ប្រធានាធិបតីសហរដ្ឋអាមេរិក ដូណាល់ ត្រាំ (ស្ដាំ) និងប្រធានាធិបតីអ៊ុយក្រែន វ៉ូឡូដីមៀ ហ្សេលេនស្គី។ AFP
អាមេរិក និង អ៊ុយក្រែនបានឈានដល់កិច្ចព្រមព្រៀងរ៉ែដ៏សំខាន់មួយជាមួយគ្នា ដែលមន្ត្រីអ៊ុយក្រែនចាត់ទុកថាជាលទ្ធផលវិជ្ជមាន។ ការវិវត្តថ្មីលើការចរចាកិច្ចព្រមព្រៀងរ៉ែរបស់អ៊ុយក្រែន មានឡើងបន្ទាប់ពីទីក្រុងវ៉ាស៊ីនតោនបានបោះបង់ចោលការទាមទារចំណែក ៥០០ពាន់លានដុល្លារពីចំណូលធនធានធម្មជាតិរបស់អ៊ុយក្រែន។
បន្ថែមពីលើនេះ អាមេរិកក៏នឹងបន្តផ្ដល់ការការពារសន្តិសុខសម្រាប់អ៊ុយក្រែន ដែលជាអ្វីអ៊ុយក្រែនត្រូវការជាចាំបាច់ ព្រមទាំងបន្តផ្ដល់ជំនួយយោធាដល់អ៊ុយក្រែន រហូតដល់ពេលមានកិច្ចព្រមព្រៀងសន្តិភាពជាមួយអ៊ុយក្រែន។
ប្រធានាធិបតីសហរដ្ឋអាមេរិក ដូណាល់ ត្រាំ បានប្រកាសថា ប្រធានាធិបតីអ៊ុយក្រែន វ៉ូឡូដីមៀ ហ្សេលេនស្គី រំពឹងថានឹងទៅដល់វ៉ាស៊ីនតោននៅថ្ងៃសុក្រខាងមុខនេះ ដើម្បីបញ្ចប់ការចរចានិងឈានទៅដល់ការចុះហត្ថលេខាលើកិច្ចព្រមព្រៀងនេះ។ លោកប្រាប់អ្នកសារព័ត៌មានថា លោកទទួលស្គាល់ភាពធន់របស់អ៊ុយក្រែនក្នុងសង្គ្រាមបច្ចុប្បន្ន ប៉ុន្តែបានសង្កត់ធ្ងន់ថា ការគាំទ្ររបស់សហរដ្ឋអាមេរិកមានសារៈសំខាន់។
លោកនិយាយថា៖ «បើគ្មានសហរដ្ឋអាមេរិក ប្រាក់អាមេរិក និងសព្វាវុធយោធារបស់អាមេរិកទេ នោះសង្គ្រាមនេះនឹងបញ្ចប់ក្នុងរយៈពេលខ្លីណាស់»។ ការថ្លែងដូច្នេះទំនងជាសំដៅទៅលើថា អ៊ុយក្រែនប្រហែលជាបានចាញ់សង្គ្រាមនេះជាយូរណាស់មកហើយ។
លោក ត្រាំ បានព្យាយាមទទួលបានសិទ្ធិទាញយកផលចំណេញពីរ៉ែរបស់អ៊ុយក្រែន ជាអ្វីដែលលោកថា ជាការតបស្នងសម្រាប់ជំនួយយោធាក្នុងរដ្ឋបាលមុន។
នៅថ្ងៃអង្គារ លោកបានអះអាងថា សហរដ្ឋអាមេរិកបានផ្តល់ជំនួយចន្លោះពី ៣០០ពាន់លាន ដល់ ៣៥០ពាន់លានដុល្លារទៅអ៊ុយក្រែន ហើយបាននិយាយថា «អ្នកបង់ពន្ធអាមេរិកនឹងទទួលបានលុយនេះវិញ»។
អ្នកវិភាគមើលឃើញថា យុទ្ធសាស្ត្ររបស់លោកត្រាំ ក្នុងអាណត្តិថ្មីរបស់លោក ខុសពីយុទ្ធសាស្ត្ររបស់អាមេរិកកាលពីមុនដែលផ្ដោតលើការពង្រឹងលទ្ធិប្រជាធិបតេយ្យនៅលើពិភពលោក។
យុទ្ធសាស្ត្រថ្មី ជាពិសេសនៅក្នុងរយៈពេល ៤ ឆ្នាំនៃការដឹកនាំរបស់លោក ត្រាំ គឺរាល់ជំនួយរបស់សហរដ្ឋអាមេរិកត្រូវតែមានផលប្រយោជន៍ផ្ទាល់សម្រាប់អាមេរិក៕។
