សហរដ្ឋបានបណ្ដេញចេញជនជាតិវេណេហ្ស៊ុយអេឡាសរុប ២៦១នាក់ ទៅកាន់ពន្ធនាគារ Supermax នៅប្រទេសអែលសាល់វ៉ាឌ័រ ទោះបីជាចៅក្រមអាមេរិកជំទាស់នឹងការបណ្ដេញចេញនេះក៏ដោយ។
ប្រធានាធិបតីអែលសាល់វ៉ាឌ័រ បានថ្លែងនៅលើបណ្ដាញសង្គមថា មនុស្សទាំង ២៣៨នាក់គឺជាក្រុមនៃឧក្រិដ្ឋជនឈ្មោះ Tren de Aragua ពួកគេបានទៅដល់ប្រទេស អែលសាល់វ៉ាឌ័រ ជាមួយនឹងមនុស្ស ២៣នាក់ទៀតដែលក្រុមឧក្រិដ្ឋជនអន្តរជាតិ MS-13 កាលពីអាទិត្យ។ ប៉ុន្តែ មិនមានលម្អិតថាតើពួកបានប្រព្រឹត្តបទល្មើសអ្វីនៅសហរដ្ឋអាមេរិកនោះទេ។
រដ្ឋបាលលោក ដូណាល់ ត្រាំ កាលពីចុងសប្ដាហ៍បានគាស់កកាយច្បាប់សម័យសង្គ្រាមមួយដែលមានរយៈពេលមួយសតវត្សរ៍មកហើយ គឺច្បាប់ Alien Enemies Act of 1798 យកមកអនុវត្តឡើងវិញ ដើម្បីជាសំអាងសម្រាប់ការបណ្ដេញចេញនានា ទោះបីជាដីការបស់តុលាការសហព័ន្ធរារាំងមិនឲ្យមានការបណ្ដេញពួកគេចេញ។
នាង Karoline Leavitt អ្នកនាំពាក្យសេតវិមានថ្លែងថា រដ្ឋបាលលោក ត្រាំ មិនបានជំទាស់ទៅនឹងដីការបស់តុលាការទេ ប៉ុន្តែថា ដីកានោះមិនមានមូលដ្ឋានច្បាប់ ហើយម៉្យាងទៀតដីកានោះចេញក្រោយពេល«ក្រុមភេរវករ» ត្រូវបានបណ្ដេញចេញពីទឹកដីអាមេរិករួចហើយ។
ស្របពេលជាមួយគ្នានេះ សហរដ្ឋអាមេរិកក៏ត្រៀមអនុវត្តការរឹតបន្តឹងទិដ្ឋាការសម្រាប់ការចូលទៅសហរដ្ឋអាមេរិក ដោយក្នុងនោះពលរដ្ឋពីវេណេហ្ស៊ុយអេឡា និងប្រទេស១០ទៀតនឹងត្រូវបដិសេធទិដ្ឋាការតែម្ដង ដោយពួកស្ថិតនៅក្នុងបញ្ជីក្រហម។
ប្រទេសមួយចំនួនទៀតនឹងត្រូវដាក់ក្នុងបញ្ជីពណ៌ទឹកក្រូច ដែលនឹងប៉ះពាល់ទៅលើទិដ្ឋាការសម្រាប់ទេសចរ និស្សិត។ ចំណែកប្រទេសផ្សេងទៀតដែលស្ថិតក្នុងបញ្ជីពណ៌លឿង ក្នុងនោះមានទាំងកម្ពុជាផង អាចត្រូវប្រឈមការហាមមិនឲ្យចូលសហរដ្ឋអាមេរិក ឬ មានការរឹតបន្តឹងផ្សេងទៀត។ យ៉ាងណាក៏ដោយ វិធានការរឹតបន្តឹងដែលក្រសួងការបរទេសអាមេរិកបានរៀបចំនេះ អាចប្រែប្រួល នៅពេលមានការសម្រេចជាផ្លូវការ៕
