លោក អេឡូន ម៉ាស់ និង លោក ដូណាល់ ត្រាំ។ X
មនុស្សរាប់សែននាក់បានចុះហត្ថលេខាលើញត្តិដើម្បីដកហូតសញ្ជាតិកាណាដារបស់ Elon Musk ចំពេលមានភាពតានតឹងរវាងរដ្ឋបាលលោក ដូណាល់ ត្រាំ និងកាណាដា។ ញត្តិដែលបានបើកឲ្យចុះហត្ថលេខាកាលពីប្រាំថ្ងៃមុនបានចោទលោក Elon Musk ថាបានប្រព្រឹត្តផ្ទុយនឹងផលប្រយោជន៍ជាតិរបស់កាណាដា និងធ្វើឲ្យប៉ះពាល់ដល់អធិបតេយ្យភាពរបស់ខ្លួន។
លោក Elon Musk ដែលកើតនៅអាហ្វ្រិកខាងត្បូង មានសញ្ជាតិកាណាដា និងសញ្ជាតិអាមេរិក។ ឆ្លើយតបនឹងញត្តិនេះ មហាសេដ្ឋីរូបនេះបានសរសេរនៅលើបណ្ដាញសង្គម X ថា៖ «កាណាដាមិនមែនជាប្រទេសពិតប្រាកដទេ» ប៉ុន្តែផុសនេះត្រូវបានលុបចោលវិញភ្លាម។
នៅប្រទេសកាណាដា សញ្ជាតិអាចត្រូវបានដកហូតវិញបានលុះត្រាតែមាននរណាម្នាក់បានប្រព្រឹត្តិការក្លែងបន្លំ ការបង្ហាញខ្លួនដោយបន្លំ ឬលាក់បាំងព័ត៌មានដោយចេតនាលើពាក្យសុំអន្តោប្រវេសន៍ ឬសញ្ជាតិ។
ញត្តិនេះបានអះអាងថា មហាសេដ្ឋីរូបនេះបានប្រើប្រាស់ទ្រព្យសម្បត្តិ និងអំណាចរបស់ខ្លួនដើម្បីមានឥទ្ធិពលលើការបោះឆ្នោតរបស់កាណាដា ហើយឥឡូវនេះលោក Elon Musk បានក្លាយជាសមាជិកនៃរដ្ឋាភិបាលបរទេស ដែលកំពុងព្យាយាមលុបបំបាត់អធិបតេយ្យភាពកាណាដាថែមទៀត។
គួរឲ្យដឹងផងដែរថា លោក Elon Musk មានសញ្ជាតិកាណាដា តាមរយៈម្តាយរបស់គាត់ ដែលកើតនៅខេត្ត Saskatchewan ជាប់នឹងព្រំដែនជាមួយសហរដ្ឋអាមេរិក។
ចាប់ផ្តើមនៅថ្ងៃទី២០ ខែកុម្ភៈមក ញត្តិដែលបានចុះហត្ថលេខារួចហើយដោយជនជាតិកាណាដាជាង ២៥ម៉ឺននាក់ ហើយញត្តិនេះនៅតែបើកចំហសម្រាប់ការចុះហត្ថលេខារហូតដល់ថ្ងៃទី ២០ ខែមិថុនា។
ភាពតានតឹងរវាងសហរដ្ឋអាមេរិក និងកាណាដាបានកើនឡើងចាប់តាំងពីការវិលត្រឡប់របស់លោក ដូណាល់ ត្រាំ មកសេតវិមានវិញ ដោយប្រធានាធិបតីអាមេរិកបានស្នើម្តងហើយម្តងទៀតថាកាណាដាអាចក្លាយជារដ្ឋរបស់សហរដ្ឋអាមេរិក និងគំរាមកំហែងដំឡើងពន្ធលើដែកថែប អាលុយមីញ៉ូម និងការនាំចូលផ្សេងទៀត។
ការលើកឡើងរបស់លោក ត្រាំ បានធ្វើឲ្យជនជាតិកាណាដាមានការមិនពេញចិត្តជាខ្លាំង ដោយពួកគេខ្លះបានលុបចោលការធ្វើដំណើរនៅសហរដ្ឋអាមេរិក ពហិការមិនចូលរួមផលិតផលអាមេរិក និងស្រែកច្រៀងប្រឆាំងនៅឯការប្រកួតកីឡាវាយកូនគោលលើទឹកកក និងបាល់បោះ។
លោក Elon Musk បានផ្លាស់ទីលំនៅពីអាហ្វ្រិកខាងត្បូងទៅប្រទេសកាណាដានៅអាយុ ១៨ ឆ្នាំ ហើយបានចាប់ផ្តើមធ្វើការជាបន្តបន្ទាប់មុនពេលសិក្សានៅសាកលវិទ្យាល័យ Queen's នៅ ទីក្រុង Kingston រដ្ឋ Ontario ក្រោយមកគាត់បានធ្វើចំណាកស្រុកទៅសហរដ្ឋអាមេរិក។
មហាសេដ្ឋីរូបនេះបានគាំទ្រគោលនយោបាយអន្តោប្រវេសន៍ដ៏តឹងរឹងរបស់លោក ត្រាំ ប៉ុន្តែឥឡូវនេះខ្លួនគាត់ក៏ត្រូវប្រឈមមុខនឹងការត្រួតពិនិត្យលើការអះអាងដែលថាគាត់បានធ្វើការដោយខុសច្បាប់នៅសហរដ្ឋអាមេរិកក្នុងទិដ្ឋាការសិស្ស។
លោកបានបដិសេធការចោទប្រកាន់នេះហើយថា លោកបានក្លាយជាពលរដ្ឋអាមេរិកតាំងពីឆ្នាំ២០០២៕
