយ្យភាពដែលទើបនឹងបង្កើតថ្មី ដែលមានភារកិច្ចប្រមូលព័ត៌មានពីអង្គភាពទទួលមូលនិធិបរទេស ប្រសិនបើសង្ស័យថាអង្គភាពនោះមានឥទ្ធិពលលើនយោបាយនិងការបោះឆ្នោតរបស់ប្រទេសហុងគ្រី។មិនត្រឹមតែប៉ុណ្ណោះ ភ្នាក់ងារសម្ងាត់របស់ប្រទេសនេះក៏មានកាតព្វកិច្ចជួយដល់ការិយាល័យនេះផងដែរ។
សិទ្ធិអំណាចរបស់រដ្ឋហុងគ្រីយ៉ាងទូលំទូលាយដែលមានចែងក្នុងច្បាប់នេះហើយតុលាការក៏គ្មានសិទ្ធិលូកដៃចូលក្នុងសំណុំរឿងផងនោះបានបង្កឱ្យមានការព្រួយបារម្ភយ៉ាងខ្លាំងចំពោះអង្គការសង្គមស៊ីវិលនិងបណ្ដាអ្នកសារព័ត៌មានឯករាជ្យ។
ពួកគេខ្លាចថា រដ្ឋាភិបាលនឹងប្រើច្បាប់នេះចោទប្រកាន់ដោយអយុត្តិធម៌ ជាពិសេសអ្នកដែលប្រឆាំងនឹងរបៀបវារៈនយោបាយរបស់លោក អូបាន។ លើសពីនេះទៀត អ្នកដែលរងការចោទប្រកាន់ គ្មានមធ្យោបាយដើម្បីជំទាស់នឹងការសម្រេចដែលធ្វើឡើងដោយការិយាល័យអធិបតេយ្យភាពនេះ។
គណៈកម្មការអឺរ៉ុបបានបង្ហាញពីការព្រួយបារម្ភដោយបានបញ្ជាក់កាលពីថ្ងៃពុធថា ច្បាប់នេះបានរំលោភលើគុណតម្លៃជាមូលដ្ឋានយ៉ាងច្រើនក្នុងនោះ មានដូចជាគោលការណ៍លទ្ធិប្រជាធិបតេយ្យ សិទ្ធិឯកជនភាព ការការពារទិន្នន័យសេរីភាពនៃការបញ្ចេញមតិព័ត៌មាន និងសមាគមក៏ដូចជាសិទ្ធិទទួលបានការជំនុំជម្រះដោយយុត្តិធម៌ជាដើម។
បន្ថែមលើនេះ សហរដ្ឋអាមេរិកក៏បានរិះគន់ច្បាប់នេះថា ជាច្បាប់ដែលអាចយកទៅបំភិតបំភ័យ និងដាក់ទណ្ឌកម្មអ្នកដែលមានទស្សនៈផ្ទុយពីគណបក្សកាន់អំណាច។
ប្រទេសហុងគ្រី មានរយៈពេល ២ ខែ ដើម្បីឆ្លើយតបទៅនឹងការជំទាស់របស់គណៈកម្មការអឺរ៉ុបដែលបានដាក់លិខិតជូនដំណឹងផ្លូវការរួចស្រេចហើយ។ ការខកខានក្នុងការដោះស្រាយបញ្ហានេះ ហុងគ្រីអាចនឹងឈានទៅដល់ដំណាក់កាលចំណាត់ការផ្លូវច្បាប់ពីគណៈកម្មការអឺរ៉ុប និងរងការផាកពិន័យប្រចាំថ្ងៃដែលសម្រេចដោយតុលាការយុត្តិធម៌អឺរ៉ុប។
ជម្លោះរវាងអឺរ៉ុប និងហុងគ្រី បានកើតឡើងបន្ទាប់ពីកិច្ចប្រជុំកំពូលដ៏សំខាន់មួយដែលលោក អូបាន បានយល់ព្រមគាំទ្រមូលនិធិ ៥០ ពាន់លានអឺរ៉ូសម្រាប់ជួយដល់អ៊ុយក្រែន។ ជាការកត់សម្គាល់ ការសម្រេចចិត្តយល់ព្រមរបស់លោក ធ្វើឡើងបន្ទាប់ពីមានសម្ពាធយ៉ាងច្រើនពីថ្នាក់ដឹកនាំជាច្រើនក្នុងប្រទេសហុងគ្រីផ្ទាល់ និងពីប្រមុខ ប្រទេសសមាជិកសហភាពអឺរ៉ុប៕
