ប្រធានាធិបតីសហរដ្ឋអាមេរិក ដូណាល់ ត្រាំ (ឆ្វេង) និងប្រធានាធិបតីអ៊ុយក្រែន វ៉ូឡូដីមៀរ ហ្សេឡេនស្គី។ ហ្វេសប៊ុក
ប្រធានាធិបតីអ៊ុយក្រែន លោក វ៉ូឡូដីមៀរ ហ្សេឡេនស្គី (Volodymyr Zelenskyy) បានបដិសេធការទាមទាររបស់រដ្ឋបាលលោក ដូណាល់ ត្រាំ ដែលទាមទារធនធានរ៉ែរបស់អ៊ុយក្រែនក្នុងតម្លៃប្រមាណ ៥០០ពាន់លានដុល្លារ។
លោក ហ្សេឡេនស្គីការ ថ្លែងថាចំនួនទឹកប្រាក់ដែលអាមេរិកទាមទារនេះវាខ្ពស់ជាងជំនួយរបស់អាមេរិកលើផ្នែកយោធា និងហិរញ្ញវត្ថុ ហើយថា ការទាមទារនេះក៏មិនបានផ្ដល់ការធានាដល់សន្តិសុខអ៊ុយក្រែននោះដែរ។
យ៉ាងណាក៏ដោយ ភាគីទាំងពីរកំពុងត្រៀមចរចាជាមួយគ្នាបន្តទៀតនៅថ្ងៃចន្ទនេះ ទៅលើធនធានធម្មជាតិសម្បូរបែបរបស់អ៊ុយក្រែន។
ទីក្រុងវ៉ាស៊ីនតោនកំពុងទាមទារ ៥០ភាគរយ នៃចំណូលដែលរកបានពីវិស័យរ៉ែ និងធនធានធម្មជាតិនានារបស់អ៊ុយក្រែន ជាសំណងទៅលើជំនួយយោធាដែលបានផ្តល់ឲ្យអ៊ុយក្រែនពីមុន។
ប៉ុន្តែ លោក ហ្សេឡេនស្គី បានថ្លែងថា ការផ្ដល់ទាំងឡាយរបស់អាមេរិកទៅអ៊ុយក្រែន មិនមែនក្នុងរូបភាពកម្ចីនោះទេ ប៉ុន្តែជាជំនួយឥតសំណង។
កាលពីថ្ងៃសុក្រ លោក ដូណាល់ ត្រាំ ថ្លែងថា កិច្ចព្រមព្រៀងរវាងអាមេរិកនិងអ៊ុយក្រែន«ជិតឈានដល់កិច្ចព្រមព្រៀងគ្នាហើយ»។
លោកត្រូវបានស្រង់សម្ដីដោយកាសែតជាច្រើនដោយថ្លែងថា៖ «ខ្ញុំគិតថា យើងកំពុងជិតទៅដល់ហើយ បាទ។ ខ្ញុំគិតថា ពួកគេចង់បានវា។ ពួកគេមានអារម្មណ៍ល្អអំពីវា។ វាជាកិច្ចព្រមព្រៀងដ៏សំខាន់មួយ ប៉ុន្តែពួកគេចង់បានវា ហើយវាធ្វើឱ្យយើងនៅក្នុងប្រទេសនោះ ហើយពួកគេក៏រីករាយជាខ្លាំងអំពីវាផងដែរ»។
ប៉ុន្តែ លោក ហ្សេឡេនស្គី បានថ្លែងផ្ទុយពីនេះ ដោយបានបដិសេធលើលក្ខខណ្ឌដែលទីក្រុងវ៉ាស៊ីនតោនបានដាក់ចេញ។ លោកថា «ខ្ញុំមិនអាចលក់អ៊ុយក្រែនបានទេ»។
សហរដ្ឋអាមេរិកបានផ្តល់ជំនួយផ្នែកអាវុធដល់អ៊ុយក្រែនប្រមាណ ៦៧ ពាន់លានដុល្លារ គិតចាប់តាំងពីឆ្នាំ ២០២២ មក។
យ៉ាងណាក៏ដោយ លោក ហ្សេឡេនស្គីបញ្ជាក់ដូច្នេះថា៖ «ខ្ញុំមិនអាចចុះហត្ថលេខាលើអ្វីដែលពលរដ្ឋអ៊ុយក្រែនរហូតដល់ ១០ ជំនាន់ នឹងត្រូវសងវិញទេនេះ»។
អ៊ុយក្រែនមានធនធានធម្មជាតិបម្រុងដ៏មានតម្លៃ និងកម្រ ១៧ ប្រភេទ ដែលមានសារៈសំខាន់សម្រាប់បច្ចេកវិទ្យាច្រើនប្រភេទ ដូចជា ទូរស័ព្ទដៃ ថាសរឹងនៃប្រព័ន្ធកុំព្យូទ័រ និងយានយន្តអគ្គិសនី។
ធនធានទាំងនេះមិនទាន់ត្រូវបានយកមកប្រើប្រាស់នៅឡើយ ដោយសារតែសង្គ្រាម និងវិធានការរបស់រដ្ឋក្នុងវិស័យរ៉ែ។
ចាប់តាំងពីរុស្ស៊ីវាយប្រហារទៅលើអ៊ុយក្រែនកាលពីឆ្នាំ២០២២ អ៊ុយក្រែនបានព្យាយាមចូលជាសមាជិកអង្គការណាតូ។ កាលពីសប្ដាហ៍មុន លោក ហ្សេឡេនស្គី បានថ្លែងដ៏ភ្ញាក់ផ្អើលមួយថា លោកសុខចិត្តចុះចេញពីដំណែង ប្រសិនបើអ៊ុយក្រែនអាចចូលរួមជាមួយណាតូ បាន។
លោកថា៖ «ប្រសិនបើសន្តិភាពសម្រាប់អ៊ុយក្រែនត្រូវការខ្ញុំចុះចេញ ខ្ញុំបានត្រៀមខ្លួនរួចហើយ។ ខ្ញុំអាចផ្លាស់ប្តូរតំណែងរបស់ខ្ញុំ ដើម្បីឱ្យអ៊ុយក្រែនចូលជាសមាជិកណាតូ ប្រសិនបើវាជាចាំបាច់»៕
ប្រភព៖ Euronews, The New York Times
