ការឆេះនាវាទាំងពីរក្រោយពេលប៉ះទង្គិចនៅថ្ងៃទី១០ ខែមីនា។ AP
ប៉ូលិសអង់គ្លេសចាប់ខ្លួនជនជាតិរុស្ស៊ីម្នាក់ដែលជាប្រធានកប៉ាល់ដឹកទំនិញ Solong ដែលបានប៉ះទង្គិចជាមួយកប៉ាល់ដឹកប្រេងសម្រាប់យោធាអាមេរិក ដោយសង្ស័យរឿងឃាតកម្ម និងធ្វេសប្រហែស។
បន្ទាប់ពីហេតុការណ៍កប៉ាល់ដឹកទំនិញបុកជាមួយនឹងកប៉ាល់ដឹកប្រេងសម្រាប់យន្តហោះយោធាអាមេរិកផ្ទុះឆេះនៅថ្ងៃទី១០ ខែមីនា ប៉ូលិសអង់គ្លេសបានបើកការស៊ើបអង្កេតឧក្រិដ្ឋកម្មទៅលើករណីមួយនេះហើយបានចាប់ខ្លួនបុរសអាយុ ៥៩ ឆ្នាំម្នាក់ដែលមកពីកប៉ាល់ដឹកទំនិញ Solong ដោយសង្ស័យពីបទឃាតកម្ម តាមរយៈការធ្វេសប្រហែស។
អ្នកនាំពាក្យរបស់ក្រុមហ៊ុនដែលគ្រប់គ្រងនាវាដឹកទំនិញ Solong បានបញ្ជាក់ប្រាប់អ្នកសារព័ត៌មានថា បុរសដែលត្រូវបានចាប់ខ្លួនគឺជាប្រធានក្រុមកប៉ាល់ ហើយគាត់ជាជនជាតិរុស្ស៊ី ហើយអ្នកនាំពាក្យរូបនេះ ហើយក្រុមនាវិកដែលនៅសល់គឺជាជនជាតិរុស្ស៊ី និងហ្វីលីពីន។
នៅក្នុងហេតុការណ៍នោះ កប៉ាល់ដឹកទំនិញ Solong ពាក់ទង់ជាតិព័រទុយហ្គាល់ បានបុកកប៉ាល់ដែលមានទង់ជាតិអាមេរិក Stena Immaculate ដែលជាកប៉ាល់ដឹកប្រេងនៅ ពេលប៉ាល់ដឹកប្រេងនេះ បានបោះយុថ្កានៅសមុទ្រខាងជើង ដោយមានផ្ទុកប្រេងឥន្ធនៈយន្តហោះសម្រាប់យោធាអាមេរិក។
ការប៉ះទង្គិចនេះ ធ្វើឲ្យផ្ទុះឆេះ បំផ្លាញនាវាទាំងពីរយ៉ាងសន្ធោសន្ធៅនៅកណ្តាលសមុទ្រ នាំឲ្យមានការជួយសង្គ្រោះបន្ទាន់ដោយឆ្មាំឆ្នេរសមុទ្រអង់គ្លេស។
នាយកប្រតិបត្តិនៃកំពង់ផែ Grimsby បានសម្តែងការហួសចិត្ត ចំពោះហេតុការណ៍ដែលបានកើតឡើង ដោយគាត់បាននិយាយថា៖ «វាហាក់ដូចជាអាថ៌កំបាំងមួយ ពីព្រោះនាវាទាំងអស់ឥឡូវនេះមានឧបករណ៍បច្ចេកទេសដ៏ទំនើបបំផុតសម្រាប់រៀបចំវគ្គបណ្តុះបណ្តាល និងដើម្បីមើលឧបសគ្គ ឬអ្វីដែលពួកគេត្រូវចៀសវាង។ តើកប៉ាល់ដឹកទំនិញអាចបន្តចូលបុកកប៉ាល់ដឹកប្រេងដោយរបៀបណា? វាគួតែមានសញ្ញាព្រមាន ហើយពួកគេច្បាស់ជាអាចមើលឃើញវានៅលើរ៉ាដា»។
នៅក្នុងករណីនេះ ប៉ូលិសអង់គ្លេសនៅតែបន្តស៊ើបអង្កេតយ៉ាងយកចិត្តទុកដាក់បំផុត៕ ប្រភព៖ CNN
