កុមារម្នាក់កំពុងដើរនាពេលព្រឹកនៅទីក្រុងមួយក្នុងប្រទេសម៉ុងហ្គោលី កាលពីឆ្នាំ២០១៧។ Unicef
ទិន្នន័យថ្មីមួយបានបង្ហាញអំពីផលប៉ះពាល់ដ៏គួរឱ្យបារម្ភនៃការបំពុលខ្យល់មកលើសុខភាពកុមាររាប់លាននាក់ ដែលនេះបង្ហាញពីភាពចាំបាច់ក្នុងការអន្តរាគមន៍បន្ទាន់ដើម្បីការពារសុខភាព និងអនាគតរបស់កុមារ។
ទិន្នន័យដែលអង្គការយូនីសេហ្វបានវិភាគបង្ហាញថា ការបំពុលខ្យល់ ជាពិសេសនៅក្នុងរដូវប្រាំង ចាប់ពីពេលនេះរហូតដល់កំឡុងខែមេសា ដែលឈានឡើងដល់ចំណុចកំពូលនៅតាមតំបន់ជាច្រើន អាចជាកត្តាចំបងមួយដែលបង្កឲ្យផលប៉ះពាល់យ៉ាងខ្លាំងដល់អាយុជីវិតនិងអាចឈានដល់ការស្លាប់របស់កុមារក្នុងក្រុមអាយុក្រោម ៥ឆ្នាំ ដែលមានចំនួនជាង ១០០នាក់ជារៀងរាល់ថ្ងៃ។
កុមារជាង៥០០លាននាក់នៅតំបន់អាស៊ីបូព៌ានិងប៉ាស៊ីហ្វិកកំពុងរស់នៅក្នុងតំបន់ដែលមានការបំពុលខ្យល់កម្រិតខ្ពស់ដែលមានផលប៉ះពាល់ខ្លាំងដល់សុខភាពតាមរយៈការបំពុលខ្យល់ក្នុងផ្ទះបង្កពីការប្រើប្រាស់អុសដើម្បីចម្អិនអាហារដែលអាចបង្កឲ្យផលប៉ះពាល់យ៉ាងខ្លាំងដល់អាយុជីវិតរបស់កុមារអាយុក្រោម ៥ឆ្នាំ។ នេះបើតាមការវិភាគបង្ហាញរបស់យូនីសេហ្វេ។
ទន្ទឹមនឹងនេះកុមារប្រមាណ ៣២៥លាននាក់រស់នៅក្នុងតំបន់ដែលកម្រិតភាគល្អិតបំពុលខ្យល់ PM2.5 ប្រចាំឆ្នាំបានកើនឡើងលើស៥ដងនៃកម្រិតស្តង់ដាររបស់អង្គការសុខភាពពិភពលោក (WHO) ។
យូនីសេហ្វអះអាងថា ស្ទើរតែពាក់កណ្ដាលនៃ PM2.5 នៅក្នុងបណ្ដាប្រទេសដែលមានសារធាតុពុលកម្រិតខ្ពស់បំផុត បង្កឡើងដោយការដុតអុស ធ្យូង និងប្រេងនិងសំណល់កសិកម្ម ដែលបង្កើតឧស្ម័នផ្ទះកញ្ចក់ និងនាំឱ្យមានការប្រែប្រួលអាកាសធាតុ។
លោកស្រី June Kunugi នាយិកាយូនីសេហ្វប្រចាំតំបន់អាស៊ីបូព៌ា និងប៉ាស៊ីហ្វិក បានថ្លែងកាលពីខែមិថុនាថា៖ «ការបំពុលខ្យល់មានផលប៉ះពាល់ដល់កុមារ ប្រសិនបើពួកគេស្រូបយកខ្យល់ពុល ដែលអាចប៉ះពាល់ដល់ការលូតលាស់ប្រព័ន្ធផ្លូវដង្ហើម និងការអភិវឌ្ឍបញ្ញារបស់ពួកគេ»។
ការបំពុលខ្យល់ពុលអាចដាក់សម្ពាធទៅលើប្រព័ន្ធសុខាភិបាលបង្កើនបន្ទុកចំណាយសម្រាប់ការព្យាបាលនិងបង្កការរំខានដល់ការរៀនសូត្រ។ ធនាគារពិភពលោកបានប៉ាន់ស្មានថា នៅឆ្នាំ២០១៩ ការបំពុលខ្យល់ពី PM2.5 បានបង្កឱ្យមានការស្លាប់មុនអាយុ និងជំងឺនានា ដែលធ្វើឱ្យតំបន់អាស៊ីបូព៌ា និងប៉ាស៊ីហ្វិកមានបន្ទុកចំណាយចំនួន ៩,៣ភាគរយ នៃផលិតផលក្នុងស្រុកសរុប (GDP) ដែលស្មើនឹងជាង ២,៥ ទ្រីលានដុល្លារនៅតំបន់នេះ។
យូនីសេហ្វជំរុញឱ្យរដ្ឋាភិបាលនានានៅតំបន់នេះពង្រឹងគោលនយោបាយការពារអាកាសធាតុ និងបរិស្ថាន ដូចជាការប្រើប្រាស់ថាមពលស្អាត និងពង្រឹងបទដ្ឋានគុណភាពខ្យល់ដែលស្របជាមួយនឹងគោលការណ៍ណែនាំរបស់អង្គការសុខភាពពិភពលោកដើម្បីការពារសុខភាពរបស់កុមារ។
វិស័យឯកជនក៏ត្រូវចូលរួមផងដែរ តាមរយការប្រើប្រាស់បច្ចេកវិទ្យាបៃតង កាត់បន្ថយការបញ្ចេញឧស្ម័ន និងធានាថា ការអនុវត្ត និងផលិតផលរបស់ខ្លួនផ្ដល់អាទិភាពចំពោះសុវត្ថិភាព និងសុខុមាលភាពរបស់កុមារ។
យូនីសេហ្វកំពុងសហការជាមួយរដ្ឋាភិបាល វិស័យសុខាភិបាលវិស័យឯកជន និងសហគមន៍នៅទូទាំងតំបន់អាស៊ីបូព៌ា និងប៉ាស៊ីហ្វិក ដើម្បីការពារកុមារពីផលប៉ះពាល់ដោយការបំពុលខ្យល់ ដូចជាការជំរុញឲ្យមានគោលនយោបាយការពារអាកាសធាតុ និងបរិស្ថានសម្រាប់កុមារ និង កាត់បន្ថយការបំពុលខ្យល់តាមគ្រប់វិធី។
យូនីសេហ្វជំរុញឲ្យអាជ្ញាធរតាមដានគុណភាពខ្យល់ជាប្រចាំនិងផ្សព្វផ្សាយរបាយការណ៍ជាសាធារណៈដើម្បីឲ្យសាធារណជនមានការប្រុងប្រយ័ត្ន និងពង្រឹងប្រព័ន្ធសុខាភិបាល ដើម្បីដោះស្រាយជំងឺដែលបង្កឡើងដោយការបំពុលខ្យល់។
