ប្រធានាធិបតីបារាំង អេម៉ានុយអែល ម៉ាក្រុង (ឆ្វេង) ជួបជាមួយលោក ដូណាល់ ត្រាំ នៅសេតវិមាន នៅថ្ងៃទី២៤ កុម្ភៈ។ AFP
ប្រធានាធិបតីបារាំង អេម៉ានុយអែល ម៉ាក្រុង (Emmanuel Macron) ថ្លែងថា សន្តិភាពនៅអ៊ុយក្រែន«មិនមែនជាការចុះចាញ់»នោះទេ ពោលគឺត្រូវតែមានការធានាសន្តិសុខសម្រាប់អ៊ុយក្រែន នៅពេលមានកិច្ចព្រមព្រៀងសន្តិភាពណាមួយជាមួយរុស្ស៊ី។
លោក ម៉ាក្រុង បានជួបជាមួយប្រធានាធិបតីសហរដ្ឋអាមេរិក ដូណាល់ ត្រាំ នៅសេតវិមាននៅថ្ងៃនេះ និងបានធ្វើសន្និសីទសារព័ត៌មានរួមគ្នា ប៉ុន្តែ មានខ្លឹមសារមិនចុះសម្រុងគ្នាខ្លះ ជាពិសេសពាក់ព័ន្ធនឹងការធានាសន្តិសុខសម្រាប់អ៊ុយក្រែន ក្នុងករណីមានកិច្ចព្រមព្រៀងណាមួយកើតឡើង។
លោក ម៉ាក្រុង ថ្លែងដូច្នេះថា៖ «សន្តិភាពមិនមែនជាការចុះចាញ់របស់អ៊ុយក្រែននោះទេ វាមិនមែនជាការបញ្ឈប់ការបាញ់គ្នាដោយគ្មានការធានាសន្តិសុខនោះទេ»។
លោក ត្រាំ មិនបានលើកឡើងអំពីការធានាសន្តិសុខសម្រាប់អ៊ុយក្រែនទេ ប៉ុន្តែ បានថ្លែងថា ការចំណាយណាមួយសម្រាប់ការរក្សាសន្តិភាពនៅអ៊ុយក្រែនគឺជាបន្ទុករបស់ប្រទេសនៅអឺរ៉ុប មិនមែនសហរដ្ឋអាមេរិកនោះទេ។
ទាំងលោក ត្រាំ និង លោក ម៉ាក្រុង ហាក់យល់ស្របគ្នាថា ការរក្សាសន្តិភាពនៅអ៊ុយក្រែនតម្រូវឲ្យមានការដាក់ពង្រាយទ័ពពីប្រទេសអឺរ៉ុប ប៉ុន្តែកងទ័ពនេះគឺក្នុងន័យរក្សាសន្តិភាព មិនមែនជាប់ពាក់ព័ន្ធជាមួយការបន្ថែមជម្លោះនោះទេ។
លោក ត្រាំ រំពឹងថា សង្គ្រាមរុស្ស៊ី-អ៊ុយក្រែន នឹងត្រូវបញ្ចប់នាពេលខាងមុខនេះ ដោយលោក សង្ឃឹមថា ប្រធានាធិបតីរុស្ស៊ី វ្លាឌឺមៀ ពូទីន នឹងទទួលយកកិច្ចព្រមព្រៀងបញ្ចប់សង្គ្រាម។
ទោះយ៉ាងណា លោក ម៉ាក្រុង បានបញ្ជាក់ថា កិច្ចព្រមព្រៀងណាមួយជាមួយរុស្ស៊ី មិនគួរជាកិច្ចព្រមព្រៀងដែល «ខ្សោយ» នោះទេ។
សង្គ្រាមរវាងរុស្ស៊ីនិងអ៊ុយក្រែន បានឈានដល់ឆ្នាំទី៤ហើយ ដោយមេដឹកនាំនៅអឺរ៉ុប និងអ៊ុយក្រែន បានរំឭកខួបទី៣ នៅថ្ងៃទី២៤ ខែកុម្ភៈ ហើយប្រធានាធិបតីអ៊ុយក្រែន Zelenskyy រំពឹងថា សង្គ្រាមនឹងបញ្ចប់នៅឆ្នាំ២០២៥នេះ៕
