ស្ថានភាពតំបន់ហ្គាហ្សាក្នុងអំឡុងពេលសង្គ្រាម។ AFP
សហរដ្ឋអាមេរិកកាលពីថ្ងៃទី៦ មីនា នៅតែបន្តអះអាងថា កិច្ចពិភាក្សាអំពីបទឈប់បាញ់រវាងអ៊ីស្រាអែល និងហាម៉ាស់នៅតែមានសង្ឃឹម ខណៈដែលអាហ្វ្រិកខាងត្បូងឯណោះវិញបានស្នើសុំឱ្យតុលាការពិភពលោកជួយធ្វើអន្តរាគមន៍បទឈប់បាញ់នេះបន្តទៀតក្រោយវិបត្តិមនុស្សធម៌កាន់តែអាក្រក់ទៅពី ១ ថ្ងៃ ទៅ ១ ថ្ងៃ។
ជាមួយគ្នានេះក្រុមអ្នកចរចាផ្សេងទៀត ដែលជាសម្ព័ន្ធមិត្តជាមួយក្រុមហាម៉ាស់ពោលគឺក្រុមប្រទេសនៅតំបន់មជ្ឈិមបូព៌ាដែលកាន់សាសនាអ៊ិស្លាមក៏កំពុងខិតខំប្រឹងប្រែងជំរុញឱ្យបទឈប់បាញ់លេចរូបរាងឡើងខណៈដែលពិធីបុណ្យសាសនារបស់ពួកគេនឹងចូលមកដល់នៅសប្ដាហ៍ក្រោយ។
បើទោះបីជាការចរចានាពេលនេះកំពុងស្ថិតក្នុងស្ថានភាពជាប់គាំងក៏ដោយក៏សហរដ្ឋអាមេរិកនៅតែជឿជាក់ថាបទឈប់បាញ់នៅតែអាចធ្វើទៅបាន។
អ្នកនាំពាក្យក្រសួងការបរទេសអាមេរិកលោក Matthew Miller បានគូសបញ្ជាក់ថា៖ «បើទោះបីជាមានឧបសគ្គនៅក្នុងការចរចាក្ដីប៉ុន្តែយើងនៅតែបន្តជឿជាក់ថាយើងនឹងអាចជម្នះវាបានហើយនាំយកមកនូវបទឈប់បាញ់សម្រាប់ភាគីទាំង២។
ដោយឡែកប្រទេសអាហ្វ្រិកខាងត្បូងកាលពីខែមករាបាននាំសំណុំរឿងមួយទៅតុលាការពិភពលោកនៅទីក្រុងឡាអេដោយចោទប្រកាន់អ៊ីស្រាអែលពីបទប្រល័យពូជសាសន៍នៅតំបន់ហ្គាហ្សា។
ប៉ុន្តែដោយមិនទាន់មានដំណោះស្រាយជាក់លាក់ណាមួយអាហ្វ្រិកខាងត្បូងបានតឿនតុលាការឱ្យចូលរួមជំរុញការចរចាបទឈប់បាញ់ដោយសារប្រជាជនស៊ីវិលប៉ាឡេស្ទីន កំពុងតែប្រឈមនឹងការអត់ឃ្លានយ៉ាងធ្ងន់ធ្ងរ។
បើតាមមន្ត្រីសុខាភិបាលរបស់ហ្គាហ្សា បានឱ្យដឹងថាជនជាតិប៉ាឡេស្ទីន ជាបន្តបន្ទាប់បានស្លាប់ដោយសារតែខ្វះទឹកបរិភោគនិងខ្វះអាហារូបត្ថម្ភ។
ទន្ទឹមនឹងក្ដីសង្ឃឹមថា បទឈប់បាញ់ចំនួន ៤០ ថ្ងៃ នឹងអាចកើតឡើងពិភពលោកក៏កំពុងតែភ័យខ្លាចថាជម្លោះនៅក្នុងប្រទេសអ៊ីស្រាអែលអាចនឹងរីករាលដាលទៅទូទាំងតំបន់មជ្ឈិមបូព៌ាបន្ទាប់ពីក្រុមសម្ព័ន្ធមិត្តរបស់ហាម៉ាស់នៅតែបន្តវាយប្រហារលើកប៉ាល់ដឹកទំនិញដែលឆ្លងកាត់សមុទ្រក្រហម។
ខុសពីការវាយប្រហាររាល់លើកក្នុងការវាយប្រហារចុងក្រោយនេះក្រុមឧទ្ទាមបានជ្រុលដៃធ្វើឱ្យនាវិកនៅលើកប៉ាល់ចំនួន៣នាក់បានស្លាប់។គេខ្លាចថាសហគមន៍អឺរ៉ុប និងសហរដ្ឋអាមេរិកនឹងបើកការវាយប្រហារសងសឹកទៅលើក្រុមឧទ្ទាមទាំងនោះដែលជាមូលហេតុធ្វើឱ្យភ្លើងសង្គ្រាមកាន់តែឆេះសន្ធោសន្ធៅឡើង៕
