នាយករដ្ឋមន្ត្រីថៃ Paetongtarn Shinawatra ស្នើឲ្យមានការស៊ើបអង្កេតយ៉ាងម៉ត់ចត់ទៅលើករណីបាក់សំណង់ផ្លូវល្បឿនលឿនដែលកំពុងសាងសង់ ដែលបានបណ្ដាលឲ្យមនុស្សស្លាប់ ៥ នាក់និងរបួស ២២ នាក់ ដោយត្រូវស៊ើបអង្កេតទៅលើក្រុមហ៊ុនសាងសង់។
ថ្លែងនៅលើបណ្ដាញសង្គមបន្ទាប់ពីកិច្ចប្រជុំជាមួយក្រសួងពាក់ព័ន្ធថ្ងៃទី១៧ ខែមីនានេះថា លោកស្រីបញ្ជាក់ថា៖ «រដ្ឋាភិបាលមិននៅស្ងៀមទេ។ យើងត្រូវតែទទួលខុសត្រូវសម្រាប់បញ្ហានេះយ៉ាងហ្មត់ចត់ ទាំងដំណើរការផ្លូវច្បាប់ និង ការព្យាបាល។ យើងត្រូវតែចាត់វិធានការច្បាស់លាស់ភ្លាមៗ»។
ករណីបាក់គ្រោងសំណង់ផ្លូវល្បឿនលឿនដែលកំពុងស្ថិតក្នុងដំណាក់កាលសាងសង់ នៅក្នុងស្រុក Chom Thong នៃទីក្រុងបាងកក បានកើតឡើងកាលពីថ្ងៃសៅរ៍ទី១៥ ខែមីនា បណ្ដាលឲ្យមនុស្ស ៥ នាក់ស្លាប់ និងរបួស ២២នាក់។
លោកស្រី Paetongtarn បន្តថា៖ «យើងស្នើឲ្យស៊ើបអង្កេតករណីនេះឲ្យបានហ្មត់ចត់។ ត្រូវពិនិត្យមើលក្រុមហ៊ុនម៉ៅការនិងក្រុមហ៊ុនម៉ៅការបន្ត។ យើងស្នើថា ត្រូវតែមានវិធានការផ្លូវច្បាប់ ក៏ដូចជាការពិនិត្យឡើងវិញទៅលើទីប្រឹក្សាគម្រោង»។
បើតាមនាយករដ្ឋមន្ត្រីថៃដដែល គម្រោងនេះត្រូវតែសាងសង់ឲ្យចប់សព្វគ្រប់ ប៉ុន្តែ អ្វីដែលត្រូវធ្វើគឺធានាបានថា ឧបទ្ទវហេតុដូច្នេះមិនអាចកើតឡើងម្ដងទៀតទេ៕
