សេអ៊ូល៖ ប្រទេសកូរ៉េខាងជើង ហាក់បីដូចជាបានបញ្ជូនកងទ័ពបន្ថែមទៀត ដើម្បីគាំទ្រដល់ប្រទេសរុស្ស៊ី ក្នុងសង្រ្គាមជាមួយអ៊ុយក្រែន។ នេះបើយោងតាមទីភ្នាក់ងារចារកម្មរបស់ប្រទេសកូរ៉េខាងត្បូង កាលពីថ្ងៃព្រហស្បតិ៍។
សេវាស៊ើបការណ៍សម្ងាត់ជាតិ (NIS) បានឲ្យដឹងនៅក្នុងសារមួយទៅកាន់សារព័ត៌មានថា កងកម្លាំងកូរ៉េខាងជើងត្រូវបានដាក់ពង្រាយឡើងវិញទៅកាន់ទីលានប្រយុទ្ធ Kursk នៅដើមខែកុម្ភៈ បន្ទាប់ពីការសម្រាកប្រហែលមួយខែ។
ទីភ្នាក់ងារនេះបានបន្ថែមថា «ខ្លួនកំពុងពិនិត្យលើចំនួនពិតប្រាកដ ប៉ុន្តែពិតមានការដាក់ពង្រាយបន្ថែម» ។
កាលពីថ្ងៃទី ៧ ខែកុម្ភៈ ប្រធានាធិបតីអ៊ុយក្រែនលោក Volodymyr Zelenskyy បាននិយាយថា កងកម្លាំងរុស្ស៊ីបានដាក់ពង្រាយកងទ័ពកូរ៉េខាងជើងឡើងវិញទៅកាន់តំបន់ប្រតិបត្តិការ Kursk។
យោងតាម NIS ដំបូងឡើយ កូរ៉េខាងជើងបានបញ្ជូនទាហានប្រហែល ១១០០០ នាក់ទៅកាន់ប្រទេសរុស្ស៊ីកាលពីខែតុលាឆ្នាំមុន។ កងកម្លាំងទាំងនេះបានហ្វឹកហាត់នៅ Vladivostok មុនពេលត្រូវបានដាក់ពង្រាយទៅកាន់តំបន់ Kursk ជាកន្លែងដែលពួកគេបានចូលរួមយ៉ាងសកម្មក្នុងសង្គ្រាម។ ទោះយ៉ាងណាក៏ដោយ ទាហានប្រមាណ ៤០០០នាក់ត្រូវបានរាយការណ៍ថាស្លាប់ និងរបួស។
របាយការណ៍ពីប្រទេសអ៊ុយក្រែនបង្ហាញថា កងកម្លាំងកូរ៉េខាងជើងកំពុងតស៊ូដើម្បីរក្សាជំហររបស់ខ្លួន។
សារព័ត៌មាន Euromaidan Press ដែលជាសារព័ត៌មានដែលមានមូលដ្ឋាននៅទីក្រុង Kyiv បានរាយការណ៍កាលពីថ្ងៃចន្ទថា កងកម្លាំងរុស្ស៊ីបានព្យាយាមភ្ជាប់ទំនាក់ទំនងជាមួយអង្គភាពកូរ៉េខាងជើងដែលនៅដាច់ពីគេក្នុងទីក្រុង Nikolske ភាគខាងកើតអ៊ុយក្រែន ចម្ងាយប្រហែល ៧០០ គីឡូម៉ែត្រភាគអាគ្នេយ៍នៃទីក្រុង Kursk ប៉ុន្តែកិច្ចខិតខំប្រឹងប្រែងម្តងហើយម្តងទៀតរបស់ពួកគេបានបរាជ័យ។
ទោះបីជាមានការស្លាប់ និងរបួសកើនឡើងក៏ដោយ ក៏អ្នកជំនាញនិយាយថា ទីក្រុងព្យុងយ៉ាងទំនងជានឹងបន្តបញ្ជូនកងទ័ពពេញមួយឆ្នាំ ដើម្បីទទួលបានការគាំទ្រពីរុស្ស៊ី និងទទួលបានបទពិសោធន៍ប្រយុទ្ធ។
លោក Hong Min អ្នកស្រាវជ្រាវជាន់ខ្ពស់នៅវិទ្យាស្ថានកូរ៉េសម្រាប់ការបង្រួបបង្រួមជាតិបាននិយាយថា៖ «កូរ៉េខាងជើងហាក់ដូចជាបង្កើនការដាក់ពង្រាយកងទ័ពទៅរុស្ស៊ី ដោយក្រុងព្យុងយ៉ាងទំនងជាស្វែងរកការពង្រីកតួនាទីរបស់ខ្លួនដើម្បីទទួលបានរង្វាន់ខាងនយោបាយនិងយោធាកាន់តែខ្លាំង»។
លោកបាននិយាយថា៖ «ខណៈពេលដែលប្រធានាធិបតីអាមេរិក ដូណាល់ ត្រាំ ហាក់ដូចជាកំពុងជំរុញឱ្យមានការពន្លឿនការបញ្ចប់សង្រ្គាម តែទាំងរុស្ស៊ី និងកូរ៉េខាងជើង បែជារំពឹងថាជម្លោះនឹងអូសបន្លាយយូ» ។
លោកបានបន្ថែមថា៖ «កូរ៉េខាងជើងទំនងជាបន្ថែមលើសពីកងកម្លាំងថ្មើរជើង ដោយបញ្ជូនអង្គភាពជំនាញក្នុងកាំភ្លើងធំ មេកានិច សង្គ្រាមអេឡិចត្រូនិក និងការឈ្លបយកការណ៍ ដើម្បីទទួលបានបទពិសោធន៍ប្រយុទ្ធចម្រុះ»។
កាលពីដើមឆ្នាំនេះ យោធាកូរ៉េខាងត្បូង ក៏បានប្រកាសថា ខ្លួនកំពុងតាមដានយ៉ាងដិតដល់នូវការរីកចម្រើនផ្នែកយោធាដ៏មានសក្តានុពលរបស់កូរ៉េខាងជើង រួមទាំងកម្មវិធីមីស៊ីលផ្លោង និងអាវុធនុយក្លេអ៊ែររបស់ខ្លួន ដែលរបបនេះអាចនឹងកំពុងអភិវឌ្ឍដោយមានជំនួយពីរុស្ស៊ី ជាថ្នូរនឹងការគាំទ្រផ្នែកកងទ័ព៕
ប្រភព៖ The Korea Herald / តំណភ្ជាប់ប្រភព
