សម្រាប់អ្នកចូលចិត្តមើលមេឃមើលផ្កាយ យប់ថ្ងៃទី២៨ ខែកុម្ភៈនេះគឺជាឱកាសដ៏កម្រដោយភពចំនួន ៧ នឹងបង្ហាញខ្លួននៅក្រោយថ្ងៃលិច។ ការខកខានឱកាសនេះ នឹងត្រូវរង់ចាំរហូតដល់ឆ្នាំ២០៤០ ទើបព្រឹត្តិការណ៍បែបនេះកើតមានម្ដងទៀត។
អ្នកវិទ្យាសាស្ត្របានពន្យល់ថា ព្រឹត្តិការណ៍ដ៏កម្របែបនេះឈ្មោះថា «ព្យុហយាត្រានៃភព» (planetary parade) ដែលរួមមានភពអង្គារ (Mars) ភពព្រហស្បតិ៍ (Jupiter) ភពអ៊ុយរ៉ានុស (Unranus) ភពសុក្រ (Venus) ភពណិបទូន (Neptune) ភពពុធ (Mercury) និងភពសៅរ៍ (Saturn)។ ភពទាំងនេះអាចមើលឃើញភ្លាមៗបន្ទាប់ពីថ្ងៃលិច។
លោក Greg Brown តារាវិទូនៅសាកលវិទ្យាល័យ Royal Observatory Greenwich បានថ្លែងថា៖ «ព្រឹត្តិការណ៍ព្យុហយាត្រានៃភព» គឺជាពេលដែលភពជាច្រើនអាចមើលឃើញនៅលើមេឃក្នុងពេលតែមួយ»។
ទោះបីជាភពទាំង ៧ នេះបង្ហាញខ្លួនក្នុងពេលតែមួយក៏ដោយ មនុស្សមិនអាចមើលឃើញភពទាំងនេះដោយភ្នែកទទេផ្ទាល់នោះទេ។
ភពចំនួន ៤ គឺ ភពពុធ ភពសុក្រ ភពព្រហស្បតិ៍ និងភពអង្គការ អាចមើលឃើញនឹងភ្នែកផ្ទាល់ ចំណែកឯភពសៅរ៍ ពិបាកនឹងមើលឃើញដោយសារនៅឆ្ងាយ ចំណែកភពអ៊ុយរ៉ានុស និង ភពណិបទូន ត្រូវការកែវយឹតទើបមើលឃើញ។
ការមើលភពទាំងនេះគួរធ្វើឡើងភ្លាមៗនៅពេលថ្ងៃលិច។
តារាវិទូណែនាំឲ្យរកកន្លែងស្រឡះល្អនិងចៀសវាងការស្ថិតនៅកន្លែងមានពន្លឺខ្លាំង ឬ ការមើលទូរស័ព្ទ មុនពេលចាប់ផ្ដើមមើលភពទាំងនេះ៕
ប្រភព៖ BBC, The Guardian
