រូបឯកសារ៖ Tasnim
កងទ័ពជើងទឹកនៃប្រទេសអ៊ីរ៉ង់ រុស្ស៊ី និងចិន នឹងធ្វើសមយុទ្ធយោធារួមគ្នានៅឆ្នេរសមុទ្រអ៊ីរ៉ង់ក្នុងសប្តាហ៍នេះ ក្នុងគោលបំណងជំរុញកិច្ចសហប្រតិបត្តិការ។ នេះបើតាមការចុះផ្សាយរបស់ប្រព័ន្ធផ្សព្វផ្សាយអ៊ីរ៉ង់។
ប្រទេសទាំងបីដែលមានបំណងប្រាថ្នារួមគ្នាដើម្បីប្រឆាំងនឹងអ្វីដែលពួកគេកំណត់ថាជាអនុត្តរភាពរបស់អាមេរិក បានធ្វើសមយុទ្ធរបៀបនេះនៅក្នុងតំបន់នារយៈពេលប៉ុន្មានឆ្នាំចុងក្រោយនេះ។
ទីភ្នាក់ងារសារព័ត៌មាន Tasnim បានចុះផ្សាយថា៖ «សមយុទ្ធនឹងចាប់ផ្តើមនៅថ្ងៃអង្គារ នៅក្នុងកំពង់ផែ Chabahar ដែលមានទីតាំងនៅភាគអាគ្នេយ៍ប្រទេសអ៊ីរ៉ង់ នៅលើឈូងសមុទ្រអូម៉ង់»។ ប៉ុន្តែ អាជ្ញាធរមិនបានបញ្ជាក់អំពីរយៈពេលនៃសមុទ្ធនេះទេ។
យោងតាម Tasnim នាវាចម្បាំងនិងកងកម្លាំងជើងទឹកចិន និង រុស្ស៊ី ក៏ដូចជានាវាចម្បាំងនៃកងនាវាចររបស់កងទ័ពជើងទឹកអ៊ីរ៉ង់ និងកងឆ្មាំបដិវត្តន៍ ត្រូវបានគេរំពឹងថានឹងចូលរួមក្នុងសមយុទ្ធនេះ។
ទីភ្នាក់ងារព័ត៌មាន Tasnim បានឲ្យដឹងថា សមយុទ្ធនេះនឹងប្រព្រឹត្តទៅ «នៅភាគខាងជើងមហាសមុទ្រឥណ្ឌាដោយមានគោលបំណងពង្រឹងសន្តិសុខក្នុងតំបន់ និងពង្រីកកិច្ចសហប្រតិបត្តិការពហុភាគីរវាងប្រទេសដែលចូលរួម»។
អាស៊ែបៃហ្សង់ អាហ្រ្វិកខាងត្បូង អូម៉ង់ កាហ្សាក់ស្ថាន ប៉ាគីស្ថាន កាតា អ៊ីរ៉ាក់ អារ៉ាប់រួម និងស្រីលង្កា នឹងចូលរួមក្នុងនាមជាអ្នកសង្កេតការណ៍៕
