ប្រភព៖ ANN/The Kathmandu Post
នេប៉ាល់៖ មានករណីដាក់ទណ្ឌកម្មធ្ងន់ធ្ងរទៅលើសិស្សចំនួន ៤ នាក់ ពីសំណាក់អ្នកគ្រូបង្រៀនម្នាក់ដោយបានប្រើបន្ទះដែកក្តៅវាយទៅលើថ្ពាល់របស់ពួកគេនៅឯសាលាមួយក្នុងក្រុង Bhimad នៃក្នុងស្រុក Tanahun ប្រទេសនេប៉ាល់។
យោងតាមការចុះផ្សាយរបស់សារព័ត៌មាន The Kathmandu Post សិស្សថ្នាក់ទី៤ បានស្រែកយំអំឡុងពេលប្រឡង ហើយគ្រូបង្រៀនឈ្មោះ Sushma Shrestha នៃសាលា Prabhat Academy បាននាំសិស្សទៅការិយាល័យរបស់នាងហើយដាក់ទណ្ឌកម្មយ៉ាងសាហាវ ដោយយកបន្ទះដែកក្តៅវាយទៅលើសិស្សទាំង៤នាក់ទាំងទឹកមុខសើចសប្បាយ។
ស្លាកស្នាមដែលបន្សល់ទុកពីបន្ទះដែកក្តៅក៏នៅអាចមើលឃើញយ៉ាងច្បាស់នៅលើថ្ពាល់របស់សិស្សពីរនាក់អាយុ ៩ និង ១០ ឆ្នាំ។
ម្តាយរបស់ក្មេងប្រុសរងគ្រោះម្នាក់ បានប្រាប់អ្នកសារព័ត៌មានថាគ្រូបង្រៀនរូបនោះបានប្រាប់គាត់តាមទូរស័ព្ទថា កូនរបស់គាត់បានរងរបួសស្រាលដោយសារទទួលទណ្ឌកម្ម ហើយបានធានារ៉ាប់រងថ្លៃព្យាបាល ព្រមទាំងបានស្នើសូមដោះស្រាយបញ្ហានៅក្នុងសាលា។
ម្ដាយរបស់ក្មេងប្រុសនេះនិយាយថា គ្រូដដែលនេះក៏ធ្លាប់ដាក់ទោសកូនគាត់កាលពីមុនដែរ ដោយយកដៃជ្រលក់ក្នុងទឹកក្ដៅ។
អ្នកស្រីបានបន្តថា៖ «ទោះបីគ្រូបង្រៀន និងរដ្ឋបាលសាលាសុំមិនឲ្យខ្ញុំបង្ហាញពីការដាក់ទណ្ឌកម្មយ៉ាងព្រៃផ្សៃនេះក៏ដោយ តែខ្ញុំបានសម្រេចចិត្តបន្តចាត់វិធានការនេះតាមផ្លូវច្បាប់ដដែល»។
ហេតុការណ៍នេះបានបង្កឱ្យមានការតវ៉ាពីអាណាព្យាបាល និងប្រជាពលរដ្ឋក្នុងមូលដ្ឋានដោយទាមទារឱ្យបណ្ដេញគ្រូបង្រៀនចេញពីសាលា និងចាត់ការតាមផ្លូវច្បាប់។
គួរអោយដឹងផងដែរថា គ្រូជាប់ចោទអាយុ ៣៤ឆ្នាំ រូបនេះ គឺជាកូនស្រីរបស់នាយកសាលា។ នាងគឺជាគណនេយ្យករនៅក្នុងសាលា ហើយចូលបង្រៀនរៀងរាល់ពេលដែលគ្រូផ្សេងទៀតអវត្តមានតែប៉ុណ្ណោះ។
ប៉ូលិសបានឃុំខ្លួនគ្រូបង្រៀនរូបនេះ និងបាននាំយកទៅតុលាការនៃស្រុក Tanahun កាលពីថ្ងៃពុធ សប្ដាហ៍មុន ហើយតុលាការសម្រេចឃុំខ្លួននាងរយៈពេល ៥ថ្ងៃ ដើម្បីបន្តការស៊ើបអង្កេត។
នៅឆ្នាំ២០០៦ តុលាការកំពូលនេប៉ាល់បានចេញសេចក្តីសម្រេចមួយដោយសុំឱ្យរដ្ឋាភិបាលចាត់វិធានការសមស្រប និងមានប្រសិទ្ធភាព ដើម្បីទប់ស្កាត់ការដាក់ទណ្ឌកម្មលើរាងកាយ ក៏ដូចជាការប្រព្រឹត្តិអំពើឃោរឃៅ អមនុស្សធម៌ ឬសកម្មភាពមិនល្អចំពោះកុមារ។
ប៉ុន្តែទោះបីជាមានក្របខណ្ឌច្បាប់យ៉ាងណាក៏ដោយ ក៏គ្រូបង្រៀនមួយចំនួននៅតែបន្តដាក់ទណ្ឌកម្មកម្រិតអមនុស្សធម៌ទៅលើសិស្សរបស់ពួកគេដដែល៕
ប្រភព៖ ANN/The Kathmandu Post
