ផែនទីប្រទេសអ៊ុយក្រែន និងតំបន់ជម្លោះជាមួយរុស្ស៊ី។ University of Missouri
ប្រធានាធិបតីអាមេរិក លោក ដូណាល់ ត្រាំ នឹងនិយាយតាមទូរស័ព្ទជាមួយប្រធានាធិបតីរុស្ស៊ី វ្លាឌឺមៀ ពូទីន នៅថ្ងៃអង្គារនេះ ដើម្បីរកវិធីបញ្ចប់សង្គ្រាមនៅអ៊ុយក្រែន ខណៈដែលមេដឹកនាំអ៊ុយក្រែនថា លោក ពូទីន ព្យាយាមបន្តសង្គ្រាម។
លោកថ្លែងប្រាប់អ្នកសារព័ត៌មាននៅរដ្ឋធានីវ៉ាស៊ីនតោនកាលពីថ្ងៃចន្ទថា៖ «អ្វីដែលកំពុងកើតឡើងនៅអ៊ុយក្រែនមិនល្អនោះទេ ប៉ុន្តែយើងនឹងដឹងថាតើយើងអាចធ្វើអ្វីដើម្បីបានកិច្ចព្រមព្រៀងសន្តិភាព បទឈប់បាញ់គ្នា និងសន្តិភាព ហើយខ្ញុំគិតថា យើងអាចធ្វើបាន»។
លោក ត្រាំ បន្តថា សមាសធាតុជាច្រើននៅក្នុងកិច្ចព្រមព្រៀងសន្តិភាពនៅអ៊ុយក្រែន ត្រូវបាននិយាយត្រូវរូវគ្នាហើយ ជាមួយភាគីរុស្ស៊ី។
យ៉ាងណាក៏ដោយ រហូតមកទល់ពេលនេះ សំណើឈប់បាញ់គ្នានៅអ៊ុយក្រែនរយៈពេល ៣០ថ្ងៃ បានកន្លងផុតទៅមួយសប្ដាហ៍ហើយ។ ប្រធានាធិបតីអ៊ុយក្រែន Volodymir Zelensky ថ្លែងថា គឺលោក ពូទីន ប្រធានាធិបតី រុស្ស៊ីជាអ្នកអូសបន្លាយសង្គ្រាមហើយសម្ពាធត្រូវតែដាក់បន្ថែមលើរុស្ស៊ីដើម្បីឲ្យរុស្ស៊ីបញ្ចប់សង្គ្រាមនេះ។
ថ្លែងនៅលើបណ្ដាញសង្គម X លោក Zelensky លើកឡើងថា ថ្ងៃនេះគឺជាខួបគ្រប់មួយសប្ដាហ៍ដែលសហរដ្ឋអាមេរិកបានស្នើឲ្យមានបទឈប់បាញ់គ្នានៅលើមេឃ នៅឯសមុទ្រ និងនៅជួរមុខ។ សំណើនេះគួរតែត្រូវបានអនុវត្តភ្លាមៗ ប៉ុន្តែ រៀងរាល់ថ្ងៃ សង្គ្រាមនៅតែបន្តហើយឆក់យកជីវិតមនុស្សជាច្រើន។
លោកថា៖ «ឥឡូវនេះ ជិតមួយសប្ដាហ៍ហើយ ហើយវាច្បាស់ណាស់សម្រាប់មនុស្សគ្រប់គ្នានៅលើពិភពលោក ថាតើអ្នកណាជាអ្នកមិនទទួលស្គាល់ការពិតអស់រយៈពេល ៣ឆ្នាំកន្លងទៅ នោះគឺលោក ពូទីន ដែលបន្តអូសបន្លាយសង្គ្រាមនេះ។ ឥឡូវនេះជិតមួយសប្ដាហ៍ លោក ពូទីន នៅតែមិនអាចនិយាយចេញពាក្យថា «បាទ» ចំពោះសំណើឈប់បាញ់គ្នា។ គាត់ចេះតែនិយាយអ្វីដែលគាត់ចង់ ប៉ុន្តែមិនមែនអ្វីដែលពិភពលោកចង់បាន»។
លោកបន្តថា បទឈប់បាញ់គ្នាដោយគ្មានលក្ខខណ្ឌមានសារៈសំខាន់សម្រាប់សង្គ្រោះជីវិត និងជាឱកាសសម្រាប់មន្ត្រីទូតធ្វើការលើការធានាសន្តិសុខនិងសន្តិភាពយូរអង្វែង ប៉ុន្តែ រុស្ស៊ីមិនខ្វាយខ្វល់ពីសំណើនេះទេ។
សំណើឈប់បាញ់គ្នារយៈ ៣០ថ្ងៃ ត្រូវបានស្នើឡើនៅប្រទេសអារ៉ាប៊ីសាអ៊ូឌីត កាលពីសប្ដាហ៍មុន ប៉ុន្តែ លោកពូទីន បានលើកឡើងនូវចម្ងល់ជាច្រើន ដូចជាថា បទឈប់បាញ់នេះគឺដើម្បីឲ្យអ៊ុយក្រែនប្រមូលកម្លាំងទ័ព ជាដើម៕
