លោកស្រី Ursula von der Leyen និងលោក ដូណាល់ ត្រាំ។ DPA
សហភាពអឺរ៉ុបសងសឹកសហរដ្ឋអាមេរិកដោយប្រកាសយកពន្ធទំនិញអាមេរិក២៨ពាន់លានដុល្លារ ក្រោយពេលអាមេរិកយកពន្ធលើដែកថែប និង អាលុយមីញ៉ូមពីអឺរ៉ុបក្នុងអត្រា ២៥ភាគរយ ដែលចូលជាធរមាននៅថ្ងៃនេះ។
ការប្រកាសនេះធ្វើឡើងដោយលោកស្រី Ursula von der Leyen ប្រធានគណៈកម្មការអឺរ៉ុបនៅថ្ងៃទី១២ ខែមីនានេះ ក្នុងទឹកប្រាក់ ២៦ពាន់លានអឺរ៉ូ ឬ ២៨ពាន់លានដុល្លារទៅលើទំនិញពីសហរដ្ឋអាមេរិក។
លោកស្រីបញ្ជាក់ថា សហភាពអឺរ៉ុបនៅតែបើកទ្វារសម្រាប់ការចរចា ហើយក៏អាចនឹងដំឡើងអត្រាពន្ធនេះផងដែរ។ ការដាក់ពន្ធគយនេះនឹងចូលជាធរមាននៅថ្ងៃទី១៣ ខែមេសាខាងមុខ។
លោកស្រីថ្លែងថា៖ «វិធានការតបតដែលយើងប្រកាសនៅថ្ងៃនេះវាធ្ងន់ ប៉ុន្តែ សមាមាត្រគ្នា។ នៅពេលដែលសហរដ្ឋអាមេរិកកំពុងដាក់ពន្ធមានទឹកប្រាក់ ២៨ពាន់លានដុល្លារ យើងក៏ឆ្លើយតបដោយវិធានការតទល់ដែលមានតម្លៃ ២៦ពាន់លានអឺរ៉ូ»។
លោកស្រីថា សហភាពអឺរ៉ុប ធ្វើដូច្នេះដើម្បីការពារអ្នកប្រើប្រាស់និងអាជីវកម្ម ហើយពន្ធដែលនឹងដាក់នេះ នឹងមានទៅលើផលិតផលរាប់ចាប់ពីទូក រហូតដល់ម៉ូតូ។ សហភាពអឺរ៉ុបក៏ចាប់ផ្ដើមកិច្ចពិភាក្សារយៈពេល ២ សប្ដាហ៍ដើម្បីបន្ថែមមុខទំនិញផ្សេងទៀតពីសហរដ្ឋអាមេរិក។
យោងតាមស្ថិតិរបស់សហភាពអឺរ៉ុប សហភាពអឺរ៉ុបនាំចេញក្នុងទឹកប្រាក់ ៥៣១,៦ពាន់លានអឺរ៉ូ ទៅសហរដ្ឋអាមេរិកនៅឆ្នាំ២០២៤ ចំណែកនាំចូលពីសហរដ្ឋអាមេរិកមានទំហំ ៣៣៣.៤ពាន់លានអឺរ៉ូ។ ការនាំចេញទៅអាមេរិកកើនឡើងជាង ៥ភាគរយ ចំណែកការនាំចូលពីអាមេរិកធ្លាក់ចុះ ៤ភាគរយ៕
